Friûl: Storie e Culture
La storie dal Friûl e je simpri stade condizionade de sô posizion, ae estremitât setentrionâl dal Mâr Mediterani e su la puarte di Soreli Jevât par jentrâ te penisule taliane. Culì a son floridis lis trê grandis citâts portuâls che a 'ndi àn segnâts i destins: Aquilee, Vignesie, Triest. Sul as Est-Ovest, i siei confins a son di nature storiche plui che gjeografiche. A Soreli a Mont il confin dilunc la val de Plâf e il cors de Livence si è stabilizât di secui, intant che a Soreli Jevât a son simpri stadis tantis incertecis, par vie che i confins gjeografics, etnics, socioeconomics e politic militârs no coincidevin.
La formazion dal Friûl tant che entitât storiche, politiche e culturâl si pues fâ romontâ ae ete langobarde (sec.VI-VIII). Su la formazion de lenghe furlane a son teoriis diferentis; daûr di chê plui tradizionâl, e nas de influence dal sostrât celtic sul latin puartât culì dai colons romans, e duncje e à plui di doi mil agns; invezit, daûr di altris, si forme mil agns plui tart, par efiet dal isolament dal rest di Italie imponût dal Patriarcjât.
Tal 1420 il Friûl al fo concuistât di Vignesie, gjavant Cormons, Gardiscje e Gurize. La plui part o scuasi dute la popolazion e à simpri fevelât il furlan, e fintremai dal secul XIV a son ancje documents leteraris scrits in cheste lenghe. Al è dome tal Votcent che si invie une robuste e continue tradizion leterarie e la lenghe e devente la fonde principâl de identitât regjonâl. Dopo dal 1945 si inviin i moviments pal ricognossiment dai Furlans tant che minorance linguistiche, cun dirit ae autonomie politiche aministrative e ae tutele de lôr lenghe.
Cheste ultime istance e je deventade plui urgjente a tacâ dai agns '70 e e à cjatât un debil acet di bande des istituzions dome ae fin dal secul passât.
Incuadrament gjeografic: i as gjeneradôrs
‘Tra Vignesie e Triest’. Par solit, e je cheste la indicazion che a dan i furlans tal mont par spiegâ ai forescj dulà che e je logade la lôr ‘Piçule Patrie’; parcè che, in efiets, tai ultins secui il Friûl al à vivût un pôc te ombrene di chestis dôs grandis citâts di mâr: par cuatri secui sot de prime, par cuatri decenis sot de seconde. Tant, tant timp indaûr a varessin podût dî: ‘tor Aquilee’. Aquilee, Vignesie, Triest: in dute la storie, insom l'Adriatic, dulà che il mâr si sburte plui in profonditât tal continent, a son floridis une daûr chê altre grandis citâts mediatoris dai scambis tra il mont mediterani e la Europe centrâl. La storie dal Friûl e je stade condizionade in buine part de sô posizion gjeografiche, vâl a dî des sôs relazions sui as nord sud e est ovest. La prime relazion e à un caratar adiriture gjeologjic: di chi e passe la faie tra la çope africane - che ancje la Italie indi fâs part - e chê europeane. Il confin setentrionâl dal Friûl al è segnât in mût precîs de dorsâl des Alps Cjargnelis, gjenerade de pression de Afriche su la Europe. Cuintri cheste murace di crets si sburtin e si struchin lis massis di aiar cjalt e umit che a vegnin dal Mediterani, che a causionavin la condizion di regjon plui ploiose di Italie (ancje se al pâr che lis robis, in chescj ultins agns, a sedin daûr a cambiâ un pôc). La fuarce des ploiis e la nature calcarie dal cret a produsin une condizion di fuarte erosion des monts dal Friûl; i versants a son duncje dispès grivis e erts, lis vals stretis, e il lôr fonts ocupât di jets di grave larcs, produsûts de grande capacitât di erosion e des variazions bruschis di puartade des aghis. Cuant che a rivin inte plane, i flums dal Friûl a formin largjis ‘vintulinis’ di claps - i ‘conoits di deiezion’ - dulà che lis aghis si pierdin pe plui part dal an. No cate la bondance des ploiis (in medie, 1.800 mm/an), la fasse ‘alte’ de planure furlane e je duncje sute, cence cors di aghe permanents. Lis aghis a tornin fûr plui in bas, dilunc une linie di ‘risultivis’ che e va dai pîts dal Cansei (lis risultivis de Livence, dongje Polcenic) a chei dal Cjars (lis bocjis dal Timau). Sot di cheste linie, la Basse furlane e je un teren cetant siôr di aghis, cun dut ce che chest al compuarte. Cuant che l'om al è stât bon di controlâlis, come inte epoche romane e in chê presinte, la Basse e je stade une tiere cuntune agriculture cetant produtive; in altris periodis - e si fevele di plui o mancul dodis secui - e je stade une tiere paludane, malsane e dispopolade.
