Furlan
Italiano
ZORNADE EUROPEANE DES LENGHIS
I rapresentants de comunitât linguistichis emergjentis de aree mediteranie in visite ae ARLeF.
Si è davuelt vinars ai 25 di Setembar, te suaze des iniziativis colegadis ae Zornade europeane des lenghis (che si celebrarà ai 26 di Setembar), un incuintri jenfri esponents des comunitâts linguistichis emergjentis dal Mediterani (rapresentants di istituzions e ents berbers, catalans, maltês, sarts e furlans) e i sorestants de ARLeF, la Agjenzie regjonâl che si ocupe di tutelâ, promovi e doprâ la lenghe furlane.
L’incuintri al complete la riunion anuâl di coordenament dal progjet RoleMed, progjet promovût dal Istitût “Pre Checo Placerean” cul obietîf di creâ une rêt permanente di osservazion dal stât e de evoluzion des lenghis emergjentis dal Mediterani.
Presints Mohand Tilmatine, diretôr dal Osservatori catalan de lenghe amazighe, Carles Castellanos, espert linguiste catalan, Diego Corraine, membri dal Osservatori pe leghe culture sarde, Joseph Brincat, linguiste de Universitât di Malta, e William Cisilino, president dal Istitût Ladin Furlan “Pre Checo Placerean”.
A son intervignûts ancje il President de ARLeF Lorenzo Zanon, il diretôr Massimo Duca, components dal Cda e dal staff dal Comitât Tecnic Sientific, e il diretôr dal Servizi identitâts linguistichis, culturâls e coregjonâi tal forest de Regjon autonome Friûl-Vignesie Julie Marco Stolfo.
“Apontaments come chescj – al declare il president Lorenzo Zanon – a son une vore impuartants: a dimostrin come la nestre realtât si puedi leâ par tancj aspiets ai percors e ai ostacui che a frontin lis altris minorancis linguistichis.”
“Ancje se cun detais difarents, – al continue Zanon – si cjatìn unîts te bataie pe tutele de lenghe e la rivendicazion di dirits sancîts uficialmentri des leçs dal Stât.”
“La lenghe al è un element basilâr dentri de societât, font di cressite culturâl, sociâl e economiche”.
Al incuintri, ocasions di inzornament sui problemis e il stât des lenghis minoritariis, i partecipants a àn podût cognossi storie, compits, obietîfs e components de Agjenzie regjonâl pe lenghe furlane.
Daspò di un excursus storic su la nassite e il disvilup de Agjenzie, i presints si son podûts confrontâ sul stât di tutele e di difusion dal furlan, ancje in relazion ae situazion di chês altris lenghis emergjentis, e su cualchi probleme specific, tant che la mancjance di un titul di abilitazion pal insegnament de lenghe furlane o la definizion des denominazions toponomastichis uficiâls.
Une esperience positive e cualificant, ocasion di svilup e cognossince, che e testemonie ancjemò une volte l’impegn de ARLeF par rivâ ai siei obietîfs, cjapât dentri il rûl internazionâl de lenghe furlane.
