Al dipent di nô
“Ogni dì o sielzìn lis peraulis che a esprimin lis nestris emozions, che a descrivin ce che o fasìn, che a contin cemût che o sin. Ogni dì o sielzìn la lenghe che e fevele di nô. L’ûs dal furlan al è une sielte. Fevelâlu intes situazions cuotidianis plui diviersis, decidi di insegnâlu ai fîs za di piçui e dâur la oportunitât di studiâlu a scuele, al rint ognidun di nô protagonist tal fâ vivi la lenghe, contribuint a alimentâ un patrimoni individuâl e coletîf straordenari.”
Al dipent di nô e je une campagne di informazion e di sensibilizazion realizade de ARLeF cul obietîf di stimolâ i citadins furlans, e in particolâr i zovins, a deventâ part ative tal alimentâ e sostignî la lenghe furlane midiant di un ûs cussient e cuotidian.
-
Mostre di plui
Il slogan sielt al evidenzie che ogni singule persone e je protagoniste tal fâ vivi la lenghe e tal dâi un avignî a un patrimoni culturâl milenari. Cheste e je une sfide che la ARLeF e invide ducj a fâ proprie, par che la lenghe furlane si rinovedi e si disvilupedi ogni dì di plui. Il messaç al è veicolât midiant di une campagne multicanâl che e cjape dentri tv, radio, stampe su cjarte, web e social media. E complete la planificazion la publicitât dinamiche sui autobus urbans e extraurbans di Udin e de provincie, i posters intes stazions feroviariis di Udin, Gurize e Pordenon e la presince in cualchi centri comerciâl. La comunicazion integrade e je indreçade a di un public larc sedi par fasse di etât che par aree di residence, o ben a dut il teritori furlanofon des ex provinciis di Udin, Gurize e Pordenon. La campagne a smire cun di plui a fâ cognossi la ARLeF e i siei servizis, a furnî informazions su la lenghe e la sô tutele, e a difondi l’ûs dai tancj struments informatics creâts par facilitâ l’ûs dal furlan sui gnûfs media.
SPOT VIDEO
Un corisi daûr corâl di “al dipent di me”, “al dipent di te”, “al dipent di nô”, “al dipent di voaltris” al è il fîl condutôr dal spot video di 32″. Situazions, personis e lûcs diviers si dan la volte e si instrecin.
-
Mostre di plui
Il spot al è un invît a rifleti su la responsabilitât individuâl e coletive intal mantignî vive la lenghe, responsabilitât che e je ancje il fîl condutôr des piçulis storiis rapresentadis.
In ognidune, di fat, i protagoniscj a son ritrats intal moment li che a àn cussience plene che l’obietîf dulà rivâ al è dome intes propriis mans, che si trati di sport, dal principi di un gnûf percors di vite, di une prestazion artistiche, di une incarghe di largevôr delicade o de fin di un percors formatîf impuartant.
Lis ripresis a son stadis fatis in diviersis ambientazions (tant che il Teatri Gnûf “Giovanni da Udine” e la Stazion Osservative di Basovizza) e a àn coinvolt atôrs professioniscj cognossûts tant che Fabiano Fantini, ma ancje zovins musiciscj sielzûts midiant di une selezion.
Il spot al à un stîl moderni e dinamic, cuntun montaç caraterizât di un ritmi cressint, a man a man simpri plui indurant, par adatâsi aes situazions rapresentadis, par cjapâ dentri il spetatôr, par dâ il ritrat di une societât moderne, cussiente dal propri passât e proietade bande il futûr. Il spot al è stât realizât in cuatri versions: cun sottitui par furlan, talian, inglês e cence sottitui. Al sarà mandât su lis tv locâls, sul web, sui social e intun centri comerciâl.
SPOT AUDIO
Doi spots radiofonics di 29”, che si sierin cul claim “Al dipent di nô”, a dan vôs a doi impuartants obietîfs de campagne: la trasmission de lenghe in famee e i servizis ufierts de ARLeF.
-
Mostre di plui
Il prin spot, un dialic tenar tra un pari e la sô frute, al rimarche la impuartance de trasmission linguistiche tra gjenitôrs e fîs; il secont, invezit, al ricuarde la esistence di struments tecnologjics utii – tant che il Grant Dizionari Bilengâl Talian-Furlan – che la Agjenzie e met a disposizion gratuite dai utents sul propri sît.
