RUSH -  “Modei di tutele e pratichis di sucès pal insegnament des lenghis minorizadis in Europe” 

Martars ai 16 di Zenâr dal 2018, li dal Palazzo De Nordis di Cividât (UD), si davuelzarà la cunvigne di presentazion dal progjet european RUSH dal titul “Modelli di tutela e pratiche di successo per l'insegnamento delle lingue minoritarie in Europa”.

Ae cunvigne a saran presints relatôrs esperts impuartants tant che Giovanni Agresti de Universitât Federico II di Napoli, Michele Gazzola de Universitât di Berlin, Roland Verra de Intendence Ladine de Provincie di Bolzan, Mara Mennella de Universitât di Almeria, Ludowica Dal Lago de IPRASE pe Provincie di Trent, Gabriele Iannàccaro de Universitât Bicocca di Milan, Noemi Àlvarez Villar de Comunitât Autonome de Galizie e Maurizio Tremul de Union Taliane (Cravuazie).

La partecipazion e je vierte a ducj i docents interessâts fin che si esaurissin i puescj disponibii.
Par iscrivisi clicâ achì.

Rush al è un progjet internazionâl che si disvilupe tal ambit di Erasmus +, dedicât ae istruzion, formazion, zoventût e sport. In cheste suaze, il progjet al vûl contribuî a definî i titui culturâi, professionâi e sientifics ricognossûts al docent plurilengâl in Europe e a creâ modui formatîfs trasversâi aes competencis clâf, midiant dal aprendiment integrât di lenghe e di contignût, cuntun ûs plui larc des tecnologjiis de informazion e de comunicazion intes scuelis.

La impuartance di Rush e je tal valorizâ al miôr, e intune dimension plui largje, l'inseriment des lenghis minoritariis intun sisteme didatic plurilengâl cussì come al sucêt in tantis altris bandis de Europe.
Il progjet, di durade trienâl, al cjape dentri pe prime volte Italie (Friûl-Vignesie Julie), Spagne (Galizie) e Cravuazie.

Dongje de ARLeF (Agjenzie Regjonâl pe Lenghe Furlane), che e à lavorât a fuart te fase di presentazion de candidature, a Rush a partecipin l'Istitût Omnicomprensîf Convit Nazionâl “Paolo Diacono” di Cividât, che al è a cjâf dal progjet; il Comun di Cividât (ent che al organize la cunvigne); lis dôs scuelis galizianis Salvaterra di Miño e Carlos Caseras, in colaborazion cu la Dirección Xeral di Educación; la scuele Benussi di Rovigno e la Union Taliane (Cravuazie).

Discjame achì il program de cunvigne.

Zire il to dispositîf

Ruota il tuo dispositivo

Rotate your device

Cheste pagjine no si pues viodi cun chest dispositîf

Pagina non disponibile per questo dispositivo

This page is not available on this device