Come dutis lis faiis tra çopis gjeologjichis, ancje chê che e passe juste tal mieç de regjon ogni tant e causione un scjas. Il Friûl al è duncje une ‘tiere balarine’ e, di cuant che si indi ten note, al à patît une mieze dozene di scossis sismichis disastrosis.
In complès o podìn dî duncje che la nature no à avantazât masse il Friûl. Cheste tiere e je avonde zovine dal pont di viste gjeologjic, e tant che i zovins e pant ancje alc di ruspi, di instabil e di estremist. Chescj siei caratars gjeologjics, come che o viodarìn, a contrastin in mût curiôs cun chei socioculturâi de sô popolazion. Par vie de sô posizion gjeografiche tra il Mediterani e la Mitteleuropa, in Friûl si cjate sedi une che chê altre fasse climatiche. Plantis tipichis mediteranis, tant che l'elis ma ancje tant che l'ulîf e il fiâr, a vivin cuietis fintremai a lis primis alturis des prealps; intant che la plui part des Alps furlanis, par vie de bondance di ploiis, e à un clime avonde Mitteleuropean (si pues viodi par esempli il carateristic ‘sbassâsi de linie dal faiâr’). In gracie di chest, in Friûl si cjate un numar di speciis vegjetâls plui alt che in tantis altris regjons de Europe. E ancje pes speciis animâls si verifiche alc di analic. Al è deventât famôs, tai ultins agns, il câs dai lepidotars. Sul Brancot e sul Sant Simeon, ven a stâi su lis monts che a cercenin la zone li che il Tiliment al rive tal plan e che a son stadis ancje l'epicentri dal taramot dal 1976, i studiôs a àn rimarcât la presince di une cuantitât straordenarie di speciis di paveis, tipichis sedi dal Nord che dal Sud de Europe. Par cheste varietât di trats gjeografics, concentrâts intune aree avonde piçule (7.885 kmc, plui o mancul il 2,5% dal teritori talian), il Friûl si identifiche cun braure inte famose espression di Ippolito Nievo di ‘piçul compendi dal univiers’; ancje se, par dî la veretât, il scritôr si riferive vadì plui al so aspiet uman che a chel naturalistic. Dal pont di viste socioeconomic, l'as nord sud al caraterize il Friûl in diviersis manieris. Gjavant l'Alt Adis/Tirôl dal Sud, il Friûl e je la regjon plui setentrionâl di Italie; chê in contat plui stret cul mont gjermanic, midiant dal pas di Mont di Crôs e dal Cjanâl dal Fier. Chest toponim al segne a clâr cuale che e fos une des marcjanziis plui impuartantis che a passavin par li, vie pe plui part de storie. Ma ancjemò prime, di culì e passave la Vie de ambre, la preziose materie dorade racuelte su lis splazis dal mâr Baltic e tant preseade dai romans. Fûr pe storie, i rapuarts tra il Friûl e il Mediterani a son stâts impuartants te ete di Aquilee romane e, tai agns plui resints, cul disvilup dal turisim balneâr che al à fat rivâ su lis splazis di Grau e di Lignan sdrumis di austriacs e di todescs. Pal rest de storie, il Friûl al è stât une regjon dibot tiericule, separade dal mâr di une fasse di palûts e lagunis pôc praticabilis.
