Stafete des Lenghis Minoritariis 2017

Intal 2015, midiant de leç n. 6 dai 27 di Març, la Regjon e à ricognossût in maniere uficiâl la Fieste de Patrie dal Friûl: il so obietîf al è chel di ricuardâ e di valorizâ lis origjins, la culture e la storie di autonomie dal Friûl.
Lis celebrazions de edizion 2017 de Fieste de Patrie dal Friûl si insiorin cu la realizazion di une grande manifestazion sportive: la Stafete des Lenghis Minoritariis, promovude de ARLeF - Agjenzie Regjonâl pe Lenghe Furlane e coordenade de Associazione Maratonina Udinese, che dal 2002 e promôf events, maratonis e stafetis sul teritori furlan e nazionâl.
La Stafete si fasarà intes zornadis di sabide al 1 e domenie ai 2 di Avrîl dal 2017 su un percors di 100 km: la partence e je previodude pes 8.00 di sabide al 1 di Avrîl di Place Libertât a Udin, e si rivarà pes 16.00 di domenie ai 2 di Avrîl a Sapade.
Il percors de Stafete al passarà pai comuns di Udin, Tavagnà, Tresesin, Tarcint, Magnan, Dartigne, Glemone, Osôf, Trasaghis, Bordan, Cjavaç, Verzegnis, Tumieç, Vile, Lauc, Davâr, Comelians, Rigulât, For Davôtri e Sapade.
Dilunc de corse, a saran coinvoltis lis diviersis aministrazions comunâls e lis lôr Pro Loco che a animaran il passaç dai atletis, cu la partecipazion ancje di plui o mancul 20 societâts sportivis.
I tedofars si alternaran intes variis tapis puartant tant che testemoni il test de Bole Imperiâl, il document che intal 1077 al à fissât l'at di costituzion de Patrie dal Friûl. Cuant che al rivarà l'ultin tedofar intal lûc de manifestazion, si sierarà la celebrazion principâl pai 940 agns de Fieste de Patrie dal Friûl, che chest an si tignarà propit intal comun di Sapade.
La Stafete des Lenghis Minoritariis e vûl rimarcâ in maniere simboliche la impuartance des diviersis identitâts linguistichis presintis inte “Patrie dal Friûl”, cjapant dentri atletis furlanofons, slovenofons e gjermanofons e lu fâs propit intes zornadis che, di une vore di agns, si ricuarde la nassite dal Stât patriarcjâl furlan.

Zire il to dispositîf

Ruota il tuo dispositivo

Rotate your device

Cheste pagjine no si pues viodi cun chest dispositîf

Pagina non disponibile per questo dispositivo

This page is not available on this device