Furlan
Italiano
VI SEMINARI DAI GJORNALISCJ LADINS 2010
La ARLeF, in colaborazion cul Servizi identitâts linguistichis de Regjon Autonome Friûl Vignesie Julie e la Provincie Autonome di Trent, e je daûr a inmaneâ la VI edizion dal Seminari dai Gjornaliscj Ladins.
La ARLeF, in colaborazion cul Servizi identitâts linguistichis de Regjon Autonome Friûl Vignesie Julie e la Provincie Autonome di Trent, e je daûr a inmaneâ la VI edizion dal Seminari dai Gjornaliscj Ladins.
Il progjet, nassût cul fin di promovi il scambi di esperiencis e professionalitâts, al è viert ai gjornaliscj che a davuelzin la lôr ativitât in marilenghe. La edizion 2010 si davuelzarà tal mês di Mai cun trê apontaments difarents: un seminari di formazion, un laboratori e une visite di studi a Triest e Cjaudistrie. Chest il calendari:
- vinars ai 7 di Mai – seminari “Comunicazion e politiche linguistiche. Analisi de situazion corint”
- vinars ai 14 di Mai – laboratori “Redazion di un progjet integrât di comunicazion in lenghe furlane in prevision dal Plan gjenerâl di politiche linguistiche”
- di joibe ai 20 a sabide ai 22 di Mai – seminari a Triest e Cjaudistrie par cognossi e aprofondî la situazion dai media di lenghe taliane in Istrie e chei di lenghe slovene in Italie.
Il Seminari al è viert a un numar massim di 12 gjornaliscj, che a varan di presentâ domande ae Agjenzie, cun alegât un curriculum professionâl curt. Il modul si pues discjamâ e mandâ vie mail ae direzion arlef@regione.fvg.it. Al sarà po dopo il Comitât Tecnic Sientific (CTS) a valutâ lis domandis e a fâ buinis lis candidaturis. Ognidun che al parteciparà, par podê cjapâ part ae visite di studi in Slovenie, al varà di frecuentâ ducj i doi i incuintris che si davuelzaran tes dôs setemanis prime dal event.
Al è compit di ognidun che al partecipe organizâsi dal pont di viste pratic (traspuarts, mangjâ, durmî e v.i.). La Agjenzie si limitarà dome a cuvierzi lis spesis di chei che a parteciparan ae visite di studi a Triest e Cjaudistrie par un massim di € 200,00, daûr de presentazion di ricevudis di spese valevulis, ven a stâi spesis pal traspuart, pal mangjâ (gustâ e cene) e durmî.
Par cualsisei domande o informazion si puedin contatâ i uficis de Agjenzie (tel. 0432/555848 – email: arlef@regione.fvg.it)
