ZORNADE EUROPEANE DES LENGHIS 2018

Unîts inte diversitât nol è dome il sproc de Union europeane, ma ancje la fuarce dal nestri continent. Si stime che inte Union Europeane si fevelin passe 80 lenghis diferentis; di chestis, lis lenghis uficiâls a son 24 e chês minorizadis passe 60, feveladis di 50 milions di personis che a fasin part di une minorance nazionâl o di une comunitât di lenghe minoritarie. Une diversitât linguistiche e culturâl di prudelâ e valorizâ, tant che element di fonde de societât multietniche contemporanie.
 
Il Consei de Europe al promôf il pluralisim propit parcè che lu calcole un strument che al jude la comprension interculturâl, e un element clâf dal nestri patrimoni culturâl. Al è juste apont su sô iniziative che ai 26 di Setembar di ogni an si festeze la Zornade Europeane des Lenghis.
La prime Zornade Europeane des Lenghis e je stade organizade insiemi dal Consei de Europe e de Union europeane tal 2001, e e à cjapât dentri milions di personis cun ativitâts par celebrâ la diversitât linguistiche e par promovi l’aprendiment des lenghis. Viodût il sucès vût de iniziative, il Consei al à decidût di celebrâle ogni an.
 
I obietîfs gjenerâi de Zornade a son di informâ il public su la impuartance di imparâ plui lenghis, cul fin di incressi il plurilinguisim e la comprension culturâl; di promovi, tutelâ e favorî la diversitât linguistiche e, par finî, di incoragjâ a imparâ lis lenghis dilunc di dute la vite, a cualsisedi etât e par cualsisedi reson. Imparâ lis lenghis di altris popolazions nus jude a capî miôr la lôr culture e a superâ lis diferencis.
Lis competencis linguistichis no son dome une necessitât comune, intun mont globalizât e intune economie cussì in moviment, ma ancje un dirit di ducj. Chest al è un dai messaçs principâi de Zornade Europeane des Lenghis.
Par vê plui informazions su la Zornade, su dutis lis iniziativis organizadis in Europe e par discjamâ materiâi didatics e informatîfs, si pues lâ sul sît dal Consei de Europe a cheste direzion: www.coe.int/edl.
 
Ai 26 di Setembar dal 2018, la Agjenzie Regjonâl pe Lenghe Furlane (ARLeF), tant che ogni an, e vûl celebrâ la zornade organizant in vie dal Lionello a Udin, un spazi informatîf e promozionâl cu la distribuzion a ducj i citadins materiâi e gadgets sul significât de Zornade e la sô impuartance, e su la lenghe furlane e lis ativitâts de ARLeF.

Zire il to dispositîf

Ruota il tuo dispositivo

Rotate your device

Cheste pagjine no si pues viodi cun chest dispositîf

Pagina non disponibile per questo dispositivo

This page is not available on this device