"JUDE" IL TRADUTÔR AUTOMATIC TALIAN FURLAN

Al è rivât Jude, pai dipendents de Regjon e dai Ents Locâi
Di Insiel, struments informatics gnûfs, sempliçs e gratuits, pe traduzion in linie in lenghe furlane. 

E je stade inviade tes setemanis passadis, su indicazion dai assessôrs regjonâi Paolo Panontin (Autonomiis locâls) e Gianni Torrenti (Culture), une impuartante operazion di politiche linguistiche che e met a disposizion di ducj i aministradôrs e i dipendents de Regjon e dai Ents Locâi dal Fvj une grande sielte di struments informatics par doprâ la lenghe furlane in maniere operative e pe traduzion, semplice e simultanie, dal talian al furlan. La iniziative, daûr de L.R. 29/2007 e de L.482/1999,e intint facilitâ l’ûs de lenghe furlane ancje tal cjamp aministratîf sostignint un ‘normâl’ ambient plurilengâl in ambit lavoratîf e public. Il servizi, inviât cuntune comunicazion mandade a ducj i uficis, al è indreçât a miârs di impleâts publics di aree furlanofone che a lavorin pe Regjon, pai Comuns (175 comuns su 216), Aziendis pai Servizis Sanitaris, Ospedâi, Ents regjonâi, Ents locâi. La iniziative e je finanziade dal Assessorât pes Autonomiis locâls e curade dal pont di viste tecnic di Insiel che e à comprât, par 12 mês, il program di traduzion automatiche “Jude3”.
Jude – dal verp judâ, - al è un prodot de cooperative Serling e al garantìs un servizi di alt nivel.
Jude al analize il test talian, al individue la categorie gramaticâl di dutis lis peraulis daûr regulis complessis di disambiguazion, al fâs sieltis di lessic, al trasferìs chestis informazions dal talian al furlan e al torne a formulâ i contignûts aplicant regulis di sintassi furlane. Il test, come cuant che si doprin i i tradutôrs automatics di altris lenghis, al domande un control finâl dal utent judât dal coretôr automatic a disposizion.
Te schermade dal computer di ogni dipendent al sarà ancje il link dal sît de ARLeF, de sezion dal Grant Dizionari Bilengâl Talian-Furlan (cun 63.500 lemis furlans) e dal Coretôr Ortografic Furlan (cun dentri 70.000 lemis). In graciis a un plug in, il coretôr al interven te pagjine word dal test.
Il tradutôr automatic, cun di plui, al ten dentri ancje une aplicazion specifiche pes previsions dal timp doprade di Arpa FVG-Osmer: Jude Meteo.

Zire il to dispositîf

Ruota il tuo dispositivo

Rotate your device

Cheste pagjine no si pues viodi cun chest dispositîf

Pagina non disponibile per questo dispositivo

This page is not available on this device