AI 20 di Avrîl dal 2015 Zornade formative “99 PERAULIS PAR FEVELÂ CUL MONT”

L’Assessorât pe istruzion de Regjon Friûl Vignesie Julie adun cu la Agjenzie Regjonâl pe Lenghe Furlane e in colaborazion cul Ufici Scolastic Regjonâl e la Universitât dal Friûl a organizin un gnûf moment formatîf pai insegnants iscrits te liste regjonâl pal insegnament de lenghe furlane lunis ai 20 di Avrîl dal 2015 des 16.00 aes 19.00, li dal Auditorium de Regjon in vie Sabbadini a Udin, par presentâ l’ultin materiâl didatic plurilengâl sostignût de ARLeF e realizât di Silvana Schiavi Fachin cu la cjase editore Futura: 99 PERAULIS_Fevelâ cul mont_parlare col mondo_talking to the world.
Te ocasion al vignarà presentât il gnûf Cors di perfezionament e di inzornament pai insegnants di lenghe furlane “Lenghe furlane te scuele plurilengâl_Lingua friulana nella scuola plurilingue” inmaneât de Universitât dal Friûl cu la poie de Regjon F.V.J.
In presince de Assessore regjonâl pe istruzion Loredana Panariti, dal delegât dal Retôr de Universitât dal Friûl Enrico Peterlunger, de Ispetore dal Ufici Scolastic Regjonâl Paola Floreancig e dal President de Agjenzie Regjonâl pe Lenghe Furlane Lorenzo Fabbro, si fasarà il pont sui disvilups e lis voris inviadis a pro dal insegnament dal furlan a scuele, de formazion pai insegnants e dal lôr ricognossiment professionâl e formatîf.
A ducj i partecipants, a conclusion de zornade, al vignarà dât l’Atestât di frecuence, une copie di 99 Peraulis_Fevelâ cul Mont e altris materiâi didatics e informatîfs.
Par partecipâ si à di iscrivisi confermant la presince dentri di joibe ai 16 di Avrîl (specificant non, cognon e numar di telefon) a cheste direzion: arlef@regione.fvg.it
Tal câs che dopo la scjadince des iscrizions a sedin ancjemò puescj disponibii, la Arlef e fasarà buinis ancje lis iscrizions rivadis dopo la date ultime. In ogni câs ducj i iscrits a varan une mail di conferme te stesse direzion che a àn mandade la note di iscrizion.
***
99 PERAULIS: Fevelâ cul mont, Parlare col mondo, Talking to the world, editât di Futura Edizioni e realizât di Silvana Schiavi Fachin cul jutori de ARLeF al è un strument didatic in forme di scjatule, cun 99 cjartis di zûc e ancjetantis peraulis dissegnadis dai fantats dal Centri Diurni Punto Zero cu la colaborazion de ilustradore Patrizia Geremia. 99 Peraulis al promôf la educazion pluriculturâl e interculturâl tant che fonde di un percors educatîf plurilengâl e al è pensât par judâ i frutins e i fantats des nestris scuelis a cressi cence prejudizis e stereotips, ma ancje braurôs dai valôrs alts de lôr tradizion storiche e culturâl. Lis peraulis, i proverbis, lis cjançons… a son declinâts in 15 lenghis: cun di fat l’obietîf didatic al è chel di puartâ i fruts de scuele de infanzie e primarie, in maniere divertente, ae discuvierte graduâl des analogjiis e des diferencis che a esistin fra lis diferentis visions dal mont, i diviers compuartaments, lis crodincis e lis opinions dai popui de Tiere e a ricognossi lis corispondencis o lis diferencis che a esistin jenfri i elements lessicâi che lis lenghis a doprin par pandi la diversitât culturâl e di pinsîr. L’ûs didatic dal zûc al pues partî dai dissens par scuvierzi ce che i fruts a san za su lis robis o su lis ilustrazions, lassantjur che a fevelin te lenghe che a cognossin miôr: par furlan o talian, ma ancje doprant chê altris lenghis che a fevelin a cjase (par esempli un dialet locâl o di une altre regjon, une altre lenghe dal teritori tant che il sloven o il todesc) o une des lenghis de gnove imigrazion (l’albanês, il cravuat, il rumen).
Te zornade di lunis ai 20 di Avrîl il materiâl al vignarà presentât de autore Silvana Schiavi Fachin proponint diferentis modalitâts di ûs didatic.
***
LENGHE FURLANE TE SCUELE PLURILENGÂL: cors di perfezionament e di inzornament par insegnants: Il cors universitari, inmaneât de Universitât dal Friûl pal a.a. 2014/2015 al tacarà cul prin incuintri joibe ai 14 di Mai e si sierarà tal mês di Dicembar dal 2015: Il cors si disvilupe tai dopodismisdìs, cun impegns diferenziâts vie pal an, e al previôt 300 oris di formazion dividudis in lezions, laboratoris, seminaris e elaborât finâl par un totâl di 30 credits formatîfs. La scjadince pes iscrizions e je ai 07 di Mai dal 2015.
Te zornade dai 20 al vignarà distribuît materiâl informatîf specific e presentât il cors tai detais dal Diretôr dal cors. Mauro Pascolini

Par informazions:
Arlef_Agjenzie Regjonâl pe Lenghe Furlane
Vie Prefeture 13 – 33100 Udin
Tel .0432 555812
arlef@regione.fvg.it
www.arlef.it