Fieste de Patrie dal Friûl

Il 3 di Avrîl dal 1077 al rapresente une ricorence impuartante pal popul furlan parcè che al sancìs la nassite dal Stât Patriarcjâl furlan, la istituzion che e à metût dongje, fin al XV secul, il Friûl e tancj altris teritoris intun unic organisim statuâl rivant, par chê epoche, a formis di organizazion civîl une vore avanzadis. Par ufrî un cuadri precîs dal moment storic là che si insuaze chest fat, o proponìn un test gjavât fûr dal libri “La nestre storie” (ed. Ass. Storie dai Longobars, 2009) di Pre Checo Placerean.

"Tal 1077, sot dal Imperadôr Indrì IV al è tornât a nassi il Friûl cul non di "Patrie dal Friûl". E il cont cui jerial? Il Patriarcje. Ma chê robe chi no ven tun moment. Al coventave che cualchidun le ves za preparade, le ves tornade a tirâ sù.
Prin dal 1077 i conts no valevin nuie; cui che o vin vude la fortune di vê e jere int di prime categorie fra i patriarcjis, ducj todescs. A fasevin part de Baviere e de Carintie e a'nd è stât un – al tocje fâ il non: Poppo o Popon – che al à fat sù la basiliche che o viodês a Aquilee, le à fate dal 1031, le à dedicade e al è sapulît tal mieç de basiliche, là jù. Al è stât lui che al à tornât a tirâ sù lis sortis dal Friûl. Al jere carintian, fradi dal cont di Carintie, e al vignive di Treffen, un paisut dongje di Vilac. Cul fat che il patriarcje Siart tal 1077 nol jere plui dome vescul ma ancje cont, e scomence la storie dal Stât indipendent furlan te Ete di Mieç.
Dal 1077 indevant il Friûl al jere un stât tant indipendent che al veve parfin un Parlament. Nô o vin i documents, par dî, di une riunion dal Parlament furlan di vincj agns prime dal Parlament inglês. Chel al veve une sole funzion: che il re nol podeve imponi une tasse, e tirâle, cence che i siôrs si metessin dacuardi su cui che al veve di paiâle. Nuie altri!
Culì, no! Culì, intant il patriarcje nol è come il re de Inghiltere che al comande il parlament: il patriarcje al è dome il president e al è obleât a ubidî a ce che il parlament al decît.
Seconde robe: tal nestri parlament no son dentri dome siôrs, ma a son ancje lis libaris comunitâts, i comuns, come Udin, come Glemone, come Cividât, che i fasin part tant che i siôrs.
Tierce robe: nissun nol po tignî un esercit cence il permès dal parlament; il patriarcje nol pues fâ vuere cence il permès dal parlament. Une robe serie! Al sameave cetant a une monarchie costituzionâl!
Dut câs, il Parlament furlan al è scomençât in chê epoche li e al dure fintremai tal 1420 (dentri dal Stât indipendent, po fintremai ai prins dal ‘800, N.d.R.). Ma dal 1077 al 1420 a son saltâts fûr ancje altris personaçs di prime categorie. Un al è Bertrant. Al è rivât dal 1334, al veve 74 agns. Al è muart, copât dai siôrs furlans e dai cjalunis di Cividât te plane de Richinvelde, tal 1350. Il patriarcje Bertrant al è chel che al à dedicade la glesie sul San Simeon e al è chel che al à sopuartât un dai piês taramots che a sedin mai comparîts te nestre storie. (...)
O vin vût cualchi altri patriarcje ancjemò di prime categorie. Marquart, par esempli. Om di cjâf, om di culture, avocat dai plui grancj dal so secul, al vignive di Ausburg; nus à dât lis "Constitutiones Patriae Fori Iulii". Savêso ce che al vûl dî? Il codiç dal Friûl. Cun chel codiç nô o sin lâts indevant fin tal 1797".
 

Pal so significât, il 3 di Avrîl al rapresente un moment impuartant pe comunitât furlane, une vere fieste par memoreâ e tornâ a pensâ in clâf moderne aes formis di autoguvier e di rapresentativitât che, par tancj agns, a àn caraterizât la Patrie dal Friûl. Il valôr zontât di chest moment storic fondamentâl al salte fûr cuant che si passe l'aspiet filologjic sempliç de ricorence, jessint fûr de rievocazion storiche, ma ben concentrantsi sui principis di specialitât che a fasevin de Patrie dal Friûl, soredut in graciis dal so parlament, un dai Stâts plui avanzâts de epoche.

Zire il to dispositîf

Ruota il tuo dispositivo

Rotate your device

Cheste pagjine no si pues viodi cun chest dispositîf

Pagina non disponibile per questo dispositivo

This page is not available on this device