Cine
Il cine furlan al nas vie pai prins agns Otante cun Maria Zef di Vittorio Cottafavi, film tirât fûr dal romanç omonim di Paola Drigo scrit intal 1936, al conte une storie che Cottafavi di tancj agns al veve chê di puartâ sul scherm. Ambientât in Cjargne, Maria Zef al pant la tragjedie di une zovine che par difindisi e soredut par difindi sô sûr des sgrifis dal barbe, che cun chel a scugnin dividi la vite tal mieç des monts, e finìs par copâlu. Pe realizazion di chest film, un rûl fondamentâl lu à vût il scritôr Siro Angeli che no dome al è l’autôr de senegjature, ma al interprete in mût magjistrâl la figure dal protagonist.
Il film, dopo jessi stât trasmetût plui voltis de RAI regjonâl, al è stât presentât in putrops festivals e manifestazions internazionâls. Zirât in 16 mm, e daspò sglonfât in 35 mm, il film no si cjate vuê in condizions di jessi proietât. Di fat, lis copiis che a son restadis a àn dal dut smavît il colôr e ancje buine part dal sun al è lât ruvinât. Par no pierdi chest patrimoni de nestre cinematografie, un trop di realtâts culturâls - la Cineteche dal Friûl di Glemone, il C.E.C. (Centro Espressioni Cinematografiche) di Udin e Cinemazero di Pordenon – di agns incà a cirin di rivâ a di un restaur de copie e di cjapâ dentri intal progjet altris realtât e naturalmentri la RAI che e à i dirits. Il progjet al previodarès ancje la distribuzion dal film in DVD acompagnât di un libri curât dal critic Sergio Grmek Germani.

Tai agns di Maria Zef si produsin ancje altris lavôrs sedi amatoriâi che professionâi, tant che I varès volût vivi di Pittini o lis versions furlanis, dal 1986, de trilogjie Cuintrileture part prime, seconde e tierce (une version insiorade cun gnûfs contribûts) di Marcello De Stefano, un dai regjiscj plui atents ae nestre realtât, che al torne a proponi, cul film/saç, la cuistion furlane sot ducj i ponts di viste.
Prime di chel moment, i pôcs films produsûts in Friûl a jerin ducj par talian. Tra chescj o ricuardìn La sentinella della patria di Chino Ermacora e soredut Gli ultimi di Vito Pandolfi e David Maria Turoldo. Un contribût decisîf pe vitalitât de nestre produzion al ven de Mostre dal Cine Furlan, festival bienâl che il Centri Espressions Cinematografichis di Udin al à creât tal 1988 par inviulâ e fâ cognossi il nestri cine.
In gracie di cheste manifestazion, vie pai agns Novante a cressin la cualitât e la cuantitât dai prodots: dal luncmetraç a sogjet al documentari, dal film sperimentâl ae animazion.
La setime art e tire dentri simpri plui apassionâts e professioniscj. Tra chescj o podìn citâ figuris tant che Lauro Pittini, Lorenzo Bianchini e Massimo Garlatti-Costa par ce che al rivuarde la fiction; Benedetto Parisi, Giancarlo Zannier pes flabis e pes contis popolârs; Dorino Minigutti e Renato Calligaro pai films di caratar didatic e artistic; Remigio Romano, Carlo Della Vedova e une altre volte Parisi pai documentaris. In conclusion, o podìn dî che tal cjamp cinematografic in Friûl e je daûr a svilupâsi une alte professionalitât condizionade, magari cussì no, di masse limits di nature struturâl e organizative.

Il cine di Marcello De Stefano
Marcello De Stefano - autôr ancje di une senegjature li che i protagoniscj a fevelin par furlan, scrite intai agns 1954-55 cuant che al frecuentave il Centri Sperimentâl di Rome – al capìs subit la impuartance de lenghe tant che element di fonde pe identitât di un popul e no dome tant che aspiet purementri espressîf e esteriôr. Al è cussì che intai agns che a van dal 1981 al 1984 al zire Grafiz tun orizont su la figure dal beât Luîs Scrosoppi, la prime opare a caratar religjôs dal nestri cine. E plui tart, tal 1986, al decît di meti adun la version furlane di chê che e je la sô vore plui impuartante sul sens e sui valôrs che une etnie e pues puartâ tal mont di vuê, ven a stâi la trilogjie Controlettura – Una linfa che scorre – Uomo, macchina, uomo, che e deventarà cussì Cuintrileture part prime, seconde e tierce.

