GNÛFS LIBRIS IN LENGHE FURLANE PAR FRUTS

A son di pôc disponibii intes librariis dal teritori dîs gnûfs titui in lenghe furlane, dedicâts ai fruts. Lis propuestis, par variis fassis di etât, a son il risultât de colaborazion fra la ARLeF e lis cjasis editoris KappaVU, Corvino, Futura e L'Orto della Cultura.E je la seconde serie des golainis finanziadis de ARLeF cun bant trienâl di pueste, pensadis par stimolâ la capacitât di vierzisi al mont e la curiositât dai plui piçui pe diversitât linguistiche e culturâl de regjon, e par ufrî aes scuelis, aes fameis e ai operadôrs culturâi materiâl di cualitât.

"Vanilie e soreli" e "Doi nonos scompagnâts" a son proponûts inte golaine “FAMEIS” de Kappa Vu. Midiant di une scriture delicade, ironiche e divertente, la autore Francesca Gregoricchio e va indevant a contâ ai plui piçui i diviers mûts di jessi famee inte societât contemporanie, furnint un strument di riflession suntun mont simpri plui complès. Tant che i titui di prime "Me mari e fâs il marangon" e "Cjapâsi a bracecuel", a son tescj juscj pai fruts de scuele primarie ma, in graciis des ilustrazions cetant bielis de autore, a puedin acompagnâ ancje i plui piçui, se vuidâts di un adult.
 
La golaine/racuelte “A OGNI FRUT IL SO LIBRUT”, di Corvino Edizioni, e propon invezit percors esploratîfs di cognossince e esperiencis adatis pai plui piçui, vuidâts dal protagonist Gjat Ut, gjat cetant simpatic, cu lis sôs storiis domestichis aventurosis. Trê i titui che si zontin chest an: "Ce fasino i amîs di UT?", "AUTun" e "MusicUTe", des autoris Deborah Crapiz e Doriana Alessi, che si zontin ai precedents “I lavôrs di UT”, “I zûcs di UT”, “I amîs di UT”. La golaine e je caraterizade di tantis imagjins e tescj graduâi, adats par fruts une vore piçui ma ancje par chei des scuelis primariis.
 
E je indreçade ad implen ai fruts plui picinins invezit - sedi pal formât che al disvilupe la abilitât tatile, che pal gjenar di dissen e pe semplicitât dai tescj - la golaine “FREE&ULLI” di Futura Edizioni. I cuatri gnûfs titui, simpri di Patrizia Geremia, a son: "Stagjons", "Colôrs", "Pomis e verduris", "Piçulis voris", cu la comparse - a pet dai cuatri libruts dal an passât - dal gnûf personaç Schwarz, che insiemi cun Ulli che al fevele par furlan e Free che al fevele par inglês, al insegnarà ai fruts cualchi peraule par todesc. Obietîf de golaine al è di fat rinfuarçâ il multilinguisim ancje midiant di altris lenghis che par solit a son in contat cul furlan (inglês/todesc/sloven).
 
L'Orto della Cultura al è infin in librarie cul libri "MA par fortune" curât, tant che il precedent “Dulà che o jeri a stâ prime", di Sandra Fabris e di Renata Gallio (lis traduzions par furlan a son di Venusia Dominici). Al fâs part de golaine di libris premiâts al Concors internazionâl SYRIA POLETTI e realizâts inte version in lenghe furlane. Il test, acompagnât di ilustrazions cetant curadis, al è adat pai fruts des primariis ma ancje par chei plui piçui, se acompagnâts di un adult.

Ducj i libris si puedin comprâ tes librariis dal Friûl. Par informazions o par cui che al fos interessât a presentazions e/o laboratoris di leture tes librariis, bibliotechis, istitûts scolastics, ludotechis, o par apontaments a teme, al è pussibil contatâ il Sportel Regjonâl pe Lenghe Furlane ae direzion: info@sportelfurlan.eu.

Zire il to dispositîf

Ruota il tuo dispositivo

Rotate your device

Cheste pagjine no si pues viodi cun chest dispositîf

Pagina non disponibile per questo dispositivo

This page is not available on this device