Suns Europe 2016

SUNS EUROPE 2016: al grup STESO, des isulis Fær Øer, i premis de jurie; a  VERONIKA USHOLIK, de regjon russe Čukotka,il premi dal public.

Suns Europe 2016
si è riconfermât tant che il festival plui impuartant des arts in lenghe minoritarie, un moment straordenari di contaminazion culturâl e linguistiche, di nivel artistic cetant alt. Tai trê dîs si è alternât un program fis di musiche, leterature, teatri e cines, cuntun public che i à stât tant daûr e che al à jemplât, in maniere leterâl, il Teatri Giovanni da Udine.
Teatri al complet ancje pe emozionante serade conclusive dal festival, che al à viodût a dâsi la volte sul palc 10 grups che a àn cjantât in ancjetantis lenghis minoritariis di Europe.

«Pes vôs uçadis tant che rasôrs, epûr dolcis e ispiradis. Pai sunôrs profonts tant che oceans e pes atmosferis lontanis. Pal calôr che a àn puartât a Udin des lôr tieris dal Nord», il grup STESO des isulis Fær Øer, cun sonoritâts svoladiis e ipnotichis dal Nord profont, al à vinçût il Premi de jurie di Suns Europe 2016. La jurie popolâr e à assegnât invezit la sô preference  a VERONIKA USHOILIK (Čukotka), la fantate de vôs dorade. Al secont puest si è cualificât invezit GURUDE (Khakassia), che si ispire in maniere creative al cjant armonic de tradizion siberiane, e al tierç puest il grup BERDON (Ladinie).
 
Dilunc de serade finâl a son stâts conferîts ancje il ricognossiment pe Sezion Cine lât a Sume - Mumisitsinerup nipaà di Inuk Silis Høegh  (Groenlande)  - che al conte in lenghe Inuit une esperience umane specifiche e une fase tant impuartante de storie contemporanie de Groenlande – e, pe Sezion Leterature, al scritôr Xavi Sarrià (Paîs Catalans).
 
Dal prin fin ai 3 di Dicembar dal 2016 SUNS Europe, il Festival European des Arts in Lenghe Minorizade, al fasarà di gnûf di Udin il cûr de Europe de creativitât e de diversitât linguistiche e culturâl.
Suns Europe al premiarà lis miôr produzions intes lenghis minoritariis dal continent e al puartarà in Friûl espressions musicâls, leterariis e audiovisivis de Europe, che e je une e plurâl e che e vûl jessi unide pardabon inte diversitât. E sarà une ocasion di incuintri e confront tra individuis, grups, lenghis, teritoris e comunitâts, di minorancis e nazionalitâts de Europe, che a tirin fûr la lenghe e a contin di se e dal mont viodût dal lôr pont di viste. Suns, visions, peraulis, ideis, espressions di identitâts esistentis e resistentis.
Ancje chest an SUNS Europe al à chê di meti in rêt individuis e entitâts associativis e istituzionâls che a son la espression des diviersis comunitâts di lenghe minorizade, a tacâ dal Mediterani fin al Pôl e dal Atlantic ai Urâi. La atenzion e sarà ator de musiche, su lis produzions pal piçul e il grant schermi e su lis oparis là che la protagoniste principâl e sarà la peraule scrite e recitade, tra narative, poesie e teatri.
Une schirie di events coerents cu la identitât di SUNS Europe, che al è un festival cence un lûc fis e itinerant, a son in program inaltrò in Europe e a anticipin la grande manifestazion di Dicembar. Tra chescj events e je previodude la rassegne dedicade ae cjançon intes lenghis di minorance de Europe alpine e mediteranie, nassude a Udin intal 2009, e deventade une sorte di preselezion regjonâl pe sezion musicâl di SUNS Europe che chest an si davuelzarà ai 19 di Novembar in Trentin, inte ladine Val di Fasse, e si clamarà Suns Ladinie
SUNS Europe, nassût cu la poie de ARLeF, il coordenament de Cooperative di Informazion Furlane e la colaborazion di une schirie di subiets privâts e publics dal Friûl e di altris regjons di Europe, tacant de cooperative Punto Zero, dal Comun di Udin e dal Teatri Gnûf Zuan di Udin, al à vût il patrocini dal Consei di Europe e il bol EFFE, certificât di cualitât pai festivai europeans dât de EFA, la Associazion Europeane dai Festivai.

Discjame achì il program complet dal festival

Par vê plui informazions:
www.sunseurope.com
info@sunseurope.org
Pagjine Facebook

Zire il to dispositîf

Ruota il tuo dispositivo

Rotate your device

Cheste pagjine no si pues viodi cun chest dispositîf

Pagina non disponibile per questo dispositivo

This page is not available on this device