Sul as est ovest, ce che al caraterize il Friûl e je la sô condizion di passaç obleât, o miôr di puarte spalancade tra la penisule taliane e la Europe e, plui in là, la Asie. No je soluzion di continuitât - gjavant, al è clâr, i flums - tra la planure furlane, chê venite e chê padane. A soreli jevât, i rilêfs a son bas e i pas facii. Pe plui part de storie, il flus al è stât massime di soreli jevât viers la Italie: di fat, al è tal imens Orient che si verifiche la plui part des dinamichis demografichis e culturâls che daspò a invistissin a bugadis la penisule taliane, tacant de invenzion de agriculture. Ciert, i Grêcs e i Punics a àn colonizât vie mâr lis cuestis europeanis ma lis grandis migrazions di popui a jerin vie tiere. Fûr pal Friûl a son passâts i Paleovenits e, plui indenant, i Cuâts e i Marcomans, i Erui, i Ostrogôts e i Visigôts, i Uns, i Langobarts, i Francs, i Ongjars, i Turcs e vie indenant. Tra chês che a vignirin di soreli jevât - la maiorance - e chês di soreli a mont, in Friûl si contin cuarantesîs invasions; cualchidune e je stade dome une scorsade o une spedizion militâr, altris a son duradis di plui e a àn implicât cualchi forme di insediament. La plui impuartante e je stade cence dubi chê romane. Tal 181 prin di Crist, Rome e decît di fondâ culì, insom dal Adriatic, une colonie cul tripli compit di organizâ il teritori venit anetût di pôc, di vuardeâ la ‘puarte di Italie’ a soreli jevât e di fâ di ponte pe espansion - economiche e culturâl, prin inmò che politiche e militâr - dai teritoris a nord est: il Noric e la Panonie, vâl a dî la Austrie e la Ongjarie dal dì di vuê. Aquilee e devente la capitâl de Decima Regio de Italie Augustee, clamade Venetia et Histria: dal Adis al Cuarnêr. Il non Friûl al nas cui Langobarts, che a intronin a Forum Iulii (la Cividât dal dì di vuê) la capitâl dal lôr prin ducât in tiere italiche e la difese de Italie langobarde cuintri la pression dai Avars e dai Slâfs. Plui indenant, cui imperadôrs francs, sassons, francons e svêfs, cheste regjon e devente invezit la puarte di Italie a servizi dal Imperi roman gjermanic. Cun Vignesie, il Friûl al torne a jessi bastide venite - ven a stâi taliane - cuintri lis potencis centrorientâls; funzion che al mantignarà ancje cul Ream di Italie, e po dopo cu la Republiche. Tai agns plui resints, cul ristabilîsi di bogns rapuarts cui paîs de Europe centrorientâl, il Friûl al à volût cjapâ sù la funzion di puint o di cerniere tra la Italie e chel mont, e vuê, cul slargjâsi de Union europeane, al smire a deventâ un dai lûcs centrâi, un dai cûrs de gnove Europe unide. Di chi, probabilmentri, al varà di passâ il Corridoio Cinque, l'as di colegament tra l'estrem Ovest european (Spagne e Portugal) e l'estrem Est (Ucraine).
Corogjenesi dal Friûl: i confins
In plui che dai as gjeneradôrs, o dal centri di polarizazion, ogni regjon e je caraterizade ancje dai siei confins. I confins a son di solit costruzions artificiâls, imponudis dal om (de politiche) suntune nature che e slungje i siei caratars tal spazi cun continuitât.
Il Friûl al à doi confins naturâi avonde nets: a setentrion il spartiaghis tra il bacin dal Tiliment e chel de Gail; a meridion il mâr. Ma ancje culì lis robis no son cussì semplicis. Tal Friûl atuâl al è cjapât dentri ancje un cjantonut di bacin danubian, di Cjamparòs a Cocau; e ancje a sud e je cualchi complicazion, par vie che i antîcs insediaments des cuestis – Grau e Maran - a àn vivût dispartâts de tiere ferme, pluitost leâts a Vignesie, e a stentin a identificâsi cul Friûl. A nord ovest i confins a corin sul spartiaghis cu la val de Plâf e duncje cul Cjadovri, ma cu la ecezion di Nert e Cjas, che a son restâts al Friûl ancje se il Vaiont si bute te Plâf. Il confin daspò al torne a lâ sù sul altiplan dal Cansei e di chi al va jù ae Livence. Il confin de Livence si è stabilizât in ete basse medievâl, par disparselâ lis possidencis dal patriarcje di Aquilee di chês dai trevisans e dai venezians, e al è stât rispietât ancje cuant che dute la Patrie dal Friûl e fo anetude ae Serenissime (1420). Dome cuatricent agns daspò, tal 1838, al fo violât, cul distacâsi dal mandament di Puart de Provincie di Udin e il so passaç a chê di Vignesie. Ma i problemis plui grues si cjatin te fasse orientâl, parcè che culì a son vignûts in conflit diviers criteris di definizion dai confins: chel gjeografic, chel etnic, chel economic sociâl e chel politic militâr.
