PROGJETS
La ARLeF e met in vore e e prudele progjets cul fin di incentivâ la presince de lenghe furlane in ducj i ambits de vite sociâl, e in particolâr tes ativitâts teatrâls, cinematografichis, leterariis e musicâls.
La Farie Teatrâl Furlane e je un dai progjets in cors, cul fin di rinfuarçâ e di dâ continuitât ae produzion di tescj e di spetacui teatrâi professionâi che a integnin la culture e la lenghe furlane. Il progjet al met adun 14 ents che a ritegnin che al sedi strategjic promovi une azion di sisteme ta chest setôr, disvilupant colaborazions indreçadis a integrâ lis carateristichis vocazionâls di ognidun dai sogjets cjapâts dentri.
Il Concors par tescj cinematografics in lenghe furlane, al à che di prudelâ la scriture di storiis par films e senegjaturis, di articui di critiche e di saçs cinematografics par furlan, deventant cussì une palestre par autôrs e critics di cine. Il concors si davuelç ogni doi agns e al previôt un prim premi monetari e publicazions inte riviste di cine par furlan Segnâi di lûs. Progjet di stamp musicâl, nassût tal 2009 a Udin e prudelât de ARLeF, al è Suns, Festival de cjançon in lenghe minoritarie, il pont di partence pai artiscj che rapresentin lis minorancis linguistichis di Italie, Austrie, France, Slovenie e Svuizare, al fin di partecipâ al Liet International, o ben il festival european di riferiment par chel che al rivuarde la musiche in lenghe minoritarie. Ta cheste sezion al sarà pussibil aprofondì i principâi progjets inviâts.