I spots a son programâts su lis emitentis radiofonichis regjonâls principâls, par 50 dîs tacant dai 30 di Setembar dal 2019 e intai oraris che e je plui scolte, lant a cuvierzi lis frecuencis di dut il teritori furlanofon.
MOTION GRAPHIC
Par fâ cognossi i servizis de ARLeF e par furnî informazions su la lenghe e su la sô tutele, a son stâts realizâts 6 videos in motion graphic, tecniche che e cumbine ilustrazion e animazion, de durade variabile di 1′ a 1′ e 30″.
Realizâts in trê versions – furlan, talian e in part ancje par inglês – a son otimizâts pai canâi social (FB e Instagram) e pe visualizazion su pc, tablet e smartphone.
Cui che e je e ce che e fâs la ARLeF
La ARLeF e je l'ent strumentâl de Regjon F-VJ che al coordene lis ativitâts pe tutele e pe promozion de lenghe furlane
Il furlan al è une lenghe. Ve ca parcè
Cuâi sono i criteris che a permetin di definîle cussì?
Lenghe Furlane
Dulà e in trops che le fevelin e cualchi informazion su la tutele
Cognossistu i struments informatics che ti judin a scrivi e a imparâ il furlan?
Ve ca chei metûts a disposizion de ARLeF in chest sît
Percè isal impuartant fevelâ furlan in famee e insegnâlu ai fruts?
I vantaçs di cressi cun plui lenghis
Sielç l'insegnament dal furlan a scuele par to fi
Dâi la possibilitât di cressi bi- o plurilengâl
-
Cui che e je e ce che e fâs la ARLeF
La ARLeF e je l'ent strumentâl de Regjon F-VJ che al coordene lis ativitâts pe tutele e pe promozion de lenghe furlane
La ARLeF – Agjenzie Regjonâl pe Lenghe Furlane e je l’ent strumentâl de Regjon Autonome Friûl – Vignesie Julie che al coordene lis ativitâts relativis ae tutele e ae promozion de lenghe furlane daûr di chel che al è definît de normative regjonâl.
La Agjenzie e realize azions par promovi la presince e l’ûs de lenghe furlane intai setôrs principâi de vite sociâl, jenfri chescj la famee, la scuele, i mass media, lis gnovis tecnologjiis, la aministrazion publiche, la sanitât, la ricercje sientifiche, i spetacui e lis arts, la culture, il mont dal lavôr. E met in vore, in particolâr, azions par alçâ il status de lenghe e par insiorâ i struments linguistics in grafie uficiâl.
E cure, cun di plui, i rapuarts cun chês altris minorancis linguistichis de Italie e de Europe, in particolâr dentri dal NPLD – Network to Promote Linguistic Diversity.
Cjale il video par scuvierzi dutis lis ativitâts de ARLeF.
Par aprofondiments cjale il sît in dutis lis sôs sezions.
Ti aial plasût chest video? Condividilu cul hashtag #aldipentdite
Quiz
![]()
Sul sît de ARLeF a son risorsis che ti judin a imparâ il furlanVeroFalsoRisposta corretta: Vero
La ARLeF, di là di colaborâ cun ents e associazions par organizâ cors di lenghe e par certificâ lis competencis linguistichis, e à metût a disposizion gratuite dai utents une serie di materiâi che a facilitin l’aprendiment. Navighe intes sezions Struments, Materiâi e Multimedia par scuvierziju ducj!
La ARLeF e ufrìs i siei servizis di traduzion e di consulence dome ai ents publicsVeroFalsoRisposta corretta: Falso
La Agjenzie e ufrìs i siei servizis di traduzion, revision, consulence linguistiche e toponomastiche, sedi ai ents publics dal teritori furlan, sedi ai privâts (citadins, impresis, associazions…) che a puedin indreçâsi al Sportel linguistic regjonâl par vê dutis lis informazions.
