Progjet di divulgazion didatiche su la storie dal Friûl
Chest al è un progjet promovût de ARLeF, nassût par fâ cognossi e par rindi plui atrative la storie dal Friûl, cjapant dentri i zovins cul lengaç apassionant de musiche e de ilustrazion. A Dj Tubet, rapper furlan di Nimis, al è stât dât il compit di creâ une cjançon in lenghe furlane par sclarî la storie dal Friûl ai fantats in etât di scuele, e par compagnâ la musiche e lis sôs peraulis al è stât metût adun ancje un video realizât, dopo di un concors di ideis, di Massimo Racozzi.
Il progjet, presentât intal 2016 in ocasion de Fieste de Patrie dal Friûl a Gardiscje e al Stadi Friûl a Udin, al à un fin didatic e educatîf prin di dut, ma in ogni câs al concor a promovi cuntun tai diviers e moderni la Fieste dai 3 di Avrîl. No sta a contâmi dome chê storie al è stât proponût in diviersis scuelis dal teritori e i materiâi corelâts a vegnin doprâts dai insegnants e dai students in maniere autonome o cul supuart di Dj Tubet che, di là di ideâ la cjançon, al à fat tescj, basis musicâls e schedis cun indicazions buinis pal lavôr in classe. Il test de cjançon di Dj Tubet “No sta a contâmi dome chê storie”, fate insiemi cu la cjantante Camilla Grassi, in art Milly, al à tant che suaze la storie di un soldât in trincee dilunc de prime vuere mondiâl che, in spiete dal gnûf ordin di atac, al ripasse lis tapis plui impuartantis de storie dal Friûl fasint cussì une piçule riflession su vuere, pâs e propriis lidrîs. I fats storics contâts inte cjançon a doprin tant che font il libri “La nestre storie” di pre Checo Placerean e, inte composizion de base rap, Dj Tubet al à volût di pueste meti la citazion melodiche dal Cinccent di Giorgio Mainerio: “Putta nera, ballo furlano”.
Il video musicâl realizât dal architet, regjist, senegjatôr e ilustradôr Massimo Racozzi in colaborazion cun Stefania Carlotta Del Bianco e Maurizio Mattiuzza, al à creât l’acompagnament visîf des peraulis de cjançon cuntune storie ideade e fate doprant la tecniche dal dissen animât fat a man: par creâ e montâ i trê minûts e trente di video a son stâts doprâts plui o mancul 700 dissens realizâts in maniere manuâl di Racozzi. La idee, sielte de comission tecniche sientifiche de ARLeF fra siet diviers progjets, e à valorizât ancjemò di plui, traviers une ilustrazion e une animazion di grande cualitât, la cjançon di Dj Tubet.
Il video e i materiâi realizâts di Dj Tubet a ufrissin aes scuelis ispirazions e percors didatics pe divulgazion e pe riflession su la storie furlane des origjins fin ae prime vuere mondiâl, cuntune cronologjie semplificade, une zonte di materiâl poetic e basis musicâls che a puedin jessi dopradis tant che strument par cjantâ il test de cjançon cemût che al ven furnît, o cambiantlu a plasê dal insegnant.
Chi sot a son disponibii la cjançon, il video, e i contignûts didatics utii pal aprofondiment dai temis de cjançon di Dj Tubet “No sta a contâmi dome chê storie“. I insegnants a puedin cjatâ: une schede di istruzions par doprâ miôr i materiâi, il test de cjançon cun aprofondiments di gjenar storic, il spartît pe esecuzion cul flaut e diviersis basis de cjançon stesse (audio de base, cjançon a capele, base cence flaut). A son di podê scjariâ ancje i file audio facilitadôrs, regjistrâts cun diviersis velocitâts (60 bpm, 65 bpm, 70 bpm) plui bassis di chê origjinâl (80 bpm), par che i arlêfs a puedin esercitâsi, in maniere plui semplice, inte esecuzion de cjançon cul flaut.
Consulte i materiâi
| Ogjet | Cjale |
| Scolte la cjançon |
|
| Cjale il video |
|
| Lei il test |
|
| Istruzions |
|
| Test cun aprofondiment |
|
| Spartît pe esecuzion cul flaut |
|
| Facilitadôrs |
|
| Ducj i materiâi didatics |
|
Imagjins
