Tierce Caravane de memorie e de diversitât linguistiche
La Tierce Caravane de memorie e de diversitât linguistiche (16.08 - 1.09.2015), organizade de Associazion LEM-Italia in colaborazion cu la Università degli Studi di Teramo e cetantis istituzions, che e traviersarà la Italie di sud a nord ae scuvierte di minorancis linguistichis storichis, teritoriâls e no teritoriâls.
La Caravane 2015 e sarà une ocasion di incuintri par operadôrs, studiôs, docents e apassionâts de diversitât linguistiche e culturâl taliane, europeane e mediteranie.

A Udin la Caravane e rivarà joibe ai 27 di Avost cuntun program siôr di iniziativis. Daspò de visite te sede de Agjenzie, di fat, i protagoniscj dal progjet a parteciparan te sede de Societât Filologjiche Furlane ae cunvigne di studis "Politichis linguistichis e comunitâts locâls tra promozion e valutazion", dulà che la dot.re Linda Picco e presentarà i dâts su la cundizion sociolinguistiche de lenghe furlane su la fonde dai dâts de ricercje fate de Universitât dal Friûl tal 2014.

Dutis lis informazions su la Caravane e su la cunvigne tai alegâts achì sot.