A esistin altris ents, di là de ARLeF, che si ocupin di minorancis linguistichisVeroFalsoRisposta corretta: Vero
Fâ rêt e je la maniere plui eficace par tutelâ e par promovi lis lenghis mancul pandudis. La ARLeF, di fat, e colabore cun diviers ents che si interessin di minorancis linguistichis sedi in Italie, che in Europe. Par fâ cualchi esempli, dongje dal NPLD, baste pensâ ae Provincie Autonome di Trent, ae Xunta de Galicia, ae Academie Europeane di Bolzan – EURAC…
-
Il furlan al è une lenghe. Ve ca parcè
Cuâi sono i criteris che a permetin di definîle cussì?
Parcè il furlan isal une lenghe? Par rispuindi a cheste domande si à di fâ riferiment sedi a considerazions di gjenar linguistic sedi, soredut, a criteris extralinguistics, ven a stâi storics, leteraris, sociopolitics. Giovanni Frau, linguist innomenât e professôr emerit de Universitât dal Friûl, intal so studi innomenât “L’individualità linguistica del friulano”, al à individuât sîs carateristichis che a colochin la lenghe furlane intune posizion specifiche inte aree des lenghis romanzis:
- Origjinalitât de gjenesi storiche. Il furlan al è une lenghe romanze che e derive dal latin de regjon aquileiese e NO de lenghe taliane. Sant Jaronim al ateste che za intal secul V il vescul di Aquilee, Fortunazian, al doprave une lenghe locâl une vore caraterizade par predicjâ ai siei fedêi.
- Origjinalitât gramaticâl fonetiche e morfologjiche. Il furlan al à mantignût fenomens impuartants tipics dal latin tart ma al à disvilupât ancje inovazions propriis particolârs. Al è impussibil sintetizâ chi chestis carateristichis, ogjet di studi sedi a nivel talian che internazionâl.
- Lenghe comune e grafie uficiâl. Il furlan al à une varietât comune di riferiment (clamade lenghe comune o coinè), che si è afermade tacant dal Sîscent, e che vuê e fâs ancje di lenghe cuviert par dutis lis varietâts locâls. Al à ancje une grafie uficiâl, definide dal art. 13 de Leç regjonâl 15/96.
- Tradizion leterarie secolâr. Lis primis composizions poetichis scritis par furlan si puedin datâ ae fin dal ‘300. Di in chê volte fintremai a vuê la lenghe e à cjatât simpri, cence soluzion di continuitât, autôrs une vore valevui. I plui impuartants a son: Ermes di Colloredo, Eusebio Stella, Gio Maria Marussig, Pietro Zorutti, Caterina Percoto, Pier Paolo Pasolini, Carlo Sgorlon, Pierluigi Cappello.
- Cussience dai locutôrs. La cussience di fevelâ une “lenghe” che si diferenzie in maniere nete di chês altris dongje e je une vore fuarte tra i abitants dal Friûl. Par altri, il furlan al è di simpri definît dai locutôrs “lenghe” o “marilenghe”, cemût che a testemonein i vocabolaris plui antîcs.
- Ricognossiment juridic. Il furlan al è stât ricognossût in maniere uficiâl tant che lenghe: dal Consei de Europe (Convenzion cuadri pe protezion des minorancis nazionâls dal 1998), dal Stât talian (Leç 482/99 su la tutele des minorancis linguistichis storichis) e de Regjon Autonome Friûl-Vignesie Julie (Leç regjonâl 15/96 e Leç regjonâl 29/07, dutis dôs leçs organichis pe promozion e pal svilup dal furlan).
Cjale il video par scuvierzi parcè che il furlan al è une lenghe.
Par aprofondiments cliche chi: Lenghe.
Ti aial plasût chest video? Condividilu cul hashtag #aldipentdite
Quiz
![]()
Il furlan al à carateristichis gramaticâls propriisVeroFalsoRisposta corretta: Vero
La lenghe furlane e à diviersis carateristichis propriis, tant che la distinzion fra vocâls lungjis e curtis, la palatalizazion di <c> e <g> devant di <a>, la forme duâl distinte tra masculin e feminin…
Pier Paolo Pasolini al scriveve par furlanVeroFalsoRisposta corretta: Vero
Pier Paolo Pasolini al à scomençade la sô esperience poetiche propit in lenghe furlane intal 1942. Di là des oparis in viers e in prose, intal Fevrâr dal 1945 Pasolini, adun cun cualchi amî, al à fondade la Academiuta di lenga furlana, propit cul fin di infuartî la dignitât linguistiche e leterarie dal furlan.
