Lenghis laboratori di didatiche interatîf

Un strument pe didatiche multidissiplinâr.

Lenghis, ideât e realizât dal CLAAP - Centri di Linguistiche Aplicade - cul finanziament de ARLeF - Agjenzie Regjonâ pe Lenghe Furlane, al è pensât par sei un strument didatic pe lenghe furlane intun contest di insegnament plurilengâl. Il so intindiment al è di meti a disposizion dal insegnament de lenghe furlane un strument te modalitât informatiche, flessibil pal aspiet de sô utilizazion didatiche sui tancj nivei e daûr lis tantis esigjencis, che si puedi difondi cun facilitât traviers la rêt, tâl di meti a disposizion di ogni utent e scuele cun rapiditât i siei contignûts, superant i coscj di difusion e dai sussidiaris in cjarte.
 
Lenghis al consist intune Biblioteche digjitâl e intun Laboratori di esercitazions linguistichis par une o plui lenghis in rapuart mutuâl.
La Biblioteche e pues contignî tescj di plui gjenars, in primis il libri pe leture ed il test par esercitazions linguistichis di diferente tipologjie.
Il Laboratori al consist intun ‘gjeneradôr’ di unitâts di ativitât o esercitazions di diferente tipologjie par ogni test inserît par chest intindiment e intune ‘lavagne’ pes esercitazions stessis.
Lenghis si utilize tai laboratoris informatics des scuelis o tes aulis singulis midiant lavagne luminose o videoproietôr.
Lenghis al pues jessi distribuît pe sô utilizazion su la rêt Internet. La sô Biblioteche e pues jessi inricjide cence limit e e pues jessi difondude te rêt a disposizion di ogni utilizadôr come che e pues jessi personalizade di un utent singul.
 
I tescj pe utilizazion didatiche a puedin sei il test discorsîf ordenari, naratîf, poetic, di cualsisedi gjenar cun o cence audio, listis di peraulis o espressions, imagjins e vôs associadis a peraulis.
Lis tipologjiis di esercitazions a consistin te semplice leture, te scolte, tal meti in corispondence tescj e/o peraulis scrits/is di plui lenghis cul clic de surîs, tal scrivi la corispondence domandade, tal completâ frasis o listis cun parts che a mancjin, tal ordenâ listis. Dut chest doprant une lenghe sole o plui lenghis, une in funzion di chê altre.
Pe pluipart des tipologjiis di esercitazion a son pussibilis variantis.
La flessibilitât di Lenghis par chel che al rivuarde lis tantis tipologjiis e variantis di ativitâts e permet di graduâ lis dificoltâts des esercitazions daûr des esigjencis didatichis, ven a stâi daûr des competencis di partence dai arlêfs singui e des classis o dai insegnants stes in relazion a ogni lenghe e daûr dai obietîfs che si intint di rivâ.
I insegnants che no vessin competencis suficientis te lenghe furlane scrite, considerade la flessibilitât di Lenghis, a podaressin cressilis e miorâlis cun Lenghis parie cui lôr arlêfs.
Lenghis e permet di verificâ tal davuelziment des tantis esercitazions la presince di fai eventuâi pe misurazion dal aprendiment e plui in gjenerâl e permet di misurâ aspiets impuartants dal aprendiment linguistic stes.
 
Lenghis al è pensât in primis pal insegnament de lenghe furlane ma al pues jessi doprât par ogni lenghe e alfabet. In Lenghis la lenghe furlane e pues jessi associade a ogni lenghe, ae lenghe taliane o a altre lenghe, in mût che l’aprendiment di ognidune al puedi gjavâ un vantaç compagn. In particolâr, la lenghe furlane e pues jessi tratade te forme de coinè o lenghe comune o te forme di une des sôs variantis gjeografichis internis.

Intai mês di Març e di Avrîl dal 2016 si à davuelt il prin cors di formazion tecnic didatic di 10 oris che al à viodût la partecipazion di 24 insegnants che a àn acuiside la competence aplicative e programatorie des unitâts di aprendiment "Lenghis", e che a àn otignût un certificât di frecuence finâl.

Al è pussibil organizâ intai Istitûts scolastics de regjon, dai incuintris di dimostrazion e di aprofondiment cui esperts dal program cul fin di valutâ ancje une pussibile partecipazion a une sperimentazion didatiche dal strument.

Par informazions:
arlef@regione.fvg.it
tel. 0432 555804

Zire il to dispositîf

Ruota il tuo dispositivo

Rotate your device

Cheste pagjine no si pues viodi cun chest dispositîf

Pagina non disponibile per questo dispositivo

This page is not available on this device