Dal pont di viste gjeografic, i rilêfs a son bas e la idrografie e je ingarbuiade par vie dal caratar carsic de zone, che al puarte i flums a cori in buine part sot tiere. Dal pont di viste etnic, za in ete langobarde popolazions slavis si son spandudis su dutis lis alturis dal bacin de Fele, de Tor, dal Nadison, dal Lusinç e dal Vipau, che pûr ‘a plovin’ viers il Friûl. Dal pont di viste economic e sociâl, i abitants di chestis tieris a jerin pal plui in relazion cun chei de planure furlane, e tal pont di sboc dal Lusinç e dal Vipau si è disvilupât, tai ultins mil agns, un impuartant centri di polarizazion urbane, Gurize. Tant che part di un stât feudâl dal dut austriac, il Tirôl orientâl, ma capitâl di une contee che e cjape dentri tieris abitadis pe plui part di slâfs e in part minôr di furlans, Gurize e je simpri stade une citât composite dal pont di viste etnic. Par plui di nûfcent agns (1002-1918) e à fat part dal mont austriac - no cate che il cont di Gurize al fos ancje tra i prins vassai dal patriarcje di Aquilee, e anzit al ves la incarghe di avocat dal patriarcje - ma davuelzint pal plui une politiche avierse. La part furlane de contee, l' ‘agri cormonês gardiscjan’, e costituìs il Friûl orientâl (o austriac, o gurizan, o arciducâl, o imperiâl). La citât stesse, ancje se e à un non dal sigûr sloven (gorica al vûl dî ‘montute’) e se e da acet a un numar impuartant di citadins slovenofons, vie pe storie e je stade calcolade di regule tant che citât furlane (‘Görz in Friaul’, e jere la espression corinte). Dal pont di viste politic militâr, il probleme al devente incindiôs tal Votcent, cu la difusion dai nazionalisims opuescj. Sedi i talians che i slovens a reclamin la citât, i prins in non de culture, i seconts in non dal so jessi cjâf lûc di un teritori par trê cuarts sloven. Cu la vitorie dal 1918, la Italie e anet no dome dute la ex contee di Gurize (vals dal Lusinç e dal Vipau), ma ancje altris tieris slovenis (Postumie) par resons dal dut militârs, ven a stâi par garantî ae Italie un confin favorevul e spazis di manovre di schene a Triest.
Tal 1923, par resons politichis, il fassisim al decît di soprimi la Provincie di Gurize e di cjapâle dentri intune Provincie dal Friûl slargjade in maniere mostruose. Pôcs agns dopo però, tal 1927, si torne a costituî la Provincie di Gurize ma cence Monfalcon, passât a Triest (fintremai al 1947) e Çarvignan, restât a Udin. Par svindic, la Jugoslavie, vincidore te seconde vuere mondiâl, e pretint la sô anession ae Slovenie, comprendude la part furlane; e adiriture e staze la domande di puartâ il confin fin al Tiliment. Si rive duncje al compromès dal 1947: il gnûf confin, imponût dai aleâts, al divît la provincie, lassant ae Italie il cjâf lûc e la part dal teritori etnichementri furlane (cun cualchi piçule ecezion), e consegnant ae Jugoslavie il rest (trê cuarts dal teritori e de popolazion).
Etnogjenesi dal Friûl
Tant che si à motivât, il Friûl al tache a cjapâ forme midiant dai Langobarts che a slargjin al teritori il non di Forum Iulii, che i partignive za a chê che vuê e je Cividât. Il ducât dal Friûl al ve un rûl impuartant tai doi secui dal Ream Langobart di Italie (568-774 d.C.), e un marchês dal Friûl, Berengari, al deventà ancje re di Italie e fintremai - ma in mût precari e par pôc timp - imperadôr. Cence dubi i Langobarts a àn lassât une olme impuartante in cheste tiere, sedi pe organizazion teritoriâl e politiche, sedi a nivel lenghistic e culturâl, e forsi ancje gjenetic. Dut câs, lôr a jerin dome un strât sutîl di dominadôrs; il grues de popolazion al jere formât di ‘romans’, vâl a dî di dissendents dai colons italics (massime dal Sannio) che ur jere stât assegnât di Rome l'agri aquileiês.