Chel di De Stefano al è un cine particolâr, un cine a mieze strade jenfri il documentari e la finzion, in chel jenfri che lui al definìs “film-saç”. Une vore che sul plan estetic al rapresente une ricercje di gnûfs lengaçs, e sul plan dai contignûts no si ferme ae pure documentazion de realtât ma e cîr di trasmeti al public une interpretazion origjinâl dal mont e di stiçâ la discussion e la riflession.
In Cuitrileture part prime si viodin trê zovinis turistis che a visitin il Friûl. Traviers dai monuments, des oparis di art e dai documents che lis trê protagonistis a scuvierzin, il regjist al propon une sorte di cuintrileture de storie e de art dal Friûl, vâl a dî che al da une gnove interpretazion di ce che al ven rapresentât marcant cussì la specificitât dal popul furlan e de sô lenghe.
Te part seconde al documente i lavôrs di ricostruzion e di ampliament dai condots de aghe tes zonis taramotadis e tes Valadis dal Nadison. De Stefano al dopre chês imagjinis par meti in relazion passât e presint, tradizion e tecnologjie, e par svilupâ un discors che al met in valôr la storie di un popul che no si rint a pet des disgraziis.
Te tierce part il regjist al passe in rassegne lis ativitâts artesanâls, il lôr rapuart cul mont contadin e la continuitât che chestis a àn mantignût, ancje parentri de societât moderne. Une continuitât che e pues rapresentâ un valôr ancje pal Friûl di doman.
Oltri ai films citâts, Marcello De Stefano al realizarà, dal 1971 a vuê, altris 9 luncmetraçs.

La Mostre dal Cine Furlan
Il 1988 al rapresente di sigûr un moment impuartant pal svilup dal nestri cine, un volt che al darà gnovis pussibilitâts ae produzion di chenti.
Di fat in chel an, ideade e organizade dal CEC di Udin, e nas la Mostre dal Cine Furlan, un festival bienâl, competitîf, par films in lenghe furlane. Si trate di un spazi che al ven metût a disposizion ai cineascj che a puedin cussì fâ cognossi lis lôr voris e di un apontament che al vûl jessi (e che al sarà) un mût par stiçâ la nassite e il svilup di une gnove cinematografie.
La prime edizion si presentave come un “esperiment” che al veve chê di scandaiâ la disponibilitât dai professioniscj e dai passionâts di cine a produsi films par furlan e di stazâ la rispueste dal public. La partecipazion e fo subit une sorprese che e lassave ben sperâ pal avignî e, lant indenant une edizion daûr di chê altre, si è podût assisti a une incressite cualitative des voris presentadis, dal interès de int e dai cinefii. La Mostre e deventarà cussì, a planc a planc, une farie di gnûfs autôrs tant che: Lauro Pittini, Benedetto Parisi, Giancarlo Zannier, Dorino Minigutti, Paolo Cantarutti, Massimo Garlatti-Costa, Remigio Romano, Carlo Della Vedova e tancj altris.

Te seconde edizion dal festival (1991) al vinçarà un curtmetraç di Lauro Pittini intitulât I varès volût vivi. Il film, che al jere stât zirât in Super8 ancjemò intal 1981 e trasponût suntun supuart eletronic, al conte une storie vere, il drame di un emigrât che al torne tal so paîs dopo vê lavorât par agns in miniere. Aromai vieli e malât di silicosi, il protagonist si interoghe sul sens de vite e sul parcè di tant patî. La origjinalitât e la fuarce dal film a vegnin fûr de capacitât dal regjist di trasmeti la dramaticitât de storie e soredut pal fat che il personaç al interprete se stes e ce che al conte e je la vite che lui al à vivût pardabon.
Al è di segnalâ ancje un altri film interessant, presentât in chê edizion: Cjossul di Michele De Mattio, un curtmetraç che, traviers di un straordenari blanc e neri, miscliçant finzion, documentari e ricercje formâl, al piture la storie di un personaç singolâr. Di fat, la sperimentazion e scomençarà une vore adore a imparêsi su la sene furlane. Simpri tal 91, in fats, o podarìn viodi doi lavôrs di pure ricercje stilistiche e formâl, tant che Rivoluzion planetarie di Paolo Cantarutti e L’omp di Daniela Toneatto.


