I Media

La stampe par furlan e scomence cu la nassite, tal 1883, dal setemanâl «Florean dal Palazz». Stampât tra il 1883 e il 1886, il gjornâl al à rivât a vê plui di 170 numars par une tiradure di cirche 10.000 copiis. Ma par vê une forme plui madure di gjornalisim par marilenghe si à di spietâ il 1946, cuant che Josef Marchet al fonde «Patrie dal Friûl».
Gjornâl ferbint e dinamic, «Patrie dal Friûl» al sostignive la costituzion dal Friûl in Regjon autonome e il ricognossiment uficiâl de lenghe furlane. «Patrie dal Friûl» al è vignût fûr in maniere regolâr fin tal 1965. Intant, tal ’63, e jere scomençade la esperience dal periodic «Int furlane», che e je lade indenant fin tal 1987.
Dai agns dopo a son i mensîi «La Patrie dal Friûl» (nassût tal 1978 e ancjemò in vore), «Ladins dal Friûl» (nassût tal 1998 e ancjemò in vore) e «INT» (nassût tal 2001 e passât sul web dal 2004 al 2009 tant che www.lenghe.net). Une vore plui resint al è l’ûs dal furlan te radio e te television. L’esordi dal furlan in radio al è dai agns ’60 cu la rubriche Florean e Venturin, trasmetude di Radio Trieste. Pai prins notiziaris e programs di aprofondiment si à di spietâ, però, la seconde metât dai agns ’70, cuant che al va in onde il radiogjornâl La vôs dal Friûl (Radio Effe) e la trasmission Friûl ch’al vîf (Radio Effe e Radio Friuli). Tal 1980 e nas Radio Onde furlane, il prin mieç di informazion radiofoniche che al scomence a trasmeti par furlan in maniere regolâr. Grant spazi aes trasmissions in marilenghe lu dà ancje da Radio Spazio 103, nassude tal 1993.
Lis primis trasmissions televisivis par furlan a scomencin a cjaval tra i agns ’70 e ’80, su la emitente privade Telefriuli. Cu la jentrade in vore de leç regjonâl 15/96 su la tutele de lenghe furlane, la programazion si slargje a altris emitents locâls e ae RAI, ancje cun trasmissions inovativis tant che magazine, notiziaris e cartons animâts.

Zire il to dispositîf

Ruota il tuo dispositivo

Rotate your device

Cheste pagjine no si pues viodi cun chest dispositîf

Pagina non disponibile per questo dispositivo

This page is not available on this device