BIGATIS

Bigatis - storiis di feminis furlanis in filande

Un afresc popolâr dal grant Elio Bartolini, dut recitât e cjantât par furlan; piçulis e grandis storiis cjaladis midiant di une comunitât di bigatis.

Test: Elio Bartolini e Paolo Patui
Regjie: Gigi Dall'Aglio

Interpretis
Maria Ariis, Paola Bacchetti, Sandra Cosatto, Fabiano Fantini, Caia Grimaz, Federica Guerra, Alessandra Kersevan, Rita Maffei, Lia Moro, Giuliana Musso, Nicoletta Oscuro, Roberta Sferzi, Massimo Somaglino, Ilaria Valli, Arianna Zani, Sebastiano Zorza (fisarmoniche)

Denis e costums: Emanuela Dall'Aglio
Dissen lûs: Alberto Bevilacqua e Stefano Mazzanti
Musichis: Davide Pitis
Ricercje storiche-musicâl: Alessandra Kersevan
Aiût regjie: Rita Maffei
Mestre di tango: Rosanna Remon
Produzion: CSS Teatri stabil di inovazion dal Friûl Vignesie Julie in colaborazion cun Mittelfest 2000 (Cividât) e cu la poie dal Teatri Gnûf “Giovanni da Udine”

Contâ "storiis di feminis furlanis in filande” al jere un sium di Elio Bartolini, il scritôr di tancj romançs bogns di descrivi il Friûl, la sô storie lontane e resinte. Il progjet dramaturgjic di Bigatis al nas a pene che il CSS si interesse a che storie che e fevele di dongje de nestre tiere, cul progjet di debutâ su lis senis in ocasion dal Mittelfest 2000 (il festival che al colabore ancje ae produzion, cu la poie dal Teatri Gnûf “Giovanni da Udine”). Bartolini al cjape dentri in cheste imprese il so amì Paolo Patui, ancje lui autôr di teatri e espert di culture de nestre Regjon, che al acete cun passion cheste idee. La regjie dal spetacul e ven consegnade al regjist di Parme Gigi Dall'Aglio. Une compagnie passionade di tredis atoris e doi atôrs, fra i interpretis plui cognossûts de gjenerazion di atôrs furlans di vuê, e anime cun vivôr chest grant spetacul dut recitât e cjantât par furlan, un afresc popolâr fat di tantis storiis, piçulis e grandis, di une comunitât di bigatis, dai prins grancj siopars dal secul a rivin fintremai ae vuere frede, cu la vignude dal fassisim, il delit di Matteotti e tancj framents di storie nazionâl e locâl. In chest incrosâsi di storiis, si distinguin, in particolâr, i percors di vite di trê zovinis furlanis, dividudis fra passions personâls e primis lotis sindicâls tai agns che e sclopave fûr la fisse di chel bal gnûf, une vore moderni, il tango. E zire ator di Lise, Olghe e Pascute, dai lôr desideris di zovinis, des lôr passions, pôris e sperancis, e fra i mûrs de filande di Codroip, une des tantis che a jerin in vore in chei agns in Friûl, lûc no dome di lavôr ma di formazion vere ae vite, une trame che e torne a dissegnâ un toc impuartant di storie sociâl furlane, ma scjampant vie des insidiis dal populisim e de retoriche. "Il nestri compit – al spieghe il regjist Dall'Aglio – al è chel di provocâ il refudament de retoriche dal passât, e di conservâ l’afiet par cui che lu à vivût e cence domandâsi masse se la nostalgjie e je une malatie pericolose par cui che al vûl lâ indevant. La memorie, e je vere, e je dispès un pês, ma cuant che e je ative e devente un filtri che un pôc ti ten indaûr e un pôc ti fâs lâ indevant cence deliri".

Zire il to dispositîf

Ruota il tuo dispositivo

Rotate your device

Cheste pagjine no si pues viodi cun chest dispositîf

Pagina non disponibile per questo dispositivo

This page is not available on this device