Tal 1993 Lauro Pittini al jes cul luncmetraç Prime di sere, un film tirât fûr dal romanç omonim di Carlo Sgorlon. Zirât in Betacam, cence nissun jutori finanziari particolâr, Prime di sere al rapresente la sintesi di dut il cine di Pittini: un cine che al va in dentri tai personaçs scrusignant lis lôr psicologjiis, un cine che si interoghe sui dramis umans e sul sens de vite.
Il film al conte la storie di Liseo, un om condanât par omicidi che al oten la liberât par buine condote dopo agns di preson. Segnât moralmentri e socialmentri, Liseo al cirarà in ducj i mûts di tornâ a inserîsi te societât. Ma al varà di frontâ i prejudizis de int, lis dificoltâts di cjatâ un lavôr, la malfidance e, cualchi volte ancje la tristerie dai oms. Bandonât dai siei parincj, Liseo al larà a stâ intune stanzie che une vedue, restade sole cun so fi, i afitarà. Par lui cheste femine e so fi a rapresentin ce che nol à mai vût: une famee e la comprension. Al contrari dal romanç, la conclusion dal film e reste vierte, lassant in sfrese la puarte su la sperance.

Nassût a Schaffhausen in Svuizare tal 1961, Lauro Pittini al scomence a 15 agns a zirâ films in Super8. Tal 1984 al colabore pes ripresis e pe senegjature ae realizazion dal film Pinsîrs par dôs Istâts di Rino Gubiani (vincidôr ae prime edizion de Mostre). In plui dai films che o vin citât, tal 1983 al realize Colôrs di vite, tal 1996 al firme la coregjie di L’ereditât e tal 1999 al zire Pieri Menis, ricuarts di frut (segnalât ae VI edizion de Mostre e viodût di centenârs di arlêfs tes scuelis). I siei lavôrs a son stâts presentâts e a àn vût ricognossiments ancje in altris paîs de Europe. Cun di plui, al à colaborât cu la RAI e al à scrit dôs voris premiadis al Concors par senegjaturis.

Intal 1994 Benedetto Parisi al realize Dopli funerâl, conte popolâr, li che si intopin i disens di Laura Feruglio e la vôs di une viele di Preon, regjistrade de antropoliche Enza Sina. Parisi al veve scomençât a trasponi in film liendis e flabis fintremai dal 1988, cuant che al presentarà sui scherms dal festival di Udin Cui isal content in chist mont?, un lavôr realizât cu la tecniche videografiche. Il curtmetraç al vinçarà in chel an il prin premi. Tal 1991 al metarà in sene doi films: Une gnot in paradîs in colaborazion cun Gianfranco Casula, simpri cu la stesse tecniche, e No è cussiença in chist mont, cun atôrs e mascaris origjinâls e, tal 1992, La grape d’aur li che al dopre lis sagumis rielaboradis dai atôrs.
Il so viaç intal mont des flabis e des tradizions al va indenant tai agns seguitîfs cu la realizazion di La rusignole di Cretelungje (1995) (flabe ladine voltade par furlan) e cu la colaborazion te metude adun di trê films di animazion - Cua, cua cua tachiti là; Il frut tal sac e Il princip bambin – realizâts, tal 2001, dai students dal IPSIA di Glemone.
Ma un altri setôr che al stice l’interès di Parisi, al è il documentari. L’autôr al à ancje firmât il film plui curt de storie dal cine: Integrazion (1997) che al dure dome un minût.