Cuant che si fevele di “MARILENGHE” si intint la lenghe frulaneVeroFalsoRisposta corretta: Vero
Par furlan il tiermin “marilenghe” si lu dopre tant che sinonim di “lenghe furlane”. Fevelâ in marilenghe = fevelâ in lenghe furlane.
Par rindi il concet di “lenghe materne”, si dopre invezit la espression “lenghe mari”. Chest al dimostre trop alt che al è il nivel di autocussience che i furlans a àn de lôr lenghe.
-
Lenghe Furlane
Dulà e in trops che le fevelin e cualchi informazion su la tutele
Il Friûl, ancje pe sô posizion gjeografiche, al è une regjon plurilengâl par ecelence. Il repertori linguistic dai furlans al è pardabon vari e al cjape dentri, di là de stesse lenghe furlane (intes sôs varietâts), lis varietâts ‘aloglotis’ gjermanichis e slavis e, nancje dîlu, il talian.
Il furlan al è une lenghe neolatine che si è disvilupade dal tart latin aquileiês e che e à ricevût i apuarts des lenghis des popolazions che a àn condividût moments de lôr storie cun chê dal Friûl.
La aree linguistiche furlane e cjape dentri la porzion nordorientâl de penisule taliane. In Friûl-Vignesie Julie 173 comuns su 215 des ex Provinciis di Gurize, Pordenon e Udin a àn domandât di jessi includûts inte mape di ricognossiment uficiâl. A son ancje trê comuns là che si fevele furlan in provincie di Vignesie: Cinto Caomaggiore, Tei Venit e San Michêl dal Tiliment.
Su la base de ricercje davuelte intal 2014 de ARLeF in colaborazion cu la Universitât dal Friûl, in regjon il numar di locutôrs al è di plui o mancul 600.000 personis. A chescj si zontin po dopo altris 10.000 locutôrs residents in Venit. Intal rest dal mont si stime che a sedin plui o mancul 1 milion lis personis che a fevelin par furlan.Intai ultins agns a son stâts fats bogns une vore di intervents legjislatîfs e aministratîfs indreçâts ae tutele dal patrimoni linguistic e culturâl dal Friûl.
Cjale il video par scuvierzi ducj i detais su la difusion de lenghe furlane e su lis leçs che le tutelin.
Par aprofondiments cliche chi:
Friûl: Storie e Culture
Cundizion sociolinguistiche
Tutele juridicheTi aial plasût chest video? Condividilu cul hashtag #aldipentdite
Quiz
![]()
La lenghe furlane si fevele dome inte regjon Friûl-Vignesie JulieVeroFalsoRisposta corretta: Falso
Il furlan al è fevelât di simpri in Friûl, vâl a dî: intai comuns des 3 ex Provinciis di Gurize, Pordenon e Udin, che a fasin part de regjon Friûl-Vignesie Julie, e in 3 comuns de regjon Venit (part dal Friûl ocidentâl, in provincie di Vignesie). Cun di plui, calcolâts i fenomens migratoris plui o mancul resints che a àn puartât i furlans dapardut ator pal mont, si stime che la lenghe e sedi fevelade fintremai di 1 milion di personis: dal orient estrem, al continent american passant pe Europe!
La Costituzion de Republiche Taliane e ricognòs lis minorancis linguistichisVeroFalsoRisposta corretta: Vero
La Costituzion e ricognòs lis minorancis linguistichis intal articul 6, che al dîs: “La Republiche e tutele cun normis di pueste lis minorancis linguistichis”. Cun di plui, l’articul 3, come 1, al stabilìs che “Ducj i citadins a àn la stesse dignitât sociâl e a son compagns devant de leç, cence distinzion di ses, di raze, di lenghe, di religjon, di opinions politichis, di cundizions personâls e sociâls”.