Tai ultins decenis al è florît un dibatiment vivarôs sul rûl che, te formazion dal popul furlan, a àn vût lis popolazions che a jerin logadis culì prime che a rivassin i romans. Lis fonts romanis a disin che la decision di fondâ Aquilee e fo cjapade par aviersâ l'infuarciment di insediaments celtics, e scuviertis archeologjichis resintis a confermin che a Aquilee al esisteve un insediament preroman, e si cjatin olmis dai Celts in diviers lûcs de regjon. I lenghiscj a àn metût in lûs cetancj elements celtics te toponomastiche, ma no masse tal lessic; i etnolics a 'ndi àn cjatâts ancje in ciertis cerimoniis e tradizions. Si à ancje sostignût che la distinzion tra i abitants di cheste regjon e chei des tieris convicinis e ledi indaûr adiriture a epochis precedentis, protostorichis. Ma chestis teoriis si fondin su evidencis archeologjichis avonde sparniçadis e di interpretazion incierte; e a son precariis, stant che a son destinadis a cambiâ ancje in maniere drastiche a man a man che a saltin fûr gnûfs reperts. Une altre argomentazion a poie de tesi des lidrîs preromanis de identitât furlane e ven de notizie che, za tor il 350 d.C., il vescul Fortunazian al scriveve lis sôs predicjis in sermo rusticus; si à concludût che il popul al fevelave za, o ancjemò, une lenghe divierse dal latin uficiâl. Ma chest forsi nol baste a dimostrâ la tesi dal sostrât celtic o preistoric, o dut câs preroman, parcè che si sa che dut câs lis lenghis orâls a patissin un procès di mudament continui, e duncje di divaricazion, a pet di chês aulichis e scritis.
Al stât atuâl des cognossincis sientifichis al è duncje dificil provâ che la identitât e la individualitât dal popul furlan a tornin sù a la ete preromane. Al è plui sigûr metilis in rapuart cui fats politics che a àn dât a chest teritori centris e confins: il ducât langobart prime, e il patriarcjât di Aquilee daspò.
La storie dal patriarcjât di Aquilee e je lungje, ingredeade, e par tancj aspiets ancjemò scure. No è facil, massime pai sîs secui de Alte Ete di Mieç (V-XI), distingui i mîts e lis tradizions des veretâts storichis. Il stes vignî fûr dal titul di ‘patriarcje’ - cetant râr te cristianitât ocidentâl – al è avonde misteriôs. Po dopo, e je une vore ingropade ancje la trame tra la dimension religjose e chê secolâr, tra i podês spirituâi e pastorâi e chei aministratîfs, politics e militârs.
Dal pont di viste eclesiastic, la sede vescovîl metropolite di Aquilee romane e slargje la sô jurisdizion suntune aree une vore grande, che e va di Como a Aquincum (Budapest). Dome ae nassite dal gnûf mileni - e precisementri ai 3 di Avrîl dal 1077 - il patriarcje di Aquilee al è investît di podês temporâls, e duncje si pues tacâ a fevelâ dal Friûl tant che entitât storiche e politiche. I siei confins a son balarins e incierts, par vie des spintis centrifughis di une part de nobiltât feudâl interne e pes pressions e pes bramis di bande des potencis che a confinin. Il zûc volubil des rivendicazions e des protestis, des diferencis tra il stât di fat e chel di dirit, dal gredei jenfri lis diviersis competencis, spirituâls e temporâls, al causione une cierte confusion inte fisionomie dal Patriarcjât. Dut câs, no si pues dineâ che par cuasi cuatri secui (XI-XV) cheste regjon e je stade incuadrade intun organisim politic clamât patriarcjât di Aquilee, che i siei confins variabils si slargjavin ben oltri chel che al è il Friûl di vuê; ma ancje che la Patrie dal Friûl, tra la Livence e il Timau, tra lis monts e il mâr, indi jere la sô part plui grande e plui stabile. Chescj a son i secui li che si è formât il Friûl, tant che regjon storiche e gjeografiche; li che i abitants di cheste regjon a àn cuistât pe prime volte la lôr identitât storiche, politiche, culturâl e linguistiche.