Giancarlo Zannier intal 1995 al realize Benandants un dai pôcs luncmetraçs dal nestri cine. Par chest film su la figure dai strions bogns che a combatevin in sium lis fuarcis dal mâl, Giancarlo Zannier al dopre diviers stîi e nivei di leture: chel realistic par meti in sene i procès incuisitoris daûr dai documents storics e chel fantastic par rapresentâ i “viaçs” in spirt che a fasevin i Benandants tes batais cuintri dai strions dal mâl.
Giancarlo Zannier al veve scomençât tal 1988 curant la regjie di Il copari de muart, une conte interpretade di Renata Chiappino, la protagoniste di Maria Zef. Chei altris siei films a saran Il timp dal venc (segnalât ae Mostre dal 1991) e Meni Fari, 40e...buine!!!, une rileture in clâf moderne di Meni Fari, zirade intal 2001.

La videodidatiche e il documentari
Videoscais, un adun di episodis che a àn tant che protagoniscj i membris di une famee, al è il prin esperiment di videodidatiche pal furlan. Promovût de Catedre des lenghis modernis de Universitât di Udin tal 1991, direzût di Giancarlo Velliscig, il video al nas te suaze di un progjet di educazion bilengâl talian-furlan. Doi agns dopo, simpri in chel cuadri, Renato Calligaro al realize Lis striis di Gjermanie un video, tirât fûr de omonime conte di Catarine Percude, li che l’artist al misclice in mût creatîf i siei disens cun ripresis di atôrs; fantasie e realtât. Tal 1995 Dorino Minigutti al realize Bielscrivint, storie di une frute, Miute, che si piert intal “mont de scriture” e che par saltâ fûr e ven judade di une agane. Dorino Minigutti al è l’autôr di documentaris e films di finzion, soredut su problematichis di caratar sociâl (handicap, dipendence de droghe, Aids) e si è dedicât ancje ae scriture di senegjaturis. Tal 1999 al realize Intrics, storie fantastiche di strions, maçarots e fruts, ducj ator di une machine che e prodûs filastrocjis e proverbis intant che l’orcolat Mastiefumate al fâs di dut par fermâle. Simpri dentri di chest progjet tal 1997 Giuseppe Bevilacqua e Mara Udina a vevin realizât Linea dreta, linias dretas tirât fûr di une conte dal poete Leonardo Zanier che, in cheste “fantasia ator di una storiuta cjargnela”, al interprete se stes.

Se o considerìn La sentinella della patria (1927) o podìn dî che il cine furlan al nas come documentari. E la produzion documentaristiche e varà di fat une part impuartante ancje dopo. Tal 1996 Marco Rossitti (docent di storie dal cine) al realizarà Il liutâr une sorte di omaç poetic a cheste nobile profession vive ancje ca di nô. Dut câs, za tal 1988, Antonio Magliocchetti al veve realizât Jo o soi stade dome une volte al cine, un film-interviste che al vinçarà il secont premi ae Mostre. Carlo Della Vedova e Luca Peresson, tal 1999, a scrutinaran la realtât de comunitât furlane di Colonia Caroya (Argjentine) cun Farcadice (trasmetût ancje de television ladine) e intal stes an Benedetto Parisi – che, te sô produzion par talian al veve scandaiât la realtât Rom e la gnove imigrazion - al piture la umanitât di un personaç fûr dal ordenari, un artist di strade, Tony Zavatta, in Tony. Il stes autôr al realizarà, tal 2001, Gnovis dal Brasîl un video su la figure e lis sieltis di vite di un missionari furlan intune des zonis plui puaris dal Brasîl.

