Stafete des Lenghis Minoritariis dal Friûl dal 2018

Intal 2015, in graciis de leç n. 6 dai 27 di Març, la Regjon e à ricognossût uficialmentri la Fieste de Patrie dal Friûl, cul obietîf di ricuardâ e valorizâ lis origjins, la culture e la storie di autonomie dal Friûl.
Lis celebrazions de edizion 2018 de Fieste de Patrie dal Friûl si insiorin cu la seconde edizion de manifestazion sportive de Stafete des Lenghis Minoritariis dal Friûl, promovude de ARLeF- Agjenzie Regjonâl pe Lenghe Furlanis e coordenade de Associazione Maratonina Udinese, che dal 2002 e promôf avigniments, maratonis e stafetis sul teritori furlan e nazionâl.

La Stafete si fasarà intes zornadis di sabide ai 7 e domenie ai 8 di Avrîl dal 2018 par un percors di plui o mancul 120 km: la partence e je previodude pes 08.00 di sabide ai 7 di Avrîl de basiliche di Aquilee e la rivade pes 16.00 di domenie ai 8 di Avrîl a Voleson Darzin, dulà che si celebre la Fieste de Patrie dal Friûl di chest an.
Il percors de Stafete al passarà i comuns di Aquilee, Flumisel, Rude, Cjamplunc, Dael, Visc, Palme, Gonârs, Cjasteons di strade, Talmassons, Bertiûl, Codroip, Vildivar, Morsan des ocjis, Cordovât, Siest, sant Vît dal Tiliment, Cjasarse, Sant Zorç de Richinvelde, sant Martin di Voleson, Voleson Darzin.
Vie pe corse,  al è il coinvolziment des diviersis aministrazions comunâls e lis lôr Pro Loco che a animaran il passaç dai atletis, e ancje la partecipazion di diviersis societâts sportivis.

I tedofars si alternaran intes variis tapis puartant tant che testemoni il test de bole Imperiâl, il document che intal 1077 al à fissât l'at di costituzion de Patrie dal Friûl. La rivade dal ultin tedoforar intal lûc de manifestazion e segnarà la sierade de celebrazion principâl pai 941 agns de Fieste de Patrie dal Friûl: lis premiazions a saran acompagnadis di un spetacul di tambûrs e sbandieradôrs dal Grup Artistic Furlan e un ristôr finâl cun prodots dal partner tecnic Aqua (Ersa), a cure de Associazione Maratonina Udinese.
Il sproc de Stafete al è "La nestre Patrie, lis nestris lenghis-Naša Domovina, naši jeziki-Unsere Heimat, unsere Sprachen-La nestre Patrie, lis nestris lingue-Our Homeland, our languages”. La Stafete des Lenghis Minoritariis e vûl, in maniere simboliche, sotlineâ la impuartance des diviersis identitâts linguistichis presint inte “Patrie dal Friûl”, cjapant atletis furlanofons, slovens e gjermanofons e lu fâs propit dilunc des zornadis che a ricuardin la nassite dal Stât patriarcjâl furlan.

Zire il to dispositîf

Ruota il tuo dispositivo

Rotate your device

Cheste pagjine no si pues viodi cun chest dispositîf

Pagina non disponibile per questo dispositivo

This page is not available on this device