Cundizion Sociolinguistiche
I studis di caratar sociolinguistic a rapresentin un bon strument di misurazion e di valutazion de cundizion di une lenghe intune societât. Cun di plui, come che al sucêt pal furlan, a puedin furnî informazions impuartantis a chei che a viodin di politiche e di planificazion linguistiche, e ufrî sugjeriments che a permetin di tarâ miôr che si pues i intervents sul teritori tutelât.
Dal 1977 a vuê, in Friûl a son stâts puartâts indevant diviers studis su la cundizion sociolinguistiche de lenghe furlane, cul fin di cjatâ il numar di chei che le fevelin, i contescj dulà che si dopre cheste lenghe, lis opinions e i compuartaments dai furlanofons leâts ae marilenghe. O vin duncje un cuadri avonde precîs des dinamichis linguistichis dal furlan, che in part si darà cont in chest lavôr.
Lis primis ricercjis in chest cjamp a nivel regjonâl o provinciâl a son stadis curadis dal Istitût di Sociologjie Internazionâl di Gurize (ISIG), tal 1977 e tal 1986. Invezit, tal 1998, e tacà une indagjin curade dal Dipartiment di Economie, Societât e Teritori de Universitât dal Friûl, cul obietîf di rilevâ lis tindincis evolutivis e lis dinamichis sociolinguistichis de lenghe furlane tai vincj agns dopo de prime ricercje.
Un altri studi al è stât sierât tal 2003 li dal Centri Interdipartimentâl di Ricercje su la culture e la lenghe dal Friûl (CIRF) de Universitât dal Friûl: in chest câs, si à volût lâ indevant cuntun gnûf filon di studis, indreçât a rilevâ la frecuence e i cjamps di ûs dal furlan, lis opinions, i compuartaments e lis cognossincis di grups specifics par etât o par altris carateristichis anagrafichis, sociâls e culturâls. Tal specific, chest studi sociolinguistic al à rivuardât un campion di adolessents che a son a stâ in Friûl, di etât cjapade tra i 15 e i 18 agns.

INZORNAMENT 2015
Tal 2015 la ARLeF cu la colaborazion de Universitât dal Friûl, sot dal coordenament dal responsabil sientific Claudio Melchior, e à presentât i dâts complets de ricercje sociolinguistiche su la lenghe furlane realizade tal 2014.
Tra i dâts plui significatîfs si segnalin la difusion e la comprension dal furlan sul teritori dulà che al è stât fat il scandai.
In dì di vuê, tes provinciis di Gurize, Pordenon e Udin, a son a stâ 600.000 personis che a fevelin par furlan. Di chestis, 420.000 lu fevelin in maniere regolâr, 180.000 in maniere ocasionâl. Si trate di plui dal 60% de popolazion des trê provinciis. Se si cjapin dentri tal cont ancje i abitants de provincie di Triest, i fevelants par furlan a son cuasi la metât de popolazion complessive dal Friûl Vignesie Julie.
La comprension de lenghe furlane, ancje tra cui che no le fevele, e rivuarde cuasi la totalitât des personis: in provincie di Pordenon e Gurize, plui dal 83% de popolazion al capìs il furlan. Cheste percentuâl e passe plui dal 96% tal câs de provincie di Udin. Chest al vûl dî che, tal complès, plui dal 90% dai abitants des trê provinciis consideradis al declare almancul di capî la lenghe furlane.
Par viodi ducj i dâts de ricercje, o podês consultâ la sezion di pueste che o cjatais a chest link: La lenghe furlane in dì di vuê