Storie de Fieste

Ai 3 di Avrîl dal 1077, a Pavie, l'imperadôr Indrì IV al sancive la nassite dal Stât Patriarcjâl furlan, tant che premi pe lealtât dal Patriarcje Siart che, dilunc de vuere civîl cuintri l'imperadôr, si jere metût de sô bande. Pal Imperadôr la poie dal Patriarcje e jere stade fondamentâl par afermâ il so podê. L'at di costituzion de Patrie dal Friûl al ven fissât de Bole imperiâl dal Re di Gjermanie Indrì IV di Franconie che o ripuartìn sot vie il test integrâl:
 
“Intal non de Trinitât Sante e Indivisibil. Nô Indrì, Re cul favôr pazient di Diu, lant daûr dal esempli dai nestris paris, che intal segn de fe juste a faserin sù cui lôr bens glesiis a Diu, e daspò lis insiorarin sedi cun ce che a vevin di lôr, sedi cun ce a vevin otignût cu lis tassis dal Ream, vint passât i dîs de nestre zoventût in salût e in mût onest, e par che la nestre vite e puedi gjoldi ancje intai agns che a vignaran di timps ancjemò plui gaudiôs e pacjifics, o volìn lâ indevant cun diligjence in ativitâts cussì fatis.
Par chel, o volìn che ducj i sudits di Crist e nestris, sedi chei che lu son vuê, sedi chei che lu saran in avignî, a sepin che pe salvece de nestre anime e pes intervenzions de nestre mari cetant nobil, l’imperadore Agnês, de nestre muîr e regjine Berte, e di altris nestris sudits fidêi, tant a dî l’arcivescul di Milan Teodalt, chel di Ravene Vipert, e ancje daûr de domande dal nestri cetant cjâr cancelîr Grivôr, vescul di Versei, di Burcart vescul di Losane, di Epon vescul di Cize, di Benon vescul di Osnabrück, dal duche Liutolt e dai marchês Vielm, Açon e Adalbert, e pal servizi fidêl dal patriarcje Siart, o proferìn e o trasferìn al patriarcje Siart, ai siei sucessôrs e ae Glesie di Aquilee, la Contee dal Friûl e la vile clamade Lucinins, cun ducj i dirits e i beneficis che al veve il cont Luduì inte istesse contee, e cun dut ce che i partignive al Ream e al Ducât, tant a dî lis convocazions dai plaits, il dirit di fodri e ognidune e dutis lis jentradis leadis a chest dirit o che a podaran divignî, par cualsisei cause o reson, in avignî.
O ordenìn che nissun marchês, cont, viscont o altris personis cun cualsisei incarghe intal nestri Ream, no olsin disprivâ, angariâ, insidiâ la Glesie di Aquilee e il nestri nomenât fidêl sudit patriarcje Siart e i siei sucessôrs intes cjossis achì proferidis e trasferidis. Se cussì al ves di sucedi, il colpevul che al sedi cjastiât cuntune amende di cent liris d’aur, mieze pe nestre cjamare fiscâl e mieze pe Glesie di Aquilee. E par che cheste nestre donazion regâl e puedi restâ salde e cierte, o ordenìn che si le scrivi ta cheste cjarte e che i si meti sù il segn dal nestri sigjîl.
 
Segn dal nestri Signôr Indrì Cuart, Re invincibil.
 
Lu cognòs jo, Grivôr vescul di Versei e cancelîr intal puest dal Signôr Istolf, arcivescul di Colonie e arcicancelîr.
 
Dât intal an 1077 de incjarnazion di nestri Signôr Gjesù Crist, indizion diesimecuinte, an vincjesimsest de nomine di Indrì Cuart, vincjesimcuart dal so Ream.
 
Fat cun gjonde a Pavie.”

 
La prime edizion de Fieste, si è davuelte a Aquilee, tal 1977, nûfcentesim aniversari dal diplome di Indrì IV. Ideadôr e grant protagonist de edizion di scree al è stât pre Francesc Placerean, che dopo i fo intitulât l’ Istitût Ladin Furlan, l’ent che par agns al à coordenât i events celebratîfs.
Intai dîs de "Fieste" su dut il teritori furlan a vegnin fatis diviersis manifestazions che si sierin intun unic event celebratîf organizât ogni an intun comun diferent dal Friûl.
Tacant dal 2002, an che la fieste e je stade fate intal comun di Dael, la manifestazion e à otignût la adesion uficiâl des provinciis di Gurize, Pordenon e Udin, des trê diocesis furlanis e de Regjon, cjapant sù un significât unitari e unificadôr pal teritori de Patrie dal Friûl. A partecipin aes variis iniziativis organizadis pe ricorence anuâl ancje i Comuns cjâfluc dal Friûl e l'Ufici Scolastic Regjonâl, cun tancj ents locâi e realtâts associativis dal teritori. 

Lis edizions sucessivis de Fieste de Patrie dal Friûl si son fatis a Pantianins, intal 2003; a Spilimberc, intal 2004; a Davâr, intal 2005; a Cormons, intal 2006; di gnûf a Aquilee intal 2007; a Cordovât, intal 2008; a Buie, intal 2009; a Lucinîs, intal 2010; a Manià, intal 2011; a Cjarlins, Muçane e Sant Zorç di Noiâr, intal 2012; a Dolegne, intal 2013; a Cjavàs, Fane e Midun, intal 2014 e a Cividât, intal 2015.

Il 2015 al è stât l'an che al à viodût ricognossude uficialmentri de bande de Regjon la Fieste de Patrie dal Friûl, in graciis de aprovazion de leç n. 6 dai 27 di Març: il so obietîf al è chel di ricuardâ e valorizâ lis origjins, la culture e la storie di autonomie dal popul furlan.
Daûr dai articui de Leç, la “Fieste de Patrie dal Friûl” e previôt la organizazion di une cerimonie publiche là che a vegnin ricognossûts i valôrs civîi e culturâi che, ancjemò vuê, a caraterizin la identitât furlane. Ogni an, a vegnin metûts dongje ents e scuelis par fâ ativitâts cul fin di sensibilizâ i zovins su lis tematichis de autonomie e de identitât.

L.R n. 6 dai 27 di Març dal 2015

Zire il to dispositîf

Ruota il tuo dispositivo

Rotate your device

Cheste pagjine no si pues viodi cun chest dispositîf

Pagina non disponibile per questo dispositivo

This page is not available on this device