Par completece o ricuardìn achì La fontana di Bosplans (1997) di Michele Marcolini e Vuere dome di ricuarts di Gianni Fachin (premiât ae VII edizion de Mostre).
Un discors a part a mertaressin i lavôrs di Remigio Romano, che, traviers de imagjine filmade, al ricostruìs un mont aromai disparît. In Une zornade a seselâ (1993), al riprodûs il lavôr tai cjamps cemût che si davuelzeve ancjemò tai agns 30 e 40 e in Il purcit (1997) al ricuarde, cu lis peraulis di Mauro Corona, il sens e la impuartance che e veve cheste bestie par une famee contadine.
Intal 1997 Massimo Garlatti-Costa al met adun Il piligrin, un lavôr a mieze strade jenfri sperimentazion, provocazion e divertiment. Agns prime, il regjist, che cumò al vîf e al lavore in Grande Bretagne, al veve realizât cul grup dai “Slapagnots” (Roberto Copetti, Massimiliano Lancerotto e Fabio Venuti) un film “demenziâl” intitulât Tele Frico (1993) e plui tart, dôs altri voris di ricercje: La sielte (1994) e Precarie Armonie (1995). Ma al sarà tal 2001 che Garlatti al metarà adun il so lavôr plui finît, un film che al varà ancje un straordenari sucès di public intune sale comerciâl: Buris, libars di scugnî vignî. Si trate di une comedie di 38’ che e piture un imagjinari paîs dal Friûl li che, par vignî fûr de crisi economiche, un disocupât al met impins une societât di produzion di films porno, che e deventarà in curt nuie mancul che une des industriis cinematografichis plui fuartis dal mont.
Cun Buris si vierç une gnove ete pal cine furlan, pal fat che si prospete la idee di podê rapresentâ situazions e gjenars in câs di superâ une vision localiste. Ma, come che o viodarìn plui indenant, chest salt di cualitât nol è simpri e dal dut esent di ambiguitâts.

In chest contest, tal 1999 Lorenzo Bianchini al zire I dincj de lune, prin horror par furlan. Il film, intun stîl che al deventarà la marche dal autôr, al met dongje aspiets e ambientazions carateristichis di chi cun elements costitutîfs dal horror classic. Tal 2001, Bianchini al realize Lidrîs cuadrade di trê, un luncmetraç che al viôt protagoniscj trê students di un istitût superiôr. I trê, dopo jessisi rindûts cont di vê falât un compit in classe decisîf, par no scugnî ripeti une altre volte l’an, a decidin di jentrâ di gnot te scuele par rimplaçâ i compits sbaliâts prime che il professôr ju corezi. Ma in chê gnot al sucêt alc che no vevin previodût e a scuvierzin robis che no varessin vût di vignî a savê.
Il film, che al è stât proietât in variis ocasions, simpri cuntun grant sucès di public, al è ancje stât recensît di une riviste francese.
Bianchini al à finît e mostrât al public, che al è pôc, un altri so film, intitulât Custodes bestiae, ma che al presente dome in piçule part dialics par furlan.

Tal gnûf contest che o vin dit disore si à, dut câs, il sintiment che l’ûs de lenghe al resti dispès leât a une concezion strumentâl, vâl a dî che la lenghe e vegni doprade plui cu la preocupazion di “jessi fidêl a une realtât particolâr” che no come un codiç di comunicazion, cun dut ce che une sielte dal gjenar e puarte daûrsi. In altris peraulis si à la impression che l’autôr si meti denant di un “obiet” che “no i parten” ma che al “parten dome ae realtât che al piture”. Paradossalmentri, se di une bande si spanissin i contignûts, se si frontin i gjenars, se si scandain gnovis ambientazions, di chê altre si lasse la lenghe incjadenade a une dimension autoreferenziâl, condanade a restâ un sempliç furniment espressîf, impen di jessi il veicul comunicatîf.

I agns che a van dal 1999 al 2001 a rapresentin un moment avonde ecezionâl pe nestre produzion cinematografiche, sedi sul plan cuantitatîf, sedi su chel cualitatîf. Di fat, a son di chei agns films che o vin za nomenât, tant che Pieri Menis, ricuarts di frut; Farcadice; Tony; Lidrîs cuadrade di trê; Gnovis dal Brasîl; Buris, libars di scugnî vignî. Ma ancje lavôrs come La muart cui çucui di Giorgio Milocco e Andrea Nardon (1999), un film di 22’ che al da fûr, zuiant suntun blanc e neri suturni, une straordenarie fuarce espressive. E je la storie di une prime zornade di vore di un zovin. Une fabriche isolade tal mieç di cjamps pustots, un ambient di lavôr malsan, un paron tiranic a fasin di suaze aes disaventuris che il zovin al scugne paidî, come intune sorte di vencul. Il film al è dutun fantastic e simbolic (la viele cui çucui che il fantat al intope, i scjaps di corvats, une fabriche che di fûr e samee un lûc bandonât) e intal stes timp realistic (il mont dal lavôr cui siei machinaris e cui siei ritmis infernâi).
Intal 2001, il regjist Manlio Roseano al realize un film tirât fûr di un romanç di Sergio Cecotti, Il tierç lion: un poliziesc cun parentri elements di caratar metafisic, altri esempli di film di gjenar. Zirât in 16 mm, Il tierç lion al ven però realizât in lenghe taliane e dome dopo dopleât par furlan e distribuît in chê version in formât Betacam.

