ISAPP, la educazion ambientâl si fâs ancje par furlan

Isontina Ambiente srl, la societât publiche che, cun 75 dipendents direts, e gjestìs il cicli integrât dai refudums intai 25 comuns de provincie di Gurize (e in 3 de provincie di Triest) cjapant dentri 170mil abitants, e ARLeF (Agjenzie Regjonâl pe Lenghe Furlane), a àn dât vite a une colaborazion par valorizâ il plurilinguisim e l'ûs de lenghe furlane tes ativitâts davueltis de Aziende in cetancj aspiets cuotidians.
Cheste sinergjie e à trasformât lis buinis intenzions, peadis aes particolaritâts dal bacin di riferiment di Isontina Ambiente, in struments di comunicazion concrets che a semplificassin simpri di plui il contat cu la proprie utence, soredut inte otiche di favorî la miôr condivision de culture ambientâl.

Chest an il calendari che Isontina Ambiente di passe dîs agns e consegne a ducj i siei utents cjase par cjase, e che in maniere simpatiche e legre, al da ai utents informazions utilis su la racuelte diferenziade e lis zornadis di conferiment dai diviers materiâi, al è stât fat ancje in lenghe furlane. Cemût fâ par vêlu? Al pues jessi ritirât li de sede ISA e tai siei sportei o domandât clamant il numar 800844344 e scrivint a segreteria@isontinambiente.it, e po ISA e proviodarà a mandâlu daûr des modalitâts definidis cul utent.
 La lenghe furlane e je protagoniste ancje di altris impuartants materiâi di comunicazion: cul calendari chest an Isontina Ambiente e à fat rivâ cjase par cjase a ducj i utents de provincie di Gurize la RICICLOPEDIE, un pro memoria util par vê une rispueste precise a ogni dubi relatîf aes regulis pal coret conferiment dai materiâi intai singui contignidôrs.
Cun di plui a son stâts prontâts in lenghe furlane ancje i adesîfs metûts su lis cjampanis stradâls pe racuelte dal veri, sui bidons condominiâi logâts intes proprietâts privadis e sui mastei distribuîts aes fameis pal conferiment dal umit. Biel che, chescj ultins, a vegnin za dâts fûr ai gnûfs utents, par chei altris contignidôrs il plan di sostituzion dai materiâi di comunicazion esistents cun chei scrits ancje in lenghe furlane, al larà pâr a pâr cui intervents specifics programâts di Isontina Ambiente intai mês che a vegnin, intai diviers comuns dal teritori interessât.

Ma tra lis novitâts presentadis, e à dismovût grant interès ISAPP, la gnove aplicazion creade di Isontina Ambiente: un strument - disponibil par iOS e par Android – une vore bon par vê simpri sot man no dome la rispueste a ogni dubi su la racuelte diferenziade, ma ancje par cognossi il calendari dai conferiments - diviers di Comun in Comun – dulà che a son i centris e lis isulis di racuelte e… par cjatâ ancje cetantis ricetis par creâ plats saurîts tornant a doprâ i vanzums alimentârs, e par prenotâ il servizi di ritîr a domicili dal vert e dai refudums di grandis dimensions.
 
Chest percors al è une vore impuartant par favorî l'ûs de de lenghe furlane inte suaze dal servizi public di gjestion ambientâl, garantint la promozion di une culture ambientâl e il rispiet dai dirits linguistics.

Par plui informazions: www.isontinambiente.it

Zire il to dispositîf

Ruota il tuo dispositivo

Rotate your device

Cheste pagjine no si pues viodi cun chest dispositîf

Pagina non disponibile per questo dispositivo

This page is not available on this device