La Cjase des Paveis - Protocol di Intese e Ufierte didatiche pal an scolastic 2015/2016 par furlan

Ai 19 di Setembar dal 2016, ARLeF, Comun di Bordan e la cooperative Farfalle nella Testa a àn sotscrit un protocol par ativâ azions di disvilup finalizadis a favorî l'ûs de lenghe furlane inte divulgazion sientifiche e naturalistiche, inte didatiche e intal turisim sostignibil. Il President de ARLeF,  Lorenzo Fabbro, il Sindic di Bordan, Gianluigi Colomba e il President de cooperative Farfalle nella Testa, Stefano Dal Secco a ritegnin che il furlan al rapresenti un strument preziôs e une oportunitât par valorizâ il teritori, la sô biodiversitât (ancje linguistiche) e la ricjece culturâl fasint di volan tant che element distintîf pal marketing teritoriâl e la fidelizazion de utence.
Par chest, i trê protagoniscj de sotscrizion si impegnin a lavorâ in sinergjie par fâ sì che la lenghe furlane e jentri in mût simpri plui atîf inte ativitât promozionâl, informative e didatiche de famose realtât  ecomuseâl de Cjase des Paveis di Bordan. La Agjenzie e sarà in stât di ufrî consulence sientifiche e linguistiche, coordenant lis variis azions previodudis; il Comun di Bordan al metarà a disposizion il personâl dal Sportel intercomunâl pe lenghe furlane pe ativitât di traduzion e pal supuart aes iniziativis; la cooperative Farfalle nella Testa e à za destinât dai percors di visite vuidade ae struture in lenghe furlane, proponint ancje dai pachets didatics specifics par furlan indreçâts aes scuelis dal teritori.

La Cjase des Paveis di Bordan e rapresente une des realtâts plui impuartantis a nivel nazionâl e internazionâl e si cualifiche tant che fondamentâl  fatôr di atrazion turistiche locâl, nazionâl e foreste e, intal stes timp, un strument di divulgazion sientifiche e di racuardi cu lis scuelis dal teritori pe didatiche integrade e interdissiplinâr.
Par screâ cheste gnove colaborazion o vin il plasê di meti in linie il catalic de ufierte didatiche pal an scolastic 2015/2016 in maniere integrâl par furlan, tradot di Linda Picco dal Sportel pe Lenghe Furlane dal Comun di Bordan, segnalant che cu la gnove viertidure dal prin Març dal 2016 la Cjase des Paveis e proponarà a fruts, students e adults la pussibilitât di sielzi trê laboratoris specifics in lenghe furlane:
Lis ativitâts davueltis par furlan, compagnadis di materiâi fats di pueste e distribuîts ai partecipants, e che si puedin aprofondî tal catalic che si pues scjariâ, a son chestis:

1. Un planet di paveis. Il zîr dal mont intune ore o pôc di plui
2. La vite straordenarie di Rosa e Emilio
3. Oms e lâts. Il lât di Cjavaç e la vite dulintor


Cheste iniziative e pues ufrî un supuart in plui ae ativitât didatiche di dutis lis insegnantis e i insegnants di lenghe furlane e e rapresente un stimul interessant, gnûf e divertent pai fruts des scuelis dal Friûl. O invidìn, duncje, a scjariâ il catalic e i volantins chi sot.

O ricuardìn che la Cjase des Paveis e je vierte dal prin di Març ai 31 di Otubar 2016 in chestis zornadis e oraris:

dal lunis al vinars des 9.00 aes 18.00
sabide, domenie e dîs di fieste des 9.00 aes 15.00

Par informazions e prenotazions des visitis e dai laboratoris si pues clamâ o scrivi:
tel 0432 1636175 - 344 2345406 - e-mail: didattica@bordanofarfalle.it

Cjase des Paveis di Bordan
Cjase des Paveis pes scuelis
Catalic Ufierte didatiche an scolastic 2015/2016

Zire il to dispositîf

Ruota il tuo dispositivo

Rotate your device

Cheste pagjine no si pues viodi cun chest dispositîf

Pagina non disponibile per questo dispositivo

This page is not available on this device