+sKlet/XtremeTV su Rai 3
Di domenie ai 21 di Jugn +sKlet/XtremeTV, la serie ‘par furlan’ su sport e turism estrems, e va in onde te programazion televisive regjonâl di Rai 3 e Rai 3 bis. Si podarà viodi dutis e cinc lis pontadis de serie produsude da cooperative Informazion Furlane cul contribût de ARLeF (Agjenzie Regjonâl pe Lenghe Furlane).

Realizade di Giorgio Cantoni, che al è stât sei operadôr che regjist, la serie televisive e presente al public un viaç inmagant tra lis ativitâts sportivis plui origjinâls che si davuelzin in puescj particolârs dal Friûl. Des monts de Cjargne ae lagune di Grau e Maran, +sKlet/XtremeTV e compagne il public ae discuvierte di un vêr microcosmi di int, puescj e ativitâts.

Lis cinc dissiplinis presentadis a son caraterizadis di une imersion totâl tal ambient naturâl e de esplorazion di lûcs dulà che se di no, no si podarès rivâi : il Canyoning, il Downhill, il Kayak di mâr, il Kite-surf e il Paramotôr. Ogni pontade si siere cu la scuvierte di un setôr particolâr de ospitalitât turistiche, simpri caraterizât in tiermins culturâi, ambientâi e teritoriâi.

Lis cinc pontadis di +sKlet/XtremeTV a laran in onde su Rai Tre a difusion regjonâl la domenie aes 9.45 in chestis zornadis: 21 di Jugn, 28 di Jugn, 5 di Lui, 12 di Lui e 19 di Lui. A saran cun di plui mandadis in repliche su Rai Tre Bis, Canâl 103 dal Digjitâl Terestri, di miercus aes 21.10 in chestis zornadis: 24 di Jugn, 1 di Lui, 8 di Lui, 15 di Lui e 22 di Lui.