Descrizion

Suns Europe al è il principâl festival european des arts performativis in lenghe minoritarie. Al gjolt dal Patrocini dal Consei de Europe parcè che al promôf produzions artistichis ricercjadis e origjinâls, mostrant cemût che la diversitât linguistiche in Europe, di là di jessi une ricjece culturâl e un dirit fondamentâl, e sedi ancje une risorse creative inestimabile.

La storie di SUNS Europe e tache intal 2009, a Udin, cu la nassite di SUNS, il Festival de cjançon in lenghe minoritarie. La iniziative – che e jentrave intal circuit musicâl di Liet International (il festival european di riferiment su la musiche in lenghe minoritarie) -  si è distinte tant che un tra i events musicâi di plui sucès, un puint ideâl tra lis minorancis linguistichis storichis dal teritori european.
Lis primis dôs edizions di SUNS a son stadis fatis a Udin par dopo davuelzisi, intal 2011 e intal 2013, in Svuizare a Falera, e in Val di Fasse a Moena, e po tornâ a Udin, intal 2014.

Dal 2015, SUNS al è evolût in SUNS Europe. Di chê volte, Udin al ospite ogni an il festival plui impuartant e articolât des arts performativis in lenghe minoritarie, siôr di apontaments che a van de musiche, al cine, de leterature al teatri.

SUNS Europe al presente lis miôr produzions culturâls intes lenghis minoritariis di Europe, mostrant la vivarosetât e la cualitât dai prodots artistics. Al è un Festival fat di art, contaminazion, talent, pluralisim linguistic, modernitât e creativitât, che al incjarne in maniere tangjibile il sproc de Union Europeane “unîts inte diversitât”. Al cjape dentri centenârs di artiscj e un public internazionâl simpri plui numerôs, zovin e curiôs, che al scuvierç di condividi une identitât salde ma vierte, e la volontât di doprâ lis propriis lenghis intune otiche di scambi, creativitât e modernitât.

Al bant di Suns Europe a rispuindin ogni an une vore di artiscj. Sielzi i finaliscj e je è simpri une sfide grivie, a dimostrazion di cetant che la sene artistiche in lenghe minoritarie e sedi ative e produtive.

Suns Europe al gjolt de poie de ARLeF e de Regjon Friûl-Vignesie Julie. Al è un progjet realizât des cooperativis Informazione Friulana e Puntozero e si zove de colaborazion preziose dal Comun di Udin e di une lungje serie di altris sogjets publics e privâts.

Zire il to dispositîf

Ruota il tuo dispositivo

Rotate your device

Cheste pagjine no si pues viodi cun chest dispositîf

Pagina non disponibile per questo dispositivo

This page is not available on this device