Comitât Tecnic Sientific

PRESIDENT
Lorenzo Fabbro
email: presidente.arlef@regione.fvg.it


COMPONENTS
Erika Adami
Dotore in Conservazion dai Bens culturâi, orientament bens storics, artistics, architetonics inte Etât Contemporanie e je une gjornaliste praticante, cun funzions di prime redatore e responsabile de comunicazion in lenghe furlane pal setemanâl “La Vita Cattolica”.
E lavore come assegnade ae stampe in tantis iniziativis e par diviersis Associazions e e je stade docente al master Insegnare in lingua friulana de Universitât dal Friûl.
È je componente dal Comitât Tecnic Sientific de ARLeF tant che esperte intal ûs de lenghe furlane intai mieçs di comunicazion.


Marisa Comelli

Insegnante di scuele primarie, referente pe lenghe furlane e colaboradore dal Dirigjent Scolastic intal Istitût Comprensîf di Faedis, e je ideadore e colaboradore di progjets impuartants su la didatiche dal furlan, e ancje relatore in tancj cors di formazion e di inzornament e in cunvignis a nivel nazionâl sul teme de didatiche dal furlan tant che lenghe minoritarie. E je ancje autore e colaboradore di publicazions su lis esperiencis didatichis intal mont de scuele e de educazion bilengâl.
È je componente dal Comitât Tecnic Sientific de ARLeF tant che esperte di didatiche de e inte lenghe furlane.


Alessandro Di Giusto
Gjornalist professionist, espert intes inchiestis su lis cuistions ambientâls, sociâls e sientifichis, al è responsabil des pagjinis dedicadis ae lenghe e ae culture furlane dal setemanâl “Il Friuli”. Di timp, al à funzions di responsabil des relazions publichis, assegnât ae stampe e consulent pe comunicazion par diviersis societâts e associazions. Al è stât diretôr di dôs rivistis, e a vuê al cure e al condûs ancje trasmissions televisivis dedicadis ae informazion pe emitente Telefriuli.
Al è component dal Comitât Tecnic Sientific de ARLeF tant che espert intal ûs de lenghe furlane intai mieçs di comunicazion.


Fabiana Fusco
Dotore in Lenghis e Leteraturis forestis e je professore ordenarie di Glotologjie e linguistiche tal Dipartiment di Lenghis e leteraturis, Comunicazion, Formazion e Societât de Universitât dal Friûl.
E davuelç di simpri ativitât didatiche su tematichis di linguistiche, dinamichis interlinguistichis, comunicazion, traduzion, sociolinguistiche, plurilinguisim e sperimentazion CLIL, ocupantsi ancje di ativitât editoriâl e redazionâl. E je responsabile di diviers progjets di ricercje, che a interessin dispès il mont dal furlan e, in particolâr, lis sôs varietâts e il so ûs tra i zovins. E je Diretore Vicjarie e colaboradore sientifiche dal Centri Internazionâl sul Plurilinguisim de Universitât dal Friûl e za referente de convenzion tra Universitât e Regjon Friûl-Vignesie Julie, sul afidament, al ateneu udinês, di un plan di ricercje, insegnament e formazion su la lenghe e la culture furlane.
È je componente dal Comitât Tecnic Sientific de ARLeF tant che esperte di linguistiche cun riferiment soredut ae planificazion linguistiche.


Patrizia Pavatti
Dotore in Materiis Leterariis, e je Retore e Dirigjente dal Convit Nazionâl Paolo Diacono di Cividât. E à vût rûi di Dirigjente aministrative par compits che a àn a ce fâ cu la autonomie scolastiche, la formazion di dirigjents scolastics, progjets europeans e lenghis forestis. E je stade valutadore esperte in tancj Programs comunitaris, e e je autore e coautore di diviersis publicazions ministeriâls su lis tematichis de scuele e de formazion; e realize ancje progjets europeans pes scuelis e progjets di campus internazionâi par students.
È je componente dal Comitât Tecnic Sientific de ARLeF tant che esperte di didatiche dal e inte lenghe furlane.

Fabiano Rosso
Operadôr culturâl, dal 1988, al Centro Espressioni Cinematografiche, al è espert intal cjamp de editorie e dal gjornalisim. Specializât intal ambit de cinematografie, al colabore cun varis periodics locâi e al à curât publicazions tant che saçs e articui dedicâts al mont dal cine. Al è curadôr di manifestazions, events, cunvignis e incuintris su tematichis leadis ae cinematografi,  e al à diret la Mostre dal Cine e il Concors par Tescj Cinematografics.
Al è component dal Comitât Tecnic Sientific de ARLeF tant che espert inte produzion artistiche, musicâl e multimediâl.


Marco Stolfo
Iscrit al ordin dai gjornaliscj, al è dotôr in Siencis Politichis, orientament internazionâl. Al fâs ativitât di docence e ricercje su la tutele des minorancis linguistichis, su la lenghe furlane, su la comunicazion intes lenghis minoritariis e  su lis politichis linguistichis. Si interesse ancje di politichis dai zovinis e di ativitâts culturâls leadis a chês. Al è autôr di diviers saçs, articui, monografiis e cjapitui di libris sul teme de minorance linguistiche furlane. Al colabore cun ents e associazions, massime su argoments inerents la comunicazion -ancje chê dal mont multimediâl-, la lenghe furlane e i assets europeans.
Al è component dal Comitât Tecnic Sientific de ARLeF tant che espert inte produzion artistiche, musicâl e multimediâl.

Donato Toffoli
Dotôr in Conservazion dai Bens Culturâi, orientament archivistic librari, dal 1987 al è operadôr de Biblioteche Comunâl di Tavagnà. Linguist espert e tradutôr, al à partecipât ae formulazion dai criteris pe formazion di neologjisims par furlan e pal adatament lessicâl e ancje al progjet dal Grant Dizionari Bilengâl Talian Furlan. Al è stât docent di lenghe furlane in diviers cors promovûts de Universitât dal Friûl e conferencîr su tematichis leadis ae Europe e ae legjislazion su lis lenghis minoritariis, cun riferiment particolâr al furlan. Al è specialist in toponomastiche, e al colabore cun rivistis e ents che si interessin di lenghe furlane.
Al è component dal Comitât Tecnic Sientific de ARLeF tant che espert inte linguistiche, cun riferiment primari ae planificazion linguistiche.


Ae ativitât colegjâl dal Comitât al partecipe ancje il diretôr dal Servizi competent in materie di identitâts linguistichis de Regjon Autonome Friûl-Vignesie Julie.

Zire il to dispositîf

Ruota il tuo dispositivo

Rotate your device

Cheste pagjine no si pues viodi cun chest dispositîf

Pagina non disponibile per questo dispositivo

This page is not available on this device