La ultime edizion de Mostre (2003) e premiarà il luncmetraç di Remigio Romano Âstu mai pensât di sposâti...in Comun? une parodie dai “Promessi sposi” ambientade in dì di vuê (mandade ancje in onde su la RAI regjonâl); e segnalarà Cuatri cjantons par une “francje” di Carlo Damasco (cun Giuseppe Battiston; intune storie scrite di Giovanna Zorzenon premiade al Concors par Tescj cinematografics dal 2002); Lûs distudadis di Nicola Fraccalaglio e Thomas Marcuzzi e pe sezion dedicade ai fruts il film di Liviana Calabrò La roie di Cussignà.

Par sierâ chest percors, no podìn fâ di mancul di ricuardâ il film di Christiane Rorato Vuerîrs de gnot, su lis olmis dai Benandants, presentât al d’Essai di Udin ae fin dal 2003. Il documentari, partint di un libri dal storic Carlo Ginzburg, al scandaie ce che vuê al è restât dai Benandants, i “strions bogns”, processâts tal 500 de Incuisizion e, plui in gjenerâl, al puarte indenant une ricercje su lis tradizions che a son restadis ancjemò vivis tal Friûl di vuê.
I ultins svilups: 2004-2012
A tacâ dal 2004 si viôt un svilup straordenari dal documentario, sedi inte sô forme classiche, sedi in chê creative, dal reportage e de ricostruzion storiche. Dongje dal za citât Friûl, viaç te storie di Massimo Garlatti-Costa, Dorino Minigutti, zuiant cu lis imagjins di archivi, al met adun intal 2004 Nûfcent, viodesclesis dal Friûl, un collage di dîs mini storiis, che ognidune e rapresente un deceni dal secul a pene passât: events sociâi e politics che a àn segnât, a voltis in mût tragjic, la vite in Friûl. Minigutti, al à cjapât sù e selezionât lis imagjins di archivi plui significativis e plui inusuâls par insedâ, par mieç di un montaç singolâr, riflessions che a tirassin fûr la storie de nestre tiere intun mût gnûf, metint in valôr sedi i moments dificii che chei comics e sghindant ogni forme retoriche o nostalgjiche.
Il film al è dividût in dôs parts, Nûfcent, videosclesis dal Friûl (part I), metût adun intal 2004, cui prins cinc episodis che a cjapin dentri la prime part dal secul, e la seconde part che e sarà metude adun intal 2006. Cun chest lavôr Dorino Minigutti al vinçarà il premi “Mario Quargnolo” intal 2007, premi assegnât de Mostre dal Cine Furlan.
Intal 2005, Stiefin Morat e Giorgio Cantoni a introdusin, intun documentari che al viôt protagoniscj il Tiliment e ducj chei che a vivin su lis sôs rivis, une fuarte dose di sperimentalisim. Titul dal film Mugulis, prin premi ae Mostre dal Cine Furlan 2005. Stefano Morandini, cuntun rût stîl classic, al documente cu la sô videocjamare, une des tradizions ancjemò une vore fuarte in Cjargne, ma che e jere vive in dut il Friûl, chel di doprâ lis craçulis e i batecui di len (al puest des cjampanis intai dîs de Passion. Titul: Crasulas a Enemonç, menzon speciâl e premi “Mario Quargnolo” in chel stes an.
Chê altre grande saghe documentaristiche e je rapresentade de serie Farcadice di Carlo Della Vedova e Luca Peresson. Screade intal 1999 cun Farcadice - Diari di viaç, Colonia Caroya, Argjentine, chê che al deventarà un progjet seriâl cul assum di documentâ lis variis fasis de emigrazion furlane ator pal mont, al propon intal 2006 il secont volet de serie, Farcadice, diari di viaç: Charleroi, Belgjiche, relatîf a un dai episodis plui dramatics de nestre emigrazion, chel che al à viodût i furlans lassâ la lôr tiere par lâ a vore e, masse dispès, a pierdi la vite o malâsi di silicosi, tes minieris de Belgjiche.
Ma il 2006 al viôt ancje altris documentaris di cualitât come Sul troi par Lucau di Lauro Pittini che al met in imagjins une des tradizions plui significativis de Cjargne, chê di un pelegrinaç che dongje dal valôr sacrâl al à simpri vût l’assum di meti in relazion doi popui confinants: chel furlan e chel carinzian.
Altris documentaris vignûts fûr in chel an cussì produtîf a saran L’amôr une volte di Michele Federico; Storiis in cuatri lenghis di Erica Barbiani, Sergio Beltrame e Elena Vera Tomasin (premi Quargnolo 2007); Furlans di Romania di Gianni Fachin e La Fradaie dai Teracîrs e Mosaiciscj Furlans inte Americhe dal Nord di Irene Rubini. Chest ultin lavôr, che al fâs lûs su la storie plurisecolâr e incredibile sui mosaiciscj e teracîrs furlans ator pal mont, sul lôr talent e su lis lôr oparis, al cjatarà une continuazion doi agns dopo cun La lungje strade dai teracîrs e mosaiciscj furlans in Europe de stesse regjiste.
Intal 2007 e sarà la volte di Farcadice, diari di viaç, Umkomaas, Sud Afriche, tierç volet di Farcadice cuntune incursion te fortunade diaspore furlane in Sud Afriche che si completarà, subite dopo, cul cuart episodi che nus puarte cuntun salt spazitemporâl li de comunitât furlane di Toronto cun Farcadice, diari di viaç, Toronto, Canada.
Dorino Minigutti, de bande sô, al torne cuntun documentari sportîf Il balon tal cjâf, une serie di 8 intervistis cun ancjetancj atletis e un inspietât Fernando Birri, protagonist innomenât dal cine mondiâl che cul curt poetic e plurilengâl Elegia friulana al à volût ricuardâ lis sôs origjins.

