Liet: grups 2011

Coffeeshock Company (Cravuats – Burgenland austriac)
Origjinaris dal stât plui orientâl de Austrie, i Coffeeshock Company a vuelin mostrâ par mieç de musiche che la lôr lenghe, il cravuat dal Burgenland, e je ancjemò vive. A proponin un mix di rock e reggae, cun fuartis influencis balcanichis.

Manuel Bintinger: vôs
Marco Blascetta: ghitare
Rafael Stern: ghitare
Andreas Karall: batarie
Nikola Zeichmann: bas
Filip Tyran: tastiere

Rezia Ladina (Grisons)
Rezia Ladina e je cressude inte basse Engjadine, val dal cjanton dai Grisons dulà che si fevele une varietât de lenghe Romance. Lis sôs composizions a reclamin aes melodiis tradizionâls di chestis zonis, ancje se filtradis de sô fuarte formazion jazz; i tescj intimiscj di cheste artiste no puedin che jessi scrits inte sô lenghe mari, il vallader.

Rezia Ladina Peer: vôs
Fabio Pinto: ghitare
Andreas Aeberhard: bas
Dominik Chansorn: batarie

Rolffa (Sami)
I Rolffa a rapresentin i Sami de Laponie, la popolazion indigjene plui nordiche de Europe. Te lôr musiche, il joik (cjant tradizionâl sami de Laponie) si messede e si font cui gjenars plui diviers tant che reggae, ska e country.
Tal mês di Març dal 2011 a àn vinçût il preseôs Sami Grand Prix Song Contest, e di consecuence l’acès ae fase finâl dal Liet International.

Ailo Kemi Gjerpe: batarie
Petter Tretnes Hansen: mandulin
Rolf Morten Anti Amundsen: ghitare acustiche
Jan Børre Hansen: bas
Jo Morten Kåven: percussions
Elle Máijá Klefstad Baer: ghitare eletriche

Siroka (Pais Bascs)
A proponin tocs dal rock energjic cuntun messaç sociâl, di denunzie des injustiziis e il desideri di cambiament. Al Liet 2011 a àn presentât il toc Hi Vascofona, gjavât fûr dal lôr ultin disc, un concept album incentrât sui temis de identitât, de amicizie e de libertât.

Ekaitz Agirregoitia: ghitare
Maria Rivero: vôs
Gorka Chamorro: batarie
Pedro Melgarejo: bas

Skama La Rede (Asturiis)
Il grup Skama La Rede al è nassût tal 2003 tes Asturiis, dulà che al à cjapât sù in vot agns di ativitât cetancj ricognossiments pal so ska-punk insiorât di folk, rock e reggae, une musiche che e pant messaç impegnâts e analisi sociâl.

Miguel Fernandi: vôs
David Suárez: ghitare
Alfonso Sánchez: bas
David Artime: tescj
Fernando Ortiz: trombe
Alejandro Vega: cuarnamuse
Eduardo Fernández Estrada: ghitare

Cuntra Löm (Ladinie)
Cuntra Löm al nas tal 2010, componût di une dozene di zovins musiciscj origjinaris de Val Badie (Alto Adige/Südtirol). Al Liet International a àn presentât la cjançon La Moncignosa, che e à vinçût il premi dal public te edizion 2011 dal festival Suns, in Svuizare.

Florian Valentin: percussions
Matthias Moling: percussions
Armin Moling: bas
Maria Kostner: pianoforte
Stefan Piccolruaz: tastieris
Michael Clara: ghitare
Elisa Obwegs: violin
Angela Palfrader: violin
Anita Obwegs: vôs
Johanna Dapoz: vôs
Anna Obwegs: vôs
Macanta (Scozie)
Macanta al è un grup di Glasgow che al cjape dentri musiciscj che a rivin di ducj i cjantons de Scozie. Compagnâts di ghitare, liron, viole, arpe celtiche, batarie e mandulin a cjantin tocs scrits par gaelic e inglês di Dòl Eoin, origjinari de Isule di Harris.

Dòl Eoin: ghitare, vôs
Dinushriya Spybey: violoncel, vôs
Sarah Leonard: viole, vôs
Terry Balfour: bas, vôs
Mairi Campbell: arpe celtiche, vôs
Graeme Smith: batarie

Aoife Scott (Irlande)
Aoife Scott e rive di une famee mitiche di musiciscj irlandês, la famee Black. La vôs di Aoife, a moments dolce e subit dopo plene di fuarce, e je stade daurman notade te sô Irlande, dulà che, daspò di agns di maraveosis colaborazions, al è pront par jessî il so prin album.

Aoife Scott: vôs
Eoghan Scott: ghitare
Conor Lyons: bodhrán
Dara O Broin: violin
Garvan Gallagher: liron
Wayne Sheehy: percussions

Noid (Karelia)
I Noid a son un grup de Carelie, une regjon ugrofiniche de Russie; il lôr non al ûl dî “mâc/maghe” te lenghe dai Veps. Il sound di chest grup al è caraterizât di une union inmagante di cjançons tradizionâls Vepsianis e rangjaments modernis.

Vladimir Solovjev: armoniche
Aleksander Shashin: bas
Alina Kartynen: vôs
Sergey Smirnov: batarie

Priska (Friuli)
Priska e je stade la rapresentante furlane al Liet International 2011. Musiciste e cjantautore, diplomade in ghitare classiche, e cjante par francês, talian, furlan. Cu la sô musiche sugjestive, rafinade e nostalgjiche, regjistrade in doi album cetant preseâts de critiche, Priska e fâs onôr ae siore tradizion dal cjantautorât furlan.

Priska: vôs
Giorgio Morsut: bas
Stefano Bragagnolo: batarie
Lucia Clonfero: violin
Paolo Paron: ghitare acustiche
Alan Malusà Magno: ghitare eletriche

Silent Woo Gore (Republiche Udmurte)
Il non Silent Woo Gore (cjançon cuiete de aghe) al è un miscliç di inglês e lenghe udmurte (Republiche Uraliche tal cûr de Russie) e al mostre in maniere une vore clare la union dai sunôrs globâi e des melodiis tradizionâls rapresentadis di chest grup. I Silent Woo Gore a van daûr de evoluzion culturâl e de internazionalizazion de societât dulà che a vivin cence dismenteâ lis lôr lidrîs.

Grigory Stepanov: batarie
Vladimir Zhyikov: ghitare
Svetlana Ruchkina: vôs
Anatoliy Balikhanov: bas

Janna Eijer (Frisie)
Cheste zovine artiste frisone e je pardabon ecletiche: daspò di vê studiât piano e cjant classic, cumò e insegne bal, e cjante e si ocupe di recitazion teatrâl e di coreografie. Al Liet e a presentât la sô cjançon 1 Klap (un respîr), che e à vinçût il prin premi.

Janna Eijer: piano, vôs

Zire il to dispositîf

Ruota il tuo dispositivo

Rotate your device

Cheste pagjine no si pues viodi cun chest dispositîf

Pagina non disponibile per questo dispositivo

This page is not available on this device