Il patriarcjât di Aquilee al jere un principât eclesiastic feudâl, integrât a strent tal ordin imperiâl; no si àn di proietâi chei caratars di sovranitât politiche (viers l'interni e viers l'esterni), di omogjeneitât lenghistiche e culturâl, e di volontât popolâr, che a son propris dal stât nazionâl moderni. Il concet stes di nazion al jere, in chei timps, tant diferent dal nestri. Al è dificil duncje acetâ la tesi che ai timps dal patriarcjât i furlans a sedin deventâts une nazion. Chê che si è formade e je invezit la cussience di apartignî a un teritori definît e a un organisim politic indotât di une sô autonomie. Cheste cussience e restà avonde salde ancje cuant che il patriarcjât, scunît des lotis intestinis tra feudataris e tra Cividât e Udin, tibiât a soreli jevât des smiris dal cont di Gurize e a soreli a mont dai trevisans, al colà in fin tes mans di Vignesie (1420). La Dominante e mantignì in vite il patriarcjât, ancje se dispueât dai podês temporâi e sometût aes grandis fameis venezianis; e rispietà ancje, se pûr depotenziât, il parlament de Patrie dal Friûl, l'organisim rapresentatîf des abaziis, de feudalitât e des comunitâts urbanis. In cheste maniere, i abitants dal Friûl a poderin lâ indenant a tignîsi, e jessi calcolâts, tant che diviers di chei altris sotans venits. Il non stes di ‘Patrie dal Friûl’ (dispès scurtât dome in ‘Patrie’), probabilmentri in origjin riferît al patriarcjât, al deventà veicul di infuarciment di chest sens di identitât politiche teritoriâl. Cheste cussience e passà fûr i cuasi cuatri secui di dominazion veneziane, par rivâ cuasi intate fintremai ai nestris dîs. Vie pai secui, no son stadis tiradis fûr in mût sostanziâl cuistions lenghistichis ni raziâls, o etnichis (cemût che si dîs in dì di vuê in maniere plui temerose). Si deve par scontât che i furlans a fossin essenzialmentri di dissendence latine, de famee dai popui talians, e ben disseparâts dai vicins todescs e slâfs. La culture umanistiche dal timp no ricognosseve altris titui di nobiltât di un popul che chei che si riferivin ae civiltât romane antighe. Ma chest nol voleve dî dineâ ancje someancis e influencis, leadis ae vicinance gjeografiche. Di fat, te etnogjenesi dal Friûl a àn zuiât un rûl ancje i contats, i scambis, lis migrazions e il messedâsi cul mont gjermanic a nord, e cun chel slâf a est. Dal prin a son vignudis lis élites vueriris, che a àn formât par dute la Ete di Mieç il gnerf de classe dominante feudâl; ma ancje funzionaris, artesans e artiscj. Dal secont, a son vignûts massime contadins e pastôrs, che des alturis a son simpri vignûts jù viers la plane, e che si assimilavin subite tes comunitâts furlanis. E tal secul XI al è stât ancje un periodi di imigrazion massive e organizade di slovens carinzians, a ricolonizâ la fasse centrâl de planure furlane, fiscade des scorsadis ongjarichis dal secul precedent. Dut câs, ancje chescj si son assimilâts daurman ae lenghe e ae culture de regjon che ur dave acet, lassant olmis vistosis dome inte toponomastiche e inte fisionomie de int.
Glotogjenesi dal furlan
La dotrine nazionalistiche e à metût a fonde dal sens di identitât nazionâl la comunance de lenghe, e al jere inevitabil che ancje in Friûl cualchidun al vedi viodût te lenghe furlane l'element essenziâl de identitât di chest popul. Ma lis robis no son cussì facilis; ni in gjenerâl, ni tal nestri câs particolâr. In Friûl, come in tancj altris câs, almancul de ete protocristiane a son esistudis diferencis tra lis lenghis uficiâls e chês scritis, tra chês feveladis de élite dominante e chê fevelade dal popul analfabete. La lenghe scrite uficiâl e restà par plui di mil agns il latin (eclesiastic e notarîl) ma par sîs secui i dominadôrs a fevelarin lenghis di çocje gjermaniche: tal prin periodi i Langobarts, po dopo par pôc timp i Francs, e ae fin, dal secul X al XIII, lis fameis todescjis mandadis dal imperadôr e clamadis dai patriarcjis a presidiâ cheste puarte taliane dal imperi.
Daûr di cualchi autôr (Francescato), chest caratar cussì fuartementri gjermanic dal stât patriarcjin, in chei secui, al à puartât a un isolament culturâl dal Friûl dal rest de Italie setentrionâl, aviersant la difusion di chês inovazions lenghistichis e sociolenghistichis che invezit a jerin daûr a interessâ la plane padane venite, e che a varessin puartât lis lenghis di chês regjons a diferenziâsi simpri plui de madrîs latine. In particolâr, tal stât aquileiês, dulà che la cort e la nobiltât a fevelavin par todesc, la lenghe dal popul e je restade plui dongje dal latin antîc. Il caratar ‘conservadôr’ des lenghis feveladis tai lûcs isolâts al è un fenomen cetant cognossût dai lenghiscj e al sarès la spiegazion plui semplice des someancis tra lis fevelis ‘ladinis’ des Alps (invezit di chês fondadis su la ipotesi di un comun sostrât ‘retic’). In ogni câs, des fonts al risulte clâr che il furlan al esist, in formis tant dongje di chês presintis, di cuasi mil agns.
