Suns Edizion 2014

SUNS 2014, e vinç Martina Iori.

Serade di musichis “fuartis” e di lenghis vivis.
 
Une sabide speciâl là che la diversitât linguistiche e la creativitât musicâl a son stadis protagonistis. Suns 2014, il Festival de cjançon in lenghe minoritarie, che si à tignût nossere a Udin, al à mantignût lis promessis in tiermins di partecipazion e di cualitât, intune clime di fieste.
La rassegne inmaneade di Radio Onde Furlane e dal Progjet Suns cul jutori de ARLeF (Agjenzie Regjonâl pe Lenghe Furlane) e cu la colaborazion di altris sogjets publics e privâts, e à rivât a intivâle juste sei te valorizazion de creativitât musicâl tes lenghis di minorance de Europe alpine e mediteranie che te promozion, cu la musiche, di chês stessis lenghis, tant che un patrimoni culturâl, un dirit di fonde e une oportunitât in tancj sens.
 
Tra i vot grups o soliscj in concors, la vitorie e je stade concuistade de bande de zovine cjantautore de Val di Fasse di Martina Iori. Cu la sô cjançon par ladin 'Via con mia musega' e à a colpît lis orelis, il cûr e il cerviel di dut il public e de jurie, che e à preseât la sô vôs frescje e elegante, la sô grande spontanitât e la sô capacitât stilistiche e emozionâl e i à dat il premi che le puartarà a presentâ il so toc ancje a Oldenburg, inte finâl continentâl dal Liet International, ai 12 di Dicembar.
Jurie e platee si à an cjatât in cunvigne ancje in cont de segnalazion pe miôr performance live, che e je lade cun merit ai sarts Ratapignata, pe lôr tignude dal palc cun snait e cun energjie, daûr di une esperience medressude in passe cuindis agns di ativitât. A àn plasût ancje il rumanç Pascal Gamboni, autôr ispirât e cjantant cun personalitât, la furlane Elsa Martin, che cun Marco Bianchi e à ufiet une buine prove cun 'Cjante', e Billy Fumey, cul so cjantâ passionât tal francoprovençâl de Franche Comté. Ironie e energjie a àn marcât lis esibizions dai ocitans Lou Tapage, dai furlans Aldo Sbadiglio e la famiglia Ananas in vacanza a Dresda e dai Kroatarantata, grup che al rive de minorance linguistiche cravuate dal Molîs.
 
La serade si à vierte cuntun moment plen di emozion, in chel istès un riferiment ae tradizion furlane e un omaç aes lidrîs dal hip hop «par furlan»: scûr in sale, vôs dal public che a tachin a cjantâ 'La ligrie e ven di zovins', lûs sul palc e  aparazion a colp dai rappers Passion e Tubet. I doi, che a son stâts inte storiche DLH Posse,a àn tacât a tirâ fûr une svintule di rimis sui argoments de manifestazion – la lenghe proprie e l'ûs de lenghe cence prejudizis, libar e liberatori – cul jutori de sezion ritmiche dai sarts Forefingers Up!. La band de Sardegne, erêt direte de esperience dai Balentia, che a son stâts tra i pionîrs dal hip hop par sart, te ultime part de manifestazion, e à fat un conciert bielonon. La serade si à zovade de conduzion dinamiche e ritmade dai Cjastrons, tra gags, intervistis e improvisazions.
 
«E je stade une serade memorabile – al è il coment dal president de ARLeF, Lorenzo Fabbro  – che e conferme di une bande che la musiche e je in stât di dâur valôr aes lenghis minoritariis, soredut tra i zovins, e di chê altre che lenghis e creativitât a son une pussibilitât privilegjade che al à il Friûl par vê a ce fâ cul mont. Dal 2009 al dì di vuê Suns al à vût une maturazion continue sei sul plan artistic che par ce che al tocje la organizazion. In chescj agns   Onde Furlane e à fat un lavoron in ducj i doi i cjamps, cu la discuvierte e la formazion di talents e professionalitâts e cu la creazion di contats e relazions cun dute la Europe».
 
Un esempli di chestis rêts e je stade ancje la trasmission in direte dal event dal Palamostre, difondude no dome su lis frecuencis de «radio libare dai furlans» e sul sît internet www.ondefurlane.eu, ma ancje cu la web tv sarde Eja Tv, www.ejatv.com.
 
Chel stes ategjament al è la fonde dal event speciâl di domenie ai 16 di Novembar al Palamostre. Cun di fat il conciert di Loris Vescovo, che al à presentât dal vîf il so cd plui resint Penisolâti, vincidôr che al è pôc de 'Targa Tenco', al è stât inmaneât in gracie de colaborazion tra Progjet Suns e Euritmica e tra Suns, Musiche* e Note Nuove.

Zire il to dispositîf

Ruota il tuo dispositivo

Rotate your device

Cheste pagjine no si pues viodi cun chest dispositîf

Pagina non disponibile per questo dispositivo

This page is not available on this device