Pavee, la magjie dal furlan

La lenghe furlane e je vêr nudriment pal cerviel. Sielç il furlan, sielzilu ancje a scuele

La gnove campagne promozionâl “Pavee, la magjie dal furlan” de ARLeF e je stade ideade tant che continuazion e disvilup dal progjet “Cressi cun plui lenghis” par promovi il plurilinguisim tai frutins piçui e soredut contâ la lenghe furlane tant che element di ricjece, di scuvierte e di vite.
La campagne e je indreçade a gjenitôrs cun fruts piçui o in etât di scuele che si cjatin devant de sielte de lenghe o des lenghis di insegnâ in maniere direte ai propris fîs o di vê intal percors scolastic.

Il Video promozionâl

Al conte la storie di une frute che e meteve dongje dutis lis peraulis che e scoltave, lis scriveve suntun sfueut e lis catalogave intal so armaron segret. Fin che un dì… la peraule “Pavee”, in maniere magjiche, e à cambiât l'ordin des robis…
Intes imagjins dal video il procès di aprendiment de frute al è rapresentât di un armaron e dai contignidôrs là che e met dentri in maniere ordenade lis gnovis peraulis che e impare.
A man a man che e met dongje peraulis si slargje la sô cognossince e la sô percezion dal mont.
A pene che il sun “Pavee” al rive ae frute i sfueuts a cjapin vite. La metamorfosi des peraulis, che si animin e si trasformin in paveis, e à doi significâts: di une bande e rapresente la vitalitât des lenghis, che a cambiin, si evolvin e a ufrissin gnovis pussibilitâts par rapuartâsi cul mont e cun chei altris; di chê altre bande e rapresente la cressite dal frut, che al rive a un nivel di cognossince e di cussience superiôr.
Lis peraulis - e lis lenghis - no son un concet dome interiôr e astrat ma un strument par capî e comunicâ cun chei altris un element vitâl e magjic pes sôs potenzialitâts incredibilis.

Il spot al vignarà mandât in ducj i cines des provinciis di Udin, Pordenon e Gurize, su Telefriuli e Udin Tv di Novembar dal 2016 a Zenâr dal 2017.
Comitent: ARLeF Agjenzie Regjonâl pe Lenghe Furlane

Campagne realizade di: Anthes
In colaborazion cun: KinoglazStudio
Regjie di Valentina Biz – KinoglazStudio
Sogjet e tescj: Juri Stefanutti - KinoglazStudio
Interpretis: Benedetta Gava, Cristina Piai
Vôs: Fabiano Fantini
Visual FX: Alessandro Anzola
DOP: Juri Stefanutti
Lenghe: talian - furlan
Durade: 30’’
2016
 

Parcè cressi i propris fîs cun plui di une lenghe, ancje chê furlane?

 
Par savênt di plui sui vantaçs cognitîfs e metacognitîfs di une educazion bilengâl o plurilengâl, e par vê indicazions buinis sul argoment, inte sezion “Cressi cun Plui Lenghis” di chest sît o podês cjatâ un vademecum cui “10 bogns motîfs par cressi i fruts cun plui di une lenghe, ancje chê furlane”, une “Vuide pratiche cui conseis dai esperts e lis oportunitâts pai fruts e lis lôr fameis” - che al aprofondìs ancje lis tematichis de scuele - e 30 videoclip sveltis di grande utilitât.


Imparâ il furlan a scuele: une oportunitât preziose

Cemût funzionial l’insegnament de lenghe furlane a scuele? Tropis oris di didatiche sono previodudis pal furlan? Cemût aderî al insegnament de lenghe furlane? A chestis e a tantis altris domandis si pues cjatâ rispueste tal depliant che la Agjenzie Regjonâl pe Lenghe Furlane e à prontât in acuardi cul Ufici Scolastic Regjonâl.

Par plui aprofondiments

Si pues vê plui informazions leint la vuide o cjalant lis video clip te sezion “Cressi cun plui lenghis” di chest sît.

Zire il to dispositîf

Ruota il tuo dispositivo

Rotate your device

Cheste pagjine no si pues viodi cun chest dispositîf

Pagina non disponibile per questo dispositivo

This page is not available on this device