Come pardut in Italie, il ‘volgâr’ furlan al è restât a dilunc une lenghe cuasi dome orâl; cuant che si veve di meti alc par scrit si doprave il latin o, tacant dal secul XIV, variis messedancis di toscan e di venit. Dut câs, ancje il furlan al jere doprât pe redazion di documents di gjenar pratic, tant che ats contabii e notarîi. Al è de fin dal secul XIV il prin document leterari (une balade) in lenghe furlane, che e samee clarementri influençade de leterature in volgâr che di plui di un secul e florive te Italie setentrionâl, tant che prime in Provence. Un dai caratars ben cognossûts des lenghis orâls e je la lôr variance gjeografiche: ogni comunitât e tint a disvilupâ un so mût particolâr di esprimisi, par vie dal isolament relatîf di chês altris comunitâts. Ancje il furlan si è diferenziât in desenis di ‘dialets locâi’; ma la situazion e je mancul grivie che in tantis altris regjons. Dutis lis varietâts di furlan a àn un grât alt di comprensibilitât tra di lôr, e une di chestis – vâl a dî chê ‘centrâl’, de aree tra Cividât, Vençon, Sant Denêl, Codroip, Palme, Cormons, cun al centri Udin -, e je avonde omogjenie e cetant prevalente su chês altris. Su la fonde di cheste varietât si è formât, tacant dal prin Votcent, un furlan ‘leterari’ comun. Come che al è sucedût in altris regjons talianis e europeanis, tal Votcent e tal Nûfcent si pues assisti a une floridure di leterature ‘locâl’, cun pontis cualitativis ancje altis. Fintremai a timps une vore resints, il furlan al jere la marilenghe di almancul i trê cuarts de popolazion dal Friûl. Tes areis rurâls la percentuâl e podeve lâ sù ancje al 100%; in chês plui urbanis, tacant di Udin, la borghesie e fevelave dispès cualchi forme di venit o il talian, tignûts tant che plui prestigjôs e utii. La situazion e à tacât a cambiâ svelte cul slargjâsi dal oblic scolastic, cul incressi dal nivel di istruzion e, massime, cu la difusion dai mieçs di comunicazion di masse e de industrie culturâl. Si pues calcolâ che tra il 1978 e il 1999 il furlan si sedi pierdût cuntune ande dal 1% al an. A difese de lenghe furlane e je nassude za tal 1919 la Societât Filologjiche Furlane, e in timps plui resints i si son zontadis (ancje in competizion vivarose) tantis altris associazions e moviments. Tai agns Setante, chestis a àn cjapât ancje caratar politic, e si son batudis pe tutele legjislative dal furlan, ma dome tor la fin dai agns Novante si à podût otignî une leç regjonâl (n. 15 dal 1996) e po dopo une leç statâl (n. 482 dal 1999) cun chestis finalitâts. Al è ancjemò adore par stimâ la lôr eficacitât. Ae fonde di chestis azions a son cetantis motivazions. Une e je che ogni lenghe e je un valôr in se, tant che testemoneance di une esperience storiche e culturâl uniche e iripetibile. La seconde e je che ogni lenghe e je la fonde de identitât di un popul e che, tal nestri câs, il popul furlan al vûl lâ indenant a vivi cuntune sô muse. La tierce e je che i furlans a son une comunitât lenghistiche minôr che, dutune cun chês altris (slovenis e todescjis), e justifiche la ‘specialitât’ de autonomie politiche e aministrative dade a cheste regjon.
