Suns Europe 2017

Il vincidôr de edizion 2017 di SUNS Europe al è Tumasch è, dal Cjanton dai Grisons, Svuizare.
Tumasch è al à cjantât e sunât in maniere dolce, creant une vere a proprie magjie. I siei mots a son stâts piçui e sempliçs, ma dome ae aparence, parcè che la sô musiche e scuint alc di gjeniâl. Al è stât propit chest a convinci i zurâts a adiudicâi il prin puest. A determinâ il vincidôr no je stade la sole jurie tecniche, ma ancje chê 'popolâr' rapresentade dal public in sale: 'Tumasch è' al à vût di fat une grampe di vôts in mancul di Isa Zwart (Provincie di Drenthe, Paîs Bas), la preferide dal public.
Secont puest par La Basu (Paîs Basc): la sô e je stade une esibizion vivarose, il so toc une cumbinazion interessante di stîi.
Tierç puest par i Ebel Elektrik (Bretagne), une band tant energjiche, che e à puartât sul palc dal Teatri une ghitare ecelente.
 

Chest an Suns Europe al sarà eletropop e rock&roll, ma ancje rap, indie rock, percussions eletronichis e cetant ancjemò, parcè che Suns nol è dome musiche. Ta chescj dîs si à completât il cuadri dai ospits des trê zornadis (dai 30 di Novembar ai 2 di Dicembar) e, dongje dai ‘parons di cjase’ dal Friûl, si varan grups, regjiscj, scritôrs e atôrs che a rivin di Paîs Basc, Gales, Cjanton dai Grisons, Bretagne, Galizie, Paîs Catalans, ma ancje de tiere dai Sami, de Sardegne e de Buriazie (logade dongje de Mongolie).
 
Art, miscliçaments, snait, pluralisim linguistic, creativitât
Cemût che al sucêt di trê agns incà, Suns Europe al sarà un confront tra lenghis cuntune storie antighe e formis di comunicazion contemporaniis. Un Festival fat di art, miscliçaments, snait, pluralisim linguistic, creativitât. L’apontament al è simpri alì dal Teatri Gnûf “Giovanni da Udine” (ma no dome) dulà che a saran protagoniscj musiche, cine, teatri e leterature intes lenghis minoritariis de Europe.
«Cun Suns Europe il Friûl si ricognòs e si confronte, valorizant la proprie ricjece culturâl e linguistiche, cun chei altris teritoris che a componin il grant mosaic de Europe “unide inte diversitât”. La sene di chest Festival e cjape dentri tancj artiscj e un public internazionâl, zovin, curiôs e creatîf che al scuvierç di condividi une identitât salde ma vierte, e la volontât di doprâ lis propriis lenghis intune otiche di scambi, creativitât e modernitât. Dopo il sucès des edizions passadis, e je une grande spiete par chest tierç apontament che si davuelzarà intes stessis zornadis de Conference di valutazion su la tutele de lenghe furlane, organizade de Regjon. Ai ospits internazionâi, invidâts pe ocasion a fâ cognossi cualchi buine pratiche, o varìn dal sigûr il plasê di presentâur il nestri Suns, event za ricognossût intal so gjenar tant che ecelence a nivel european», al marche il president de ARLeF, Lorenzo Fabbro.
 
Il plui impuartant Festival european di cheste sorte
Ancje tal 2017 Suns Europe si conferme tant che il principâl Festival european che al conte e al fâs cognossi a ducj lis lenghis minorizadis e par chest al gjolt, pe tierce edizion, dal patrocini dal Consei de Europe. L’intindiment al è chel di promovi produzions artistichis origjinâls di cualitât e di mostrâ cemût che la diversitât linguistiche de Europe, in plui di jessi une ricjece culturâl e un dirit di fonde, e je une risorse creative impuartantone. Disinis di artiscj a rivaran cussì a Udin par dâi vite a di une vere Babêl di lenghis, di suns e di miscliçaments di no pierdi, e par cjapâ dentri i furlans intai tancj apontaments dal program. La manifestazion si sierarà cu la serade-event che si tignarà tal Teatron di Udin, sabide ai 2 di Dicembar, a partî di 9 di sere.
 
