Concors "Emozions furlanis in viaç pal teritori"

In ocasion dal inovâl dai 3 di Avrîl, Fieste de Patrie dal Friûl, ricognossude in maniere uficiâl de leç regjonâl numar 6, dai 27 di Març dal 2015 (Istituzione della “Fieste de Patrie dal Friûl”, Istituzion de “Fieste de Patrie dal Friûl”), l'Ufici Scolastic Regjonâl in colaborazion cun ARLeF e Provincie di Udin, al bandìs la seste edizion dal concors a premis “Emozions furlanis in viaç pal teritori” par valorizâ e promovi il patrimoni storic, artistic, culturâl e naturâl dal Friûl.
I docents interessâts a varan di mandâ i elaborâts dentri dai 13 di Avrîl dal 2017.
Il concors al è viert a dutis lis scuelis de infanzie, primariis e secondariis di prin grât des provinciis di Gurize, Pordenon e Udin.
Il premi al consist in trê bogns dal valôr di 300,00 euro dal un par l'acuist di materiâl didatic, metûts a disposizion de ARLeF, e in diviers struments e jutoris didatics in lenghe furlane ufierts de Provincie di Udin, de Societât Filologjiche Furlane, de associazion la Clape culturâl “La Patrie dal Friûl”, de associazion "La Grame" e di altris associazions culturâls che a operin pe valorizazion de lenghe e de culture furlanis.
A vignaran premiâts trê lavôrs, un par ogni sezion di scuele.

Discjame la documentazion

I vincidôrs dal concors de edizion dal 2016:
 
-pe sezion SCUELE DE INFANZIE: i fruts de scuele di Rivis Darcjan (I.C. San Denêl) cul lavôr "Morârs”, premiâts pe creativitât, la origjinalitât e la rapresentazion grafiche delicade de ideazion progjetuâl.

-pe sezion SCUELE PRIMARIE : la classe 4^ C de scuele "G. Ellero" di Tresesin (I.C. Tresesin) cul lavôr “Mûrs e ûfs dûrs par un pitôr”, opuscul premiât pe sô ricjece che al ten dentri un viaç intal passât di un Friûl pôc cognossût

-pe sezion SCUELE SECONDARIE DI PRIN GRÂT: lis classis 1^, 2^ e 3^ de scuele di Dael e Rude/Parteulis (I.C. Diestre Tor), cul lavôr “Il troi dai fogolârs”, premiât pe ispirazion origjinâl e eficace in stât di fâ cognossi di plui i Fogolârs, simbul de famee furlane.
 
La jurie dal concors e à segnalât, cun di plui, i aspiets positîfs ancje intai lavôrs proponûts di altris scuelis partecipantis.
Pe sezion INFANZIE la jurie e segnale:
-“La vacja spaziâl”, de scuele de Infanzie di Manià, parcè che che il libret al è pervadût di un otimisim gjenerâl e, in graciis dal stîl sielt, al rive a cjapâ il letôr in maniere emotive;
-“Jo e il mont ator di me. Une strane besteute”, fat de infanzie di Rivolt, premiât pe origjinalitât e la creativitât, e ancje pe coralitât dal lavôr e la testemoneance dal entusiasim e dal coinvolziment dai fruts de classe;
-“Al covente un flôr”, fat de Infanzie di Cuie di Tarcint, parcè che la rielaborazion de splendide cjançon suntun test di Gianni Rodari, e il significât che al esprim al è che dutis lis robis a son colegadis tra di lôr e la rose, simbul di amôr e di pâs, al covente par che dut al esisti in chest mont;
-“Un mistîr al pâr Jacum”, fat de Scuele de Infanzie paritarie Regina Margherita di Mueç, par vê savût condusi i fruts, traviers de discuvierte dai mistîrs de tradizion, ae scuvierte dal nestri Friûl.

Pe sezion PRIMARIE:
-“Lulù e i misteris di mîl disparide”, de Scuele Primarie di Migjee, parcè che il lavôr al è un biel esempli di integrazion tra varis progjets e al met in evidence cemût che il valôr de colaborazion al pues deventâ bon par costruî la cognossince dal teritori e de comunitât là che si vîf.
-“O come ort” de scuele primarie “G. Mazzini” di Udin VI, esempli di cemût che la impostazion veicolâr de “marilenghe” al pues disvilupâ simpatie e curiositât sul ûs e l'aprendiment de lenghe furlane, ancje de bande di arlêfs forescj.

Pe sezion SECONDARIE DI PRIN GRÂT:
-“Su lis olmis des puartadoris cjargnielis”, de scuele secondarie di Aquilee, parcè che la origjinalitât dal lavôr e la fuarce evocative a contribuissin a mantignî vîf il patrimoni storic e morâl leât ae vicende di chestis feminis;
-I lavôrs presentâts dai fantats de Scuele secondarie di prin grât di Gonârs a àn colpît in maniere particolâr la jurie pal coinvolziment di dutis lis classis dal Istitût e pe ricjece e varietât dai elaborâts mandâts.

Zire il to dispositîf

Ruota il tuo dispositivo

Rotate your device

Cheste pagjine no si pues viodi cun chest dispositîf

Pagina non disponibile per questo dispositivo

This page is not available on this device