La identitât furlane
La lenghe e je dal sigûr une des fondis de identitât furlane ma si à di ancje ribati che par secui il sens di apartignince al Friûl al à vût un caratar plui politic e teritoriâl che lenghistic. La identitât coletive e je un fenomen complès, multidimensionâl. Dongje de lenghe, dal teritori, de organizazion politiche, a zuin ancje fatôrs plui culturâi in sens larc: costums, rituâi, tradizions, sens de storie e dal destin comun, cussience e volontât. Cuâi sono i elements de identitât culturâl furlane? Al è ancjemò vîf, e prevalent in cierts ambients, un ‘idealtip’ di furlan elaborât vie pal Votcent, e che al à vût te ‘ideologjie’ de Societât Filologjiche Furlane la sô codificazion: il gjenar (o stereotip) dal furlan «salt, onest, lavoradôr», essenzialmentri impastanât su la figure archetipe dal felix agricola, dal ‘bon contadin’, cun in plui une enfasi sul rûl di chestis tieris di bastion de civiltât romane cuintri il mont todesc e slâf che al sburte sui confins. De largje produzion leterarie, ideologjiche e sagjistiche sul caratar dai furlans, floride in chest ultin secul, par man sedi dai furlans stes che di osservatôrs esternis, al pâr di podê dedusi un model a cinc dimensions. Il popul furlan si caraterizarès duncje par jessi:

  1. un popul contadin, e duncje tacât ae tiere, dongje ae nature; organizât in struturis familiârs saldis e in piçulis comunitâts di paîs; lavoradôr, ma ancje indotât di capacitâts imprenditoriâls; tradizionalist e di peraule;
  2. un popul cristian, e duncje crodint, logât inte grande tradizion catoliche, indotât des virtûts de semplicitât, de umiltât, dal rigôr, de capacitât di sopuartâ cun pazience e fermece lis provis de vite;
  3. un popul nordic, e duncje fuart, grivi, lent, cidin, costumât, cun sens de organizazion e de coletivitât, ma cuntun sotfont di lancûr esistenziâl che al cjate confuart, in plui che te laboriositât, ancje tal vin, e espression tal cjant corâl;
  4. un popul di frontiere: logât intune posizion vierte ai pericui, temperât di une storie lungjone di invasions, di sacs e di bataiis; ma ancje cu la pussibilitât di vierzisi e di metisi in relazion in mût positîf cui vicins di altris culturis, di messedâsi cun lôr, di dâur acet e di jessi acetât;
  5. un popul migrant: il disecuilibri tra popolazion e risorsis al oblee di simpri une cuote di personis a slontanâsi de patrie, par cirî di lavorâ e di sorevivi in altris paîs. Tal dolôr de partence si rinfuarce l'amôr, e tai discomuts de lontanance si insalde une imagjin idealizade dal propri paîs. Intes comunitâts li che si rive, si tornin a creâ i fogolârs e si mantegnin la lenghe e lis tradizions.
Dut câs, si à di rimarcâ che chest model al spiele massime une realtât storiche e sociâl avonde circoscrite: chê dal Friûl sù par jù tra il 1870 e il 1970. Pôc e nuie o podìn dî de realtât plui antighe, medievâl, parcè che la documentazion storiche archeologjiche su la vite dal popul minût e je une vore scjarse, cuasi inesistente. Lis massis contadinis a son ‘cence storie’. La imagjin dai furlans che nus da la documentazion storiche de Ete Moderne (sec. XV-XIX) e je invezit avonde diferente di chê dal tart Votcent: il popul furlan (ven a stâi, pe plui part, i contadins) al è descrit dispès tant che rissôs, violent, sflacjon, indissiplinât. E je dal sigûr la imagjin che a 'ndi àn i parons e i tutôrs dal ordin, par enfatizâ chescj aspiets negatîfs (il stereotip dal villain, ven a stâi dal ‘trist’), plui che chei di segn contrari. Ma a son ancje tantis provis evidentis di chest aspiet dal caratar furlan di cualchi secul indaûr: storiis di barufis, banditisim, delits, riviei e solevazions. Par dutis, e baste vê indiment la «crudel zobia grassa» dal 1511, la plui violente, sprolungjade e slargjade rivolte contadine de Italie rinassimentâl. Al è clâr che il model identitari, che o podìn definî tradizionâl, al spiele aromai ben pôc ancje il Friûl dai ultins decenis: un Friûl une vore disvilupât, siôr, secolarizât e mediatizât. Un Friûl dulà che i contadins no son plui, rimplaçâts di un 5% di imprenditôrs agricui modernis; dulà che lis campagnis a son puntinadis di insediaments industriâi; dulà che la maiorance dai atîfs e je impleade tal terziari, plui o mancul avanzât; e dulà che la emigrazion e je dome un lontan ricuart, sostituide de imigrazion di int di ogni colôr, che e ven di une setantine di paîs di dut il mont.