La lenghe furlane e je ricognossude ancje a nivel internazionâlVeroFalsoRisposta corretta: Vero
La Convenzione cuadri pe protezion des minorancis nazionâls dal Consei di Europe (1998) si apliche ancje ae minorance linguistiche furlane. La Convenzion e à il fin di protezi la esistence des minorancis nazionâls e e intint promovi une avualance plene e efetive di chês stessis, sigurant lis cundizions necessariis par conservâ e par disvilupâ lis lôr culturis, e par preservâ la lôr identitât.
-
Cognossistu i struments informatics che ti judin a scrivi e a imparâ il furlan?
Ve ca chei metûts a disposizion de ARLeF in chest sît
Ti plasial scrivi par furlan ma no tu sâs cemût digjitâ i acents? Vuelistu controlâ se il test che tu âs scrit al à erôrs? No rivistu a visâti la traduzion par furlan di une peraule taliane? Sêstu un insegnant che al cîr gnovis ideis e buinis pratichis? Dutis chestis domandis a àn une rispueste semplice: consulte (e discjame) i struments tecnologjics metûts a disposizion de ARLeF in chest sît!
Tu puedis cirî i tiermins intal Grant Dizionari Bilengâl furlan-talian (GDBtf), discjamâ la Tastiere Furlane Semplice par scrivi acents e caratars speciâi in maniere facile e svelte, discjamâ il Coretôr Ortografic par verificâ la coretece dai tescj… e tant altri ancjemò.
Cjale il video par scuvierzi dut sui struments informatics gratuits pe lenghe furlane.
Par aprofondiments cliche chi: Struments
Ti aial plasût chest video? Condividilu cul hashtag #aldipentdite
Quiz
![]()
Il Grant Dizionari Talian Bilengâl talian – furlan (GDBtf) si pues consultâ ancje sul smartphoneVeroFalsoRisposta corretta: Vero
Graciis ae APP, ducj i contignûts dal GDBtf si puedin consultâ in timp reâl ancje su smartphone e tablet, sedi cun sisteme operatîf IOS, sedi cun Android. Discjamâle al è facil e gratuit!
Par scrivi i caratars speciâi o ai di doprâ codiçs complicâtsVeroFalsoRisposta corretta: Falso
La Tastiere Furlane Semplice e je un program facil e gratuit che al permet di scrivi in maniere svelte e corete in lenghe furlane cui acents e cui caratars juscj. Une volte instalât, midiant di une cumbinazion semplice di botons, nol coventarà plui doprâ i codiçs ASCII o inserî ogni volte intal test il simbul specific.
Il Coretôr Ortografic al segnale i erôrs di ortografie e al sugjerìs ancje lis corezionsVeroFalsoRisposta corretta: Vero
Il Coretôr Ortografic Furlan al analize il test, al segnale i erôrs di ortografie mantignint lis formis esatis e al sugjerìs lis corezions di fâ. Al ricognòs plui di 5.000.000 di peraulis furlanis e, fra chestis, lis varietâts principâls e chês ecuivalentis, daûr des regulis de grafie uficiâl. Di là dai singui lemis, al ricognòs dutis lis peraulis che a derivin des flessions des stessis.
-
Percè isal impuartant fevelâ furlan in famee e insegnâlu ai fruts?
I vantaçs di cressi cun plui lenghis
La ricercje sientifiche e à dimostrât che i vantaçs dal bilinguisim a son tancj, e che a son une vore impuartants pal disvilup dal frut. Se esponûts za dai prins mês di vite a plui lenghis, i fruts a disvilupin capacitâts cognitivis e metacognitivis plui altis a pet dai coetanis monolengâi: a son plui creatîfs, plui disponibii, plui atents e a imparin cun plui facilitât altris lenghis.
I beneficis a son tancj stant che il cerviel dai fruts al è plui flessibil e al assimile cun plui facilitât sistemis linguistics diviers.In Friûl ogni frut al à la oportunitât di cressi bi- o plurilengâl in maniere naturâl. Dutis lis lenghis, ancje chês minoritariis tant che il furlan, a rapresentin une ricjece e la oportunitât di sigurâ ai fruts i vantaçs linguistics e cognitîfs dal bilinguisim.
Cjale il video par scuvierzi ducj i vantaçs di cressi cun plui lenghis.