I protagoniscj de sezion Musiche
Cemût che al sa benon il public afezionât dal Festival (che al à tant che diretôr artistic Leo Virgili) lis zornadis penzis di apontaments de manifestazion si sieraran cul concierton che, chest an, al sarà presentât di Natalie Fella e di Michele Polo. Sul palc dal Teatri Gnûf Giovanni da Udine a sunaran vot tra grups e soliscj: La Basu (Paîs Basc), Adwaith (Gales), Tumasch è (Cjanton dai Grisons), Isa Zwart (Provincie di Drenthe, Paîs Bas), Esposa (Galizie), Franco Giordani (Friûl), Joana Gomila Folk Souvenir (Paîs Catalans), Ebel Elektrik (Bretagne). Dongje di lôr a saran ancje doi ospits, Namgar (Buriazie, tiere logade ad ôr de Mongolie) e Gruff Rhys (Gales). La musiche e sarà la protagoniste cun La Basu e Adwaith ancje de fieste di viertidure in program al Rock Club 60 (vie Marconi 24, Udin) ai 30 di Novembar, di nûf e mieze di sere indenant. Ducj i dîs dal Festival, cun di plui, si varà ancjemò musiche cui aperitîfs cun dj set in program alì dal Mamm (slarc del Teatro 2).
 
Cemût vignî a viodi la serade finâl        
Pal concierton finâl, i biliets a son disponibii dai 21 di Novembar al public alì di Radio Onde Furlane, a La Girada e alì dal Angolo della Musica intai oraris di viertidure. Dai 24 di Novembar si ju cjate ancje alì de bilietarie dal Teatri Gnûf Giovanni da Udine. No si pues ritirâ plui di 4 biliets parom.
 
I nons dai partecipants pal Cine e pe Leterature
Suns Europe però nol è dome musiche, ma ancje cine e leterature. Intal foyer dal Teatron si viodarà il curt ‘The Hunter’ (Maori) di Richard Turner, un altri curtmetraç al è chel dal regjist Egil Pedersen (Sápmi) che al à non ‘Ealli Guodda Joavkkus’, intant che la Sardegne e je rapresentade dal lavôr di Andrea Zuliani, ‘Per Anna’. Al sarà proietât ancje ‘Int Art’ (Friûl) di Dorino Minigutti e Giorgio Cantoni, e Neka (Innu) curtmetraç di Nemnemiss McKenzie. Si clame invezit Separado (Gales) il luncmetraç di Gruff Rhys. Protagonist di une serade speciâl (il prin di Dicembar, a nûf di sere, cun jentrade libare fin che a son puescj) te sale principâl dal Teatri al sarà invezit Missus, l’ultin lavôr di Massimo Garlatti Costa (in prime regjonâl) che al conte la lote dai predis di Glesie Furlane par tignî vive la flame dal furlan. Pe leterature al è in program l’incuintri cui vincidôrs dal Premi S. Simon 2017. A son po previodûts aprofondiments tant che chel dedicât ae iniziative europeane pai dirits linguistics ‘Minority Safepack’ e Scuele Europe, là che musiciscj e artiscj di dute Europe a incuintrin i students furlans.
 
Di cui che al è inmaneât il Festival
Suns Europe al è un progjet inmaneât des cooperativis Informazione Friulana (editore di Radio Onde Furlane) e Puntozero cu la poie de ARLeF (Agjenzie Regjonâl pe Lenghe Furlane), de Regjon Friûl – Vignesie Julie e de Fondazion Friuli, cu la colaborazion dal Comun di Udin, de Fondazion Teatro Nuovo Giovanni da Udine, dal Babel Film Festival e cul patrocini dal Consei de Europe.
 

Ilustrazion Suns Europe 2017 di Marta Zanello.

Discjame achì il program complet dal festival.

Par vê plui informazions:
www.sunseurope.com
info@sunseurope.org
Pagjine Facebook

Zire il to dispositîf

Ruota il tuo dispositivo

Rotate your device

Cheste pagjine no si pues viodi cun chest dispositîf

Pagina non disponibile per questo dispositivo

This page is not available on this device