CONFERENCE DI VERIFICHE E DI PROPUESTE PE LENGHE FURLANE (L.R. 29/2007)

Vinars prin di Dicembar dal 2017 - h. 8.30 - Udin - Auditorium de Regjon di vie Sabbadini 31
Sabide ai 2 di Dicembar dal 2017 - h. 9.30 - Udin - Cjistiel, Salon dal Parlament dal Friûl


Jentrade
In atuazion dal art. 30 de L.R. 29/2007 (Normis pe tutele, valorizazion e promozion de lenghe furlane), il President dal Consei regjonâl al clame, almancul une volte ogni cinc agns, e dut câs no plui di sîs mês prime de scjadince de legjislature, une Conference di verifiche e di propueste su la atuazion de leç inerente ae tutele, valorizazion e promozion de lenghe furlane.
Par chest, intai prins mês dal 2017 e je stade costituide une Cabine di regjie cun a cjâf - su mandât dal Ufici di Presidence - il Conseîr Segretari Claudio Violino, che si è dade adun cun cadence mensîl e e je stade daûr aes fasis di ideazion e di coordenament necessariis pe realizazion de Conference.
La Cabine di regjie e je componude dal Conseîr Claudio Violino (assistût dal Segretari gjenerâl dal Consei, Augusto Viola), dal Assessôr regjonâl ae Culture Gianni Torrenti (assistût di funzionaris de Direzion Centrâl Culture), de Assessore regjonâl ae Istruzion Loredana Panariti (assistude di funzionaris de Direzion Centrâl Istruzion), dal Retôr de Universitât dal Friûl Alberto F. De Toni (assistût dal professôr Enrico Peterlunger), de Diretore dal Ufici scolastic regjonâl Alida Misso (assistude de Dirigjente Paola Floreancig), dal President de ARLeF Lorenzo Fabbro (assistût dal Diretôr de ARLeF, William Cisilino) e dal President de Assemblee di comunitât linguistiche furlane Diego Navarria.

Tematichis proponudis
 La Conference regjonâl e à il compit di une bande di valutâ lis ativitâts di tutele e di promozion de lenghe furlane fatis intai ultins cinc agns; di chel altri, di proponi – soredut in viste de aprovazion dal gnûf Plan gjenerâl di politiche linguistiche 2020-2024 – azions gnovis e plui zovevulis pal disvilup de lenghe furlane.

Par chest, l'Ufici di Presidence dal Consei regjonâl, slargjât ai Cjâfs grup, al à decidût di concentrâ il focus des ativitâts de Conference su chestis tematichis:
- Media (radio, television, stampe, audiovisîfs, internet e gnovis tecnologjiis);
- Aministrazion publiche (Aministrazions statâls, regjonâls, locâls);
- Istruzion (scuelis de infanzie, scuelis primariis, scuelis secondariis, Universitât);
- Planificazion linguistiche (cun riferiment particolâr al Plan gjenerâl e ai Plans speciâi di politiche linguistiche).


Il program in struc

PRIME SESSION
Vinars prin di Dicembar dal 2017, Udin (Auditorium de Regjon di vie Sabbadini 31)
 
h. 8.30
Acetazion e regjistrazion partecipants
 
h. 9.00
Salûts des autoritâts
 
h. 10.00
Presentazion di cualchi buine pratiche in Europe
 
h. 11.00
Polse pal cafè
 
h. 11.30
Presentazion des Relazions su la metude in vore de L.R. 29/2007, predisponudis dai Grups di lavôr
 
h. 11.30
La Planificazion des politichis di tutele e di promozion de lenghe furlane
Dibatit
 
h. 12.30
La tutele de lenghe furlane tal setôr de Istruzion
Dibatit
 
h. 13.30
Polse pal Buffet
 
h. 14.30
La tutele de lenghe furlane tal setôr de Aministrazion Publiche
Dibatit
 
h. 15.30
La tutele de lenghe furlane tal setôr dai Media
Dibatit

h. 16.30
Conclusion de prime Session
 
Lenghis di lavôr: furlan, talian, inglês, spagnûl. E je previodude la traduzion simultanie in dutis chestis lenghis.
 
SECONDE SESSION
Sabide ai 2 di Dicembar dal 2017, Udin (Cjistiel, Salon dal Parlament dal Friûl)
 
h. 9.30
Acetazion e regjistrazion dai partecipants
 
h. 10.00
Presentazion des Relazions finâls dai Grups di Lavôr
 
h. 11.00
Conclusions
 
Lenghis di lavôr: furlan, talian. E je previodude la traduzion simultanie.
 