Par aprofondiments cliche chi: Cressi cun plui lenghis.
Ti aial plasût chest video? Condividilu cul hashtag #aldipentdite
Quiz
![]()
Fevelâ a un frut plui lenghis fin dai prins dîs di vite al pues creâ problemis di aprendimentVeroFalsoRisposta corretta: Falso
I studis sientifics a àn dimostrât che il bilinguisim precoç nol cause nissun probleme inte acuisizion dal lengaç. Anzit, i vantaçs cognitîfs e metacognitîfs a son une vore. Imparâ il furlan al jude a imparâ ancje chês altris lenghis.
I beneficis dal bilinguisim sul cerviel a durin fin ae tierce etâtVeroFalsoRisposta corretta: Vero
Fevelâ plui lenghis al jude a restâ zovins: i studis a àn dimostrât che il bi- e il plurilinguisim a intardin i procès di degjenerazion cognitive propris de tierce etât, ritardant il risi di demence e di Alzheimer.
Par insegnâ il furlan a un frut ducj i doi i gjenitôrs a àn di cognossiluVeroFalsoRisposta corretta: Falso
Intal câs là che lu feveli dome un dai doi al bastarà meti in vore il sisteme “une persone, une lenghe”: ogni gjenitôr al fevele al fi simpri intune sole lenghe. Il frut al identifiche cussì la lenghe e la persone e al diferenzie i sistemis linguistics. Chest metodi al è facil di aplicâ, ma al domande tante coerence: lis lenghis no van messedadis!
-
Sielç l'insegnament dal furlan a scuele par to fi
Dâi la possibilitât di cressi bi- o plurilengâl
La ricjece linguistiche dal nestri teritori e ufrìs aes fameis dal Friûl la oportunitât di cressi i lôr fîs bi- o plurilengâi. In graciis des leçs statâls e regjonâls, lis possibilitâts par imparâ la lenghe furlane si son moltiplicadis.
L’insegnament dal furlan al è previodût de Leç statâl 482/99 e de Leç Regjonâl 29/07 intes scuelis de infanzie, intes primariis e intes secondariis di prin grât, cun sede intal teritori dulà che la lenghe furlane e je fevelade di simpri, par almancul 30 oris ad an. L’insegnament dal furlan al jentre intal 20% di autonomie scolastiche, al fâs part duncje dal plan de ufierte formative cence gjavâ oris di lezion a altris materiis.
La Regjon F-VJ e à istituît une liste regjonâl dai insegnants increditâts di dulà che i istitûts scolastics a puedin cjapâ i nons.Cjale il video par scuvierzi ducj i detais sul insegnament dal furlan a scuele.
Par aprofondiments cliche chi:
Cressi cun plui lenghis
Pavee. La magjie dal Furlan
ScueleTi aial plasût chest video? Condividilu cul hashtag #aldipentdite
Quiz
![]()
L’insegnament de lenghe furlane al è sielt de maiorance di gjenitôrsVeroFalsoRisposta corretta: Vero
Lu domande la maiorance dai gjenitôrs residents intai teritoris des trê ex Provinciis di Gurize, Udin e Pordenon. I dâts plui resints dal Ufici Scolastic Regjonâl a fevelin di passe il 76% dai gjenitôrs che al sielç l’insegnament dal furlan a scuele (intes scuelis de infanzie e primariis). Se o calcolìn ancje i arlêfs des scuelis primariis di secont grât, si rive a plui o mancul 38.000 students.
Par sielzi la opzion dal insegnament dal furlan si pues doprâ dome il modul in linie tal moment de iscrizionVeroFalsoRisposta corretta: Falso
Se la opzion no ves di jessi previodude de scuele inte domande in linie, la domande si pues presentâ ancje in forme scrite ae segretarie.
Imparâ il furlan a scuele al facilite l’aprendiment di altris lenghisVeroFalsoRisposta corretta: Vero
I studis sientifics a àn dimostrât che il cerviel nol fâs distinzion fra lenghis plui o mancul utilis, plui o mancul grandis. I vantaçs che a derivin dal bilinguisim a son leâts al aprendiment di dutis lis lenghis, locâls o globâls. Si che duncje, sielzi il furlan a scuele al rapresente une oportunitât par imparâ cun plui facilitât altris lenghis e par incressi lis competencis cognitivis e metacognitivis dai fruts.
