FURLAN, LENGHE DI DONGJE E DI LONTAN - La Agjenzie Regjonâl pe Lenghe Furlane a Vicino Lontano 2018

Ancje chest an, la Agjenzie e sarà presinte tal calendari dal Festival vicino/lontano cun tancj events dedicâts ae lenghe furlane.

Ve chi il program complet:

Vinars ai 11 di Mai, aes 19.00
Oratori dal Crist

Incuintri "Improibît fevelâ: lenghis vietadis, emigrazion, plurilinguisim" cun  Eugenia Natsoulidou, Filippo Salvatore, Carlo Puppo; al coordene William Cisilino pe ARLeF
 
Intune Europe che e met fra i siei valôrs di fonde il plurilinguisim e il rispiet pes diversitâts, a esistin ancjemò contescj dulà che lis lenghis minoritariis a son discriminadis o fintremai improibidis. Al è il câs de lenghe macedone, fevelade in Grecie. Partint di chest contest, l’incuintri al sarà la ocasion par scrusignâ lis variis situazions di disparitât e di conflit linguistic in Europe, cuntun voli ancje aes dificoltâts patidis  des comunitâts autoctonis emigradis intal mont.
 
Vinars ai 11 di Mai, aes 21.00
Teatri San Giorgio

Proiezion e dibatit "INT/ART Sintî locâl - Agjî globâl - seconde serie" cul regjist Dorino Minigutti, l’autôr Giorgio Cantoni e i protagoniscj: Michele Bazzana, Edi Carrer, Alice Durigatto, Luca Malisan, Carin Marzaro, Aida Talliente, Lorenzo Fabbro pe ARLeF; al coordene Paolo Cantarutti
 Produzion Agherose cul contribût di ARLeF e Fondo Audiovisivo F.V.G.

INT/ART, int di art ma ancje INTernational/ARTist, artist internazionâl: jessi zovins, jessi artiscj, jessi furlans. Dopo de prime serie su la musiche, i cinc gnûfs protagoniscj nus mostrin il ferment culturâl dal Friûl di vuê e la creativitât in lenghe furlane te suaze des arts visivis. A son zovins ilustradôrs, esperts di computer grafiche, creadôrs di cartons animâts, videomakers: il scultôr Edi Carrer, la fotografe Alice Durigatto, la ilustradore Carin Marzaro, l'artist visîf Michele Bazzana e Luca Malisan, fumetist. Cinc documentaris monografics di 13’ par furlan, cun sottitui, intune inedite produzion locâl, pe lenghe doprade, ma internazionâl pe sô puartade divulgative.
 
Sabide ai 12 di Mai, aes 16.30
Librarie "Pecora Nera", vie Glemone

Event par fruts cun leture animade e premis
"BENRIVÂTS TAL MARIMONT!" cun  Lussia Di Uanis, Giulia Spanghero, Francesca Benvenuto e Erika Adami pe ARLeF
 
Benrivâts tal marimont e je la storie de nassite, e di chê esperience di amôr cussì grande che e compagne ducj i gjenitôrs cuant che al rive un frutin. Il parussulin al è un ucielut piçul e taront, e cu lis plumis coloradis di zâl, blu e vert. Al svole cjantuçant ator pai prâts fin che al cjate la sô dolce compagne e cun jê al fâs un biel nît di lane e di plumis, in spiete dai picinins che a rivaran.  Novitât editoriâl, presentazion in anteprime.
 
Domenie ai 13 di Mai, aes 11.00
Librarie "Moderna", vie Cavour

Event par fruts cun leture animade e premis
"FAMEIS Storiis diferentis e plenis di amôr", cun  Francesca Gregoricchio, Alessandra Kersevan, Silvana Schiavi Fachin e Lorenzo Fabbro pe ARLeF
 
Fameis e je une golaine di libris ilustrâts che e conte cun ligrie e grande sensibilitât i diviers mûts di jessi famee in dì di vuê, te societât contemporanie. In "Vanilie e Soreli" e je une famee dome di feminis cuntune none bisse che e vîf te dispense, une none che e cusine dut il dì, une agne, une mame che e vuide i camions, une gjate dispetose e une frute colôr di lat e cjocolate. "Doi nonos scompagnâts" al conte di une famee dulà che lis divignincis a son diferentis, no si fevele la stesse lenghe e no si pree te stesse maniere: cuâl saraial il lôr segret?

Zire il to dispositîf

Ruota il tuo dispositivo

Rotate your device

Cheste pagjine no si pues viodi cun chest dispositîf

Pagina non disponibile per questo dispositivo

This page is not available on this device