Furlan
Italiano
SUNS , FESTIVAL DE CJANÇON IN LENGHE MINORITARIE
In Setembar Udin e ospitarà 8 artiscj che a rapresentin ancjetantis minorancis linguistichis
La varietât linguistiche e je di simpri une des ricjecis culturâls plui evidentis de nestre regjon. Cheste risorse e pues lâ straçade cun facilitât se limitade al folklôr e ai localisims o pûr sflorî cuant che e je doprade par creâ leams cun altris realtâts culturâls antant vivarosis.
Daûr di cheste otiche lis lenghis feveladis te nestre regjon a fasaran di sburt par “Suns”, il festival de cjançon in lenghe minoritarie promovût de ARLeF che si davuelzarà al Teatri Palamostre ai 12 di Setembar che al ven e che al viodarà Udin trasformâsi intune colorade babêl des lenghis mancul pandudis.
Il bant di concors di cheste manifestazion, indreçât ai grups musicâi e ai artiscj che a rapresentin lis minorancis linguistichis talianis e des regjons alpinis (Svuizare, Austrie e Slovenie) al è stât dât fûr il mês di Mai passât e in pôc plui di doi mês al à viodût la partecipazion di 23 cjançons cjantadis in 10 lenghis difarentis (ocitan, retoromanç, ladin, arbëreshë, sart, catalan, sloven (de Carinzie e de Bencia), romanì e, naturalmentri, furlan).
Sore ae vivarose varietât di lenghis proponude dai grups e dai artiscj in concors e je significative ancje la cuantitât di gjenars presentâts.
Jenfri chescj 23 che a àn partecipât, une jurie cualificade e à selezionât lis 8 cjançons che a laran in finâl e che a saran valutadis vie pe esibizion dal vîf dai 12 di Setembar che al ven li dal teatri Palamostre aUdine.
I finaliscj selezionâts a son ven a stâi: Dr deer & crc posse (Hip Hop de Sardegne), Encresciadum (Jazz de Val di Fassa), Harri Stojka (Gipsy Swing di Vienna), Chichimeca (catalans), Peppa Marriti Band (Rock cjantât par Arbëreshë), R.Esistence in Dub (Dub furlan/sart adun cun dr Boost di Cagliari), Ursina Giger (cjantautore soul dal cjanton dai grisons), Lino Straulino (il nestri famôs puartebandiere furlan).
Il nivel cualitatîf di chestis ultimis vot cjançons al è pardabon alt e al lasse vualmâ une sfide ferbinte par vinci i prins doi puescj che a daran la pussibilitât di partecipâ ae “finalissime” dal LIET international che si davuelzarà a Ljouwert, capitâl de Frisie (Paîs Bas) il mês di Otubar che al ven.
Suns e je dome la ponte dal iceberg di un lunc lavôr che di pôc al è sbrocât fûr te candidature di Udin par ospitâ lis finâls dal Liet tal 2011.
A tovin i preparatîfs par ospitâ un event che al clame dongje ogni an un numar grandonon di media e di operadôrs culturâi (BBC e CNN a son dome dôs des passe dîs televisions internazionâls che ogni an a son presintis a chest festival).
