Sabide stade al Teatri Palamostre a Udin si è davuelt un dai events plui curiôs e convincents de stagjon. La prime edizion di SUNS, festival de cjançon in lenghe minoritarie, e à savût di fat cjapâ dentri e strissinâ il public par mieç de colorade babêl des lenghis mancul pandudis, presintis sul teritori talian e dal arc alpin.

Il Festival, finanziât e promovût de ARLeF, rapresentade in sale di Maria Carminati, al è stât une biele rispueste aes polemichis di pôc scjadenadis sui media nazionâi rivuart ai fonts stanziâts a pro des lenghis minoritariis.

Intun teatri Palamostre di "sold out" i doi presentadôrs spiritôs e precîs Gigi Patruno e Mojra Bearzot a àn puartât il public jenfri lis esibizions curtis ma profondis esibizions dai vot grups in concors.

Fra i protagoniscj de serade no podeve mancjâ une esibizion sflandorose dal cjantautôr cjargnel Lino Straulino, che al à vinçût il premi de jurie grazie a une esecuzion dome par ghitare e vôs de sô "Doman", creant in sale une concentrazion e un pathos in stât di convinci ae unanimitât la jurie internazionâl, cun a cjâf il frison Onno Falkena, responsabil dal Liet International.

Dongje a Straulino il grup hip hop sart Dr Dreer & CRC Posse al è rivât al secont puest, valit par partecipâ ae fase finâl dal impuartant festival european Liet International, concuistant il premi dal public dât de some dai vôts ricevûts dal public in sale, e di chel in scolte su Internet e su lis frecuencis di Radio Onde Furlane.

Dut câs, chei altris partecipants, no son stâts mancul brâfs: prins su ducj i catalans di Alghero Chichimeca, che a son rivâts al secont puest in dutis i dôs lis classifichis. E plâs ancje la zovine Ursina Giger (dal cjanton svuizar dai grisons) cul so rock di atmosfere. Tant interessant e ancjetant virtuosistic il Rom vienês Harri Stojka. l ladins Encresciadum de Val di Fasse a àn regalât al public un mix une vore fin di Jazz e e bossanova. Fuarte e incisive la esibizion dal grup arbëreshë Peppa Marriti Band. Une garanzie i furlans R.Esistence in Dub, insiemi cul ospit sart dr Boost.

Ma l'event plui spietât de serade e je stade la esibizion dai Mitili FLK di gnûf insiemi dopo dîs agns te formazion origjinâl. I Mitili a àn regalât al public une serie di tocs che a àn cjapât e emozionât la int in sale, gjavâts fûr di “Colors” (il lôr disc plui famôs), eseguîts cu la stesse poetiche energjie che tai prins agns novante e fo in stât di segnâ la strade par ducj i grups musicâi che ancjemò vuê a messedin la lenghe furlane cul rock e i siei derivâts.

La fieste e je lade indevant tal foilleur dal teatri, che si è trasformât te sede di un no spietât after party dulà che i grups invidâts si son podûts messedâ intune esuberante jam session interetniche.

Sore ae cualitât proponude vie pe serade, no si à di dismenteâ la precision scrupulose te organizazion e tal coordenament artistic dal event, dât ae direzion di Leo Virgili, Valter Colle, Paolo Cantarutti.