ADV
La campagne stampe si è articole sui principâi cuotidians, setemanâls e mensîi in cjarte dal teritori furlanofon, e cun banner cross-device sui portâi di informazion in rêt, dai 30 di Setembar ae metât di Novembar dal 2019.
-
Mostre di plui
Protagoniscj a son i interpretis dal spot video che, in prime persone o in grup, a lancin il messaç “al dipent di me”, “al dipent di te”, “al dipent di nô”, ricuardant al public che ducj nô ogni dì o sin protagoniscj intal fâ vivi la lenghe furlane.
La stesse imagjin de campagne e à personalizât i flancs e il daûr dai autobus urbans e extraurbans che, intal mês di Otubar dal 2019, a àn passât Udin e provincie, lis stazions feroviariis di Udin, Gurize e Pordenon e i ponts di passaç di plui afluence intun centri comerciâl.
SOCIAL MEDIA
La strategjie di social media marketing che e à compagnade dute la campagne ARLeF si è disvilupade su lis plateformis Facebook e Instagram par plui o mancul vot mês (Setembar dal 2019 – Avrîl dal 2020).
-
Mostre di plui
L’obietîf al è chel di invidâ i citadins a scuvierzi la ricjece de lenghe furlane, incentivant il so ûs cuotidian midiant de creazion e de difusion di contignûts smirâts a rinfuarçâ il sintiment di comunitât e di apartignince, e fasint jeve su la responsabilitât individuâl.
Cuntune strategjie che e ponte a consolidâ la presince in rêt de ARLeF e a fâ cognossi i servizis che cheste e ufrìs, a vegnin condividûts contignûts origjinâi che a invidin il public a interagjî. Lis rubrichis tematichis a saltin fûr sul feed cu la frecuence di trê post a setemane e a svariin intai contignûts, spaziant de culture al intratigniment, ae atualitât o a curiositâts dal teritori, cun domandis, zûcs e scandais.
CREDITS
- Mostre di plui Coordenament gjenerâlARLeF-Agjenzie Regjonâl pe Lenghe FurlaneWilliam CisilinoFederica Del PinoConsulence tecniche e traduzionsSportel Regjonâl pe Lenghe FurlaneAdriana CruciattiFederica AngeliConcept e ideazion Campagne,
Motion GraphicAnthesMauro CianiVirginia RuanoSpot Video e RadiofonicKinoglazStudioValentina BizJuri StefanuttiSpot VideoProduzion: Kinoglaz StudioScreenplay e Regjie: Juri Stefanutti, Valentina Biz – KinoglazStudioRipresis aeriis: Mike Tessari – Drone ReportageRegjistrazion audio, Missaç e Mastering: Luca Lenardi – AtracousticDurade: 32’’Lenghis: furlan, talian, inglêsInterpretis (in ordin di aparizion):Benedetta GavaGloria CallegariGiordano BoschiDavide DoloresSilvia NanniIlaria AstiNicola CecottiElena MarchesanKevin MiozzoFabiano FantiniCaterina BernardiGilberto InnocentiTommaso SculinSi ringraciin:Comun di OrsagoPachira Locations, MilanScuele di Musiche
The Groove Factory, MartignàStarmatik SrlStazion Osservative di BasovizzaTeatri Gnûf Giovanni da UdineSpot RadiofonicProduzion: KinoglazStudioSogjet e tescj: Valentina Biz e Juri Stefanutti (KinoglazStudio), William Cisilino (ARLeF)Regjistrazion audio, Missaç e Mastering: Luca Lenardi – AtracousticDurade: 29’’Lenghe: furlanVôs:Virginia CisilinoFabiano FantiniNicoletta OscuroRenato RinaldiMotion GraphicStoryboard e senegjature: AnthesSogjet e tescj: ARLeF e Sportel Regjonâl pe Lenghe FurlaneIlustrazions e grafiche: AnthesAnimazions: Mirko MontiDurade: variabile di 1′ a 1′ e 30″Lenghis: furlan, talian, inglês
