Suns Edizion 2012

La cuarte edizion di Suns Festival de cjançon in lenghe minoritarie, si è davuelte a Udin, là dal Teatri Palamostre, ai 2 di Novembar, aes oris 21.

Lis lenghis minoritaris ametudis al concors son stadis pe Italie il Sart, il Furlan, il Todesc, l’Albanês, il Franc-Provençal, il Francês, l’Ocitan, il Sloven, il Ladin, il Catalan, il Cravuat, il Grico, il Romanì; pe Svuizare il Romanç; pe Austrie il Romanì, il Cravuat, il Sloven, l’Ongjarês, il Cec, il Slovac; pe Francie l’Ocitan, il Franc -Provençal, il Catalan, il Romanì
Ae selezion di cheste edizion a àn partecipât 42 grups rapresentatîfs di vot diferentis lenghis minoritariis, o ben il Furlan, il Cravuat, il Sart, il Ladin, l’Ocitan, il Catalan, il Romanç e il Franc-provençâl.
I finaliscj che a àn vût acès ae fase finâl dal festival a son nûf:

Billy Fumey, cjantautôr che al presentarà il toc “Tot Béloma” in lenghe franc-provençâl;
Casper Nicca, grup rock alternatîf che al cjantarà in lenghe retoromanze dai Grisons (Svuizare) il toc “Hippies”;
Claudia Crabuzza e Claudio Gabriel Sanna, un doi catalan di Alghero che si esibirà cul toc “Qui trista que es la tarda”;
Jean Ruaz, cjantautôr che al presentarà il toc “Perde” in ladin;
Jonokognos, grup rock furlan di Codroip che si esibirà cun “Mai Mai”;
Mig 29 over Disneyland, zovin cuintet punk cjargnel che al presentarà al festival in lenghe furlane “Profitadôrs”;
Randagiu Sardu & Quilo, rapper de Sardegne che al partarà il toc “S’Arrespiru”;
Ruben Dimitri, che al interpretarà il rock pop de minorance cravuate dal Burgenland austriac cul toc “Sunce rijetko sviti”;
Somi de Granadas, grup de Ocitanie francese che al presentarà il toc folk acustic “Tolosa”.

I doi finaliscj proclamâts de jurie e dal public a àn partecipât ae fase finâl dal Liet International, che tal 2012 si è davuelte a Xixón – Gijón tes Asturiis, il prin di Dicembar.
La jurie che e à proclamât i vincidôrs di Suns, festival de cjançon in lenghe minoritarie, e je componude di Andrea Ioime, gjornalist di “Il Friuli” e di “Il Gazzettino”, Luigi Mutarelli, gjornalist di “Rumore” e “Soundveritè”, Onno Falkena, gjornalist de Frisie pe television “Omprop Fryslan” e fondadôr e coordenadôr dal Liet International, e Paolo Cantarutti, gjornalist di Radio Onde Furlane.
Di là di chescj grups, si è esibît fûr concors il grup Orka, grup une vore origjinâl des isulis danesis Far Oer, arcipelac tal Nord dal Ocean Atlantic, jenfri Scozie, Norvegje e Islande, vincidôrs dal Liet International 2009, a rapresentin il sun de lôr tiere e a sunin musiche eletroniche doprant struments che a àn costruît di bessôi.

Zire il to dispositîf

Ruota il tuo dispositivo

Rotate your device

Cheste pagjine no si pues viodi cun chest dispositîf

Pagina non disponibile per questo dispositivo

This page is not available on this device