Suns Edizion 2013

Il GRUP FURLAN AL TRIONFE A MOENA TE CUINTE EDIZION
DAL FESTIVAL DE CJANÇON IN LENGHE MINORITARIE

SUNS 2013: I “LUNA E UN QUARTO” A VINCIN
IL PREMI DAL PUBLIC

La jurie e sielç i sarts ForeFingers Up
Teatri Navalge plen di int pe edizion organizade adun cu la ARLEF

Moena, ai 10 di Novembar dal 2013 – Grant sucès di public pai furlans Luna e un quarto a SUNS 2013, la selezion taliane e alpine dal Liet International, festival internazionâl de cjançon tes lenghis di minorance.
Il grup furlan, di fat, al à vinçût il premi dal public cu la cjançon “Cjale fis e no capìs” te cuinte edizion dal festival che si è davuelte a Moena, in Trentin, te ladine Val di Fassa, sabide ai 9 di Novembar. Intun Teatri Navalge plen di int nûf grups si son contindûts i doi premis in pali, chel dal public e chel de jurie: chest al è lât ai sarts ForeFingers Up cul rap “Sa Luxi ‘Su Soli”.
Coordenât de Provincie autonome di Trent, de associazion culturâl La Grenz di Moena, adun cu la ARLeF - Agjenzie Regjonâl pe Lenghe Furlane e Radio Onde Furlane, il festival al à viodût esibîsi lis formazions che par armoniis sonoris, ricjece tal cjantâ e modernitât espressive a jerin stadis selezionadis jenfri i passe cuarante partecipants al bant di concors.
Al è nassût un viaç musicâl jenfri lis lenghis regjonâls: des atmosferis mediteraniis cu la misture jenfri musiche popolâr e blues dai furlans Luna e un quarto ai energjics rapper sarts ForeFingers Up! A new Balentia's Joint; dal sound tradizionâl-progressist dal grup franco-provençâl 322, inamorât dal patois, ae misture di flamenco, swing, tango e ritmis afro dai catalans Dinatatak; de liriche dai trovadôrs associade al hip-hop dai ocitans Doctors de Trobar al rock dai musiciscj arbërëshe Peppa Marriti Band; dal metal liric dai ladins Phantom ai svuizars di lenghe rumance Tawnee. Fin al zovin grup ladin Cajones, che a àn vuadagnade la partecipazion a SUNS 2013 vincint la selezion locâl organizade in Otubar a Moena de associazion culturâl La Grenz.
Cussì pal secont an di file, il Friûl al puarte a cjase il premi dal public: l’an passât a Udin a vincerin i Jonokognos, chest an ur è tocjât ai Luna e un quarto, che a àn batût par uns vincj vôts il grup di cjase, i Cajones. I Luna e un quarto a son nassûts tal 2009 e a àn za vinçût il Premi Friûl. Te lôr musiche e metin dongje al calôr dai struments acustics ae profonditât di une ghitare eletriche, miscliçant atmosferis mediteraniis, musiche popolâr e sonoritât blues rusinidis. Sul palc dal Navalge, Tomas Vergendo e Jacopo Casadio, compagnâts di Alessio Turco “Balute”, Boris Sciacchitano, Cristian Toneatto “Colete”, Davide Sciacchitano e Sergio Galasso a àn spiegât che il grup al à sielzût chest non cul fin di podê, come che e fâs la lune, incididi in maniere positive sul umôr de int, e che tal specific il toc presentât, cuntun titul che al riclam un mût di dî dut furlan, al è une critiche ae omologazion, ven a stâi, un “imni” aes diferencis, ancje a chês linguistichis des minorancis.
Un grant ringraciament al è stât fat dal grup a Radio Onde Furlane, che cul Premi Friûl e à vût une part impuartante te lôr afermazion e che cu la direte radiofoniche di Moena e à permetût di scoltâ il conciert ancje ai furlans che no àn podût partecipâ di persone.
Il sucès dal grup al festival – al comente il diretôr de ARLEF, William Cisilino – al mostre che la musiche furlane e je plui vive di simpri e e rive a jessi un strument pe difusion de lenghe cetant eficaç e sugjestîf, bon di interpretâ ducj i stimui creatîfs di une gjenerazion che i ten a fevelâ te sô lenghe.
Chest an, pe seconde volte, il festival si è davuelt fûr dal Friûl, daspò de edizion dal 2011 a Falera, tal Cjanton svuizar dai Grisons.
“Al è di cinc agns – al ricuarde Cisilino - che o organizìn chest event musicâl, nassût juste tal 2009 in Friûl par promovi e meti in rêt lis musichis di minorance di Europe, e a ogni edizion o viodìn che il festival al cres in cualitât e par numar di partecipants, slargjantsi ancje a altris areis di minorance. Chest an la colaborazion cu la Provincie autonome di Trent, la Regjon Trentin-Südtirol, l’Istitut Cultural Ladin "Majon di Fascegn", il Comun general de Fascia, la Azienda per il Turismo Val di Fassa, La Usc di Ladins e l’Uniun Ciantauturs Ladins, e je stade otime e e à puartât un alte partecipazion di public”.
Dilunc de serade e à sunât lis Ganes, band cuntun non origjinari de mitologjie alpine che e vevin partecipât ancje ae edizion 2009 di Suns, musicistis de Val Badie che cul lôr repertori ladin a son rivadis ae notorietât internazionâl, soredut tal forest.

Cjalcje achì par vê plui informazions su la serade.

Zire il to dispositîf

Ruota il tuo dispositivo

Rotate your device

Cheste pagjine no si pues viodi cun chest dispositîf

Pagina non disponibile per questo dispositivo

This page is not available on this device