Par finî, ma no par ultin, Rumore bianco di Alberto Fasulo, imni al Tiliment, aes tieris che al bagne e ai oms e aes feminis che a vivi su lis sôs rivis. Fasulo, origjinari di Sant Vît al Tiliment, al è un autôr (vuê ancje produtôr) cuntune cariere cinematografiche di dut rispiet. Prime di frontâ la regjie cun Cos’È che cambia ?, un documentari in onôr de sô citât di divignince, Fasulo al à vût colaborât cun varis regjiscj tant che assistent ae regjie, assistent operadôr, operadôr, fonic di prese direte. Cumò al è daûr a produsi un secont documentari par furlan intitulât Babel blu (che al à tant che teme la bandiere furlane) direzût di Renato Rinaldi.
O vin ancje di ricuardâ il biel documentari di Fredo Valla e Nereo Zeper Cjavelârs e pelassíers sui cjavelârs che des valadis ocitanis (innomenât par chest al jere il paîs di Elva) a traviersavin dute la planure padane par rivâ fin in Friûl. Fredo Valla, documentarist ocitan autôr, dongje altri de storie e de senegjature dal film E il vento fa il suo giro / E l'aura fai son vir direzût di Giorgio Diritti (2007), al è di tancj agns in rapuart cul Friûl li che al à presentât tancj siei films in variis edizions de Mostre dal Cine Furlan e li che un an al à ancje fat part de jurie.
Il 2012 al è l’an di realizazion dal film Visins di cjase direzût dai glemonats Marco Londero e Giulio Venier e al è tirât fûr di une senegjature di Renzo Brollo che e à vût une segnalazion al Concors par Tescj Cinematografics.

La prime sitcom in lenghe furlane e ven metude adun e mandade in onde de RAI (sede regjonâl pal il Friûl – Vignesie Julie) intal 2008: titul Autogrill. Si trate di sîs pontadis metudis adun di Claudia Brugnetta.
La prime serie televisive par furlan, ma no ancjemò lade in onde, si intitule Felici ma Furlans e e je stade ideade e direzude di Alessandro Di Pauli e Tommaso Pecile. I prins mini episodis a son stâts metûts adun intal 2012.