IL SIUM DI UNE PATRIE

Il Sium di une Patrie. I ultins dîs di Pre Checo Placerean.

Il grant tradutôr de Bibie par furlan, pre Checo Placerean, al è stât ricuardât tal 25m an de sô muart cuntun spetacul teatrâl inedit: “Il Sium di une Patrie - I ultins dîs di Pre Checo Placerean” di e cun Fabiano Fantini, che al è lât in sene pe prime volte ai 23 di Novembar, li dal Teatri S. Zorç a Udin e al à vût un bon acet di bande des tantis personis presintis in sale. La rapresentazion e je stade compagnade des musichis sunadis dal vîf dal fisarmonicist Sebastiano Zorza; i elements senografics a son stâts realizâts di Luigina Tusini. Il spetacul al è une produzion dal CSS Teatri Stabil di Inovazion dal Friûl Vignesie Julie e al è promovût de ARLeF – Agjenzie Regjonâl pe Lenghe Furlane. Par mieç di “cuadris” e je stade svilupade di Fantini la analisi dai singui aspiets dal pinsîr di pre Checo: dal amôr pal so popul, ae necessitât di voltâ la Bibie par furlan, des sôs ideis politichis, che a cjatin ispirazion tal Patriarcjât di Aquilee, fin al aspiet plui anarchic e scandalôs de sô fede in Crist.

“Cun chest spetacul – al à marcât Lorenzo Zanon, president de ARLeF – o vin volût ricuardâ il 25m aniversari de muart dal grant predi furlan, fondadôr dal “Moviment Friûl”, autonomist, teolic, animadôr de sene politiche e culturâl furlane dai agns ’60 - ’70, cul fin di analizâ il so pinsîr e la sô opare par meti in discussion e valorizâ un om e un periodi storic fondamentâi pal Friûl e pe sô lenghe”. Al è lât indenant Zanon: “A forin chei agns cetant impuartants par vie che il popul furlan al cjapà cussience, sedi te suaze etniche – linguistiche, sedi te suaze politiche, e la clarece dal pinsîr di pre Checo Placerean e veve viert i voi ai furlans su la necessitât de difese de lenghe, su la impuartance de Universitât a Udin, su la puartade storiche dal Patriarcjât di Aquilee, sul probleme de emigrazion e su tant altri. Al fo un grant om ancje dal pont di viste teologjic, in contrast autentic cu la glesie uficiâl, ma coerent tant di paiânt lis conseguencis cuntun isolament no just”. Fabiano Fantini, autôr e atôr de opare, al à ricuardât che: “i ultins agns de vite di pre Checo a forin savoltâts de malatie che lu veve cjapât e che i puartà une depression insot e, daspò, une crisi esistenziâl. Il spetacul al partìs di chi, de analisi dal personaç in maniere no univoche, retoriche o enfatiche, tipiche des celebrazions, ma cun dutis lis sôs contradizions, tai siei aspiets plui positîfs e tai moments di disorientament e di solitudin, intune vision che, dut câs, no tradìs la grande impuartance dal so messaç”.

Zire il to dispositîf

Ruota il tuo dispositivo

Rotate your device

Cheste pagjine no si pues viodi cun chest dispositîf

Pagina non disponibile per questo dispositivo

This page is not available on this device