Discjame achì il program detaiât
 

Modalitâts operativis
Intal mês di Lui dal 2017, la Cabie di Regjie e à costituît cuatri Grups di lavôr, un par ogni tematiche individuade, componûts dai puartadôrs principâi di interès dai setôrs cjapâts in considerazion.
Par ogni grup al è stât individuât un coordenadôr, component dal CTS de ARLeF, cul compit di organizâ e di gjestî il lavôr, e ancje di butâ jù une relazion su la tematiche tratade, che e sarà presentade te ocasion de Conference.
I cuatri Grups a àn lavorât lant daûr di un scheme condividût e comun che ur à permetût di elaborâ un cuadri de situazion corinte in merit ae tutele e ae promozion de lenghe furlane, par ognidun dai setôrs analizâts.

I Grups a àn procedût in cheste maniere intes fasis dal lavôr:
- racuelte dâts sui progjets realizâts intai ultins 5 agns par podê fotografâ la situazion gjenerâl;
- analisi aprofondide dai dâts racuelts;
- valutazion des buinis pratichis e des criticitâts par ognidun dai setôrs indagâts;
- comparazion tra lis disposizions di leç e la aplicazion efetive di chês stessis;
- redazion des propuestis operativis pe future ativitât di planificazion linguistiche.

 

Discjame achì la liste dai components dai Grups di Lavôr


Discjame achì la relazion dal Grup di Lavôr Planificazion Linguistiche
Discjame achì la relazion dal Grup di Lavôr Istruzion
Discjame achì la relazion dal Grup di Lavôr Aministrazion Publiche
Discjame achì la relazion dal Grup di Lavôr Media


CJAPE LA PERAULE! Partecipazion ative de Citadinance        
Dai 15 di Novembar dal 2017 a saran disponibilis su chest sît lis Relazions dai Grups di lavôr, par permeti ae citadinance di intervignî intes ativitâts di valutazion e di propueste.
 
Ogni citadin al podarà:
a) partecipâ ae Conference (e je une vore conseade la preiscrizion);
b) domandâ di fâ un intervent dilunc dai lavôrs de Conference dal prin di Dicembar (in chest câs, la preiscrizion e je obligatorie. La peraule e vignarà dade daûr dal ordin cronologjic di iscrizion e par un timp predeterminât, fin che al sarà finît il timp previodût pal dibatit);
c) inviâ propris contribûts scrits – sedi analisis che propuestis concretis – sui argoments tratâts dilunc de Conference.
 
Lis preiscrizions e i eventuâi contribûts scrits a laran comunicâts dentri dai 26 di Novembar dal 2017.

Si pues preiscrivisi:
1. in linie, sul sît www.mdstudiocongressi.com, clicant sul titul dal event e po lant daûr des modalitâts indicadis;
2. vie pueste eletroniche o fax, discjamant dal sît www.mdstudiocongressi.com la schede di iscrizion (che tu cjatis ancje achì sot) e mandantle ae direzion di pueste eletroniche info@mdstudiocongressi.com o al numar di fax 0432.507533;
3. telefonant ae Segretarie organizative al numar 0432.227673

Discjame achì la schede di iscrizion.
 
Par mandâ un propri contribût scrit: info@mdstudiocongressi.com
 
Finide la Session dal prin di Dicembar, i Grups di Lavôr si daran adun di gnûf par scrivi lis Relazions finâls de Conference, che a tignaran cont dal dibatit saltât fûr, de documentazion e des propuestis mandadis dai citadins. Lis Relazions finâls a saran presentadis inte Session dai 2 di Dicembar.

Ai partecipants ae Conference ur vignarà dât l'atestât di partecipazion.
 
La prime zornade de Conference e sarà trasmetude in streaming sul sît www.fvg.tv e sul Canâl 690 dal digjitâl terestri.
 
La Conference e je organizade de ARLeF-Agjenzie Regjonâl pe Lenghe Furlane e de Segretarie Gjenerâl dal Consei Regjonâl dal Friûl-Vignesie Julie.

Zire il to dispositîf

Ruota il tuo dispositivo

Rotate your device

Cheste pagjine no si pues viodi cun chest dispositîf

Pagina non disponibile per questo dispositivo

This page is not available on this device