Simbui dal Friûl

La bandiere
La steme antighe de Patrie dal Friûl e je la acuile eraldiche di aur su cjamp celest. L'art. 2 de L.R. n. 6 dai 27 di Març dal 2015 e dîs: “La bandiere de comunitât furlane e je formade di un drap di forme retangolâr cun al centri une acuile eraldiche di aur cun alis spleadis, cjâf a çampe, bec viert e sgrifis rossis, suntun cjamp celest. Lis dimensions de steme a àn di sei  trê cuints de altece de bandiere che jê stesse e à di jessi alte doi tierçs de sô lungjece”.
L'art. 3 de Leç al regole la sô esposizion, cun chestis normis: “In aplicazion dal articul 6 de leç regjonâl 27/2001, i ents locâi e i uficis de Regjon a puedin esponi al esterni des sedis, in ocasion de "Fieste de Patrie dal Friûl", la bandiere dal Friûl”; “In prime aplicazion, la Aministrazion regjonâl e je autorizade a dâ fûr a gratis ai ents locâi che a fasin domande une bandiere dal Friûl par esposizion esterne”.
Il model plui innomenât e antîc de bandiere patriarcjâl al è in mostre tal Domo di Udin: al fo cusît sul cjamesot di lin blanc che al faseve sù il cuarp dal patriarcje Beltram di Saint Geniès, restât su la catidre di Aquilee dal 1334 al 1350 e copât in maniere barbare di une conzure di nobii furlans. Cheste bandiere antighe e je ancjemò in dì di vuê la bandiere dal Friûl ricognossude in maniere universâl. No va confondude cu la bandiere de istituzion dome aministrative clamade “Regjon Friûl-Vignesie Julie”, che e à une divignince tant plui resinte (1963) e dut un altri significât storic (su la bandiere regjonâl, la acuile e rapresente Rome che e va in socors di Aquilee, rapresentade de tor).
Pes carateristichis tecnichis de bandiere uficiâl: www.arlef.it/risorsis/bandiere/8.

La lenghe
Il furlan al è une lenghe neolatine dal grup des lenghis ladinis. Si è formât tor dal an mil  mantignint, intai secui, une sô origjinalitât particolâr che lu fâs ancjemò vuê tant diferent dal talian e di chês altris lenghis des tieris confinantis.
I prins documents par furlan a son dai secui XII e XIII cuant che a comparissin ancje lis primis composizions poetichis; di chê volte, la produzion leterarie par furlan e je cressude di un continui rivant a risultâts stilistics di nivel otim.
A vuê, il furlan al è fevelât in plui dal 80% dal teritori regjonâl, di plui o mancul 600.000 – 650.000 personis, in 176 comuns des provinciis di Gurize, Pordenon e Udin e in 7 comuns de provincie di Vignesie.
Il prin ricognossiment uficiâl de lenghe furlane al è dal 1996, cuant che e je stade aprovade la leç regjonâl 15/96; cualchi an dopo ancje il Stât talian al ricognossarà, cu la leç 482/99, la minorance furlane, plui di 50 agns dopo la aprovazion dal articul 6 de Costituzion. La Regjon, infin, e à aprovât une gnove leç organiche di tutele: la L.R. 29/2007.

Il Parlament
Il Parlament de Patrie dal Friûl al è nassût des assembleis consultivis dai nobii e dal clericât, clamadis dal Patriarcje di Aquilee fin dal secul XII par domandâ gnovis contribuzions in monede e soldâts. Fin dai prins timps, però, in bande dai nobii e dai eclesiastics, a sentavin ancje i rapresentants dai Comuns urbans che, par efiet de economie comerciâl a jerin in stât di contribuî in maniere impuartante aes imposizions in bêçs. Lis citâts di Aquilee, Cividât, Udin, Glemone, Tumieç e Sacîl a son stadis presints fint des primis sentadis dal Parlament, tacamt dal secul XIII. Fin dal principi, a forin sentâts in assemblee, in rapresentance dal clericât, il vescul di Concuardie, i cjapitui di Aquilee e Cividât, i abâts di Rosacis, Mueç e Siest, de Beligne (a Sud di Aquilee) e, plui tart, ancje chel di Summaga (dongje di Puart), i preposits di Sant Feliç e Sant Stiefin di Aquilee, di Sant Pieri di Cjargne e Sant Durì. A vevin sente in Parlament ancje i convents feminins di Sante Marie in Val di Cividât e dal Munistîr plui grant di Aquilee. I nobii a jerin dividûts in libars e ministeriâi: i prins, come il cont di Gurize, a jerin cussì par volê dal Imperadôr, i seconts par volontât dal Patriarcje, che par chel a fasevin funzions particolârs, vâl a dî i ministeris. Aes comunitâts za citadis, si son zontadis dopo chês di Monfalcon, Maran, Puart, Vençon, e i paîs di Feagne, Midune, Sant Vît dal Tiliment e Cjanive di Sacîl. I lavôrs parlamentârs si fasevin in lenghe furlane. Il patriarcje al rapresentave il Stât feudâl, o ben il principatus Italiae et Imperii creât ai 3 di Avrîl dal 1077 dal imperadôr Indrì IV; il Parlament al rapresentave pal princip la universitas furlane.
 
Par altris aprofondiments su la storie dal Parlament Furlan:

Il Parlamento friulano / Pier Silverio Leicht ; [a cura di Roberto Tirelli ; con la collaborazione della Deputazione di Storia Patria per il Friuli]. - Udine : Provincia di Udine, 1999. - 2 v. in 1 ; 25 cm. - (Collana del Friuli storico ; 1) Leicht, Pier Silverio, Udine : Provincia di Udine, 1999
 
Atti delle assemblee costituzionali italiane dal Medio Evo al 1831. Serie 1., Stati generali e provinciali. Sezione 6., Parlamento friulano e Stati provinciali goriziani. - Bologna : Zanichelli
 
Rappresentanze e territori : parlamento friulano e istituzioni rappresentative territoriali nell'Europa moderna / a cura di Laura Casella. - Udine : Forum, 2003. - 502 p. ; 25 cm. - (Strumenti di storia del Friuli ; 1) Casella, Laura, Udine : Forum, 2003

Zire il to dispositîf

Ruota il tuo dispositivo

Rotate your device

Cheste pagjine no si pues viodi cun chest dispositîf

Pagina non disponibile per questo dispositivo

This page is not available on this device