Descrizion
SUNS, Festival de cjançon in lenghe minoritarie, al nas a Udin tal 2009, prudelât de ARLeF, in colaborazion cu la Provincie di Udin, il Comun di Udin, lis cooperativis Il Campo e Informazione Friulana. Creât tant che festival itinerant, un puint ideâl jenfri la musiche des minorancis linguistichis storichis dal teritori.
Al fâs part dal circuit musicâl che al zire ator dal Liet International, il festival european di riferiment pe musiche in lenghe minoritarie.
Lis primis dôs edizions si son davueltis a Udin, invezit tal 2011 e tal 2013, viodûts i otims risultâts des primis dôs, il festival si è davuelt fûr dal Friûl, in Svuizare, a Falera tai Grisons e in Val di Fasse, a Moena.

Suns si conferme un dai events musicâi di plui grant interès, come che e dimostre la grande partecipazion di artiscj che e cres in maniere costante an daspò an.

La finâl 2014 di Suns si è davuelte al Teatri Palamostre di Udin ai 15 di Novembar. A àn sunât sul palc 8 grups in rappresentance des minorancis furlane, sarde, ocitane, ladine, cravuate, francoprovenzâl e rumance. La vincidore de edizion 2014 e je stade la zovine cjantautore ladine Martina Iori, ai sarts Sa Ratapignata invezit, ur è stade dade une menzion speciâl pe miôr performance live. Ospits speciâi i ForeFingers Up, vincidôrs dee edizion 2013.

La finâl 2013 di Suns si è davuelte al Teatro Navalge di Moena (Tn), in Val di Fasse, ai 9 Novembar. Al bant di concors a àn rispuindût 37 artiscj in rapresentance di 9 minorancis linguistichis talianis e dal arc alpin: 3 i rapresentants de minorance franco-provenzâl, 1 arbrëshe, 2 catalans, 4 ocitans, 2 rumançs, 1 sinti, 6 sarts, 5 furlans e fintremai 13 ladins. La cuinte edizion di Suns le àn vinçude i sarts ForeFingers Up (premi de jurie) e i furlans Luna e un quarto (premi dal public).

La finâl 2012 de cuarte edizion di Suns, si è davuelte a Udin ai 2 di Novembar. A cheste selezion a àn partecipât 42 grups representatîfs di vot diferentis lenghis minoritariis, o ben il furlan, il cravuat dal Burgenland, il sart, il ladin, l'ocitan, il catalan, il romanç e il franc - provençâl. I finaliscj furlans di cheste edizion a son stâts il grup rock codroipês Jonokognos e il cuintet punk cjargnel Mig 29 over Disneyland. Vincidôrs de edizion 2012 a son stâts Claudia Carabuzza e Claudio Gabriel Sanna, catalans di L'Alguer, e i furlans Jonokognos che a àn partecipât al Liet International a Gijón/Xixón (Asturiis).
Pe edizion 2011, davuelte a Falera, in Svuizare, a àn partecipàt 47 cjançons cjantadis in 12 lenghis diviersis: arbëreshë, cors, cravuat (molisan e dal Burgenland), ocitan, retoromanç, ladin, sart (tes varietâts galurese e campidanese), sloven (carinzian e bencian), e furlan. Vincidôrs di cheste edizion a son stâts i grups Coffeeschock Company, Cuntra Löm e Rezia Ladina, che a àn partecipât ae finâl dal Liet International a Udin.

Pe edizion 2010, invezit, a àn partecipât al bant 34 artiscj, lis minorancis rapresentadis a son stadis 8: cors, cravuat, ocitan, retoromanç, ladin, sart, sloven (carinzian e benecian) e furlan. Ta cheste edizion i furlans R esistence in dub, a àn partecipât ae finâl dal Liet International a Lorient (Bretagne) dulà che a àn vinçût il premi dal public.

Te edizion 2009 i artiscj partecipants a son stâts 23, rapresentants di 10 minorancis diviersis, ocitan, retoromanç, ladin , arbëreshë, sart, catalan, sloven (carinzian e benecian), romanì e furlan. Daspò di cheste edizion i doi vincidôrs, Dr Drer & CRC Posse de Sardegne e Lino Straulino dal Friûl, a àn partecipât ae finâl dal Liet International a Ljouvert (Frisie), rivant rispetivamentri al secont e al tierç puest.