Furlan
Italiano
Presentazion de riviste leterarie “La Comugne”
Vinars ai 20 di Març, aes 18.00, li de La Feltrinelli di Udin in vie Canciani 15, e vignarà presentade la riviste leterarie in lenghe furlane La Comugne.
La riviste, publicade de cjase editore Kappa Vu cul jutori de ARLeF (Agjenzie Regjonâl pe Lenghe Furlane) e rapresente di diviers agns un spazi leterari viert ai gnûfs autôrs e a cetancj argoments, de filosofie aes siencis linguistichis, des contis in prose aes senegjaturis, insiemit a une part visuâl dedicade aes imagjinis di autôr.
Al vierzarà l’incuintri un salût dal president de ARLeF Lorenzo Zanon, po dopo cualchi autôr, coordenât dal curadôr de publicazion Paolo Cantarutti, a fasaran une leture di tescj publicâts tai ultins numars de riviste. A parteciparan Federica Benacchio, Stefano Gasti, Massimo Govetto, Laurin Zuan Nardin, Ferdinando Passone, Gianfranco Pellegrini, Fulvio Romanin, Checo Tam.
Pal public e sarà une ocasion par cognossi ce che si môf te scriture creative par furlan, un setôr che nol à ancjemò vût la sburtade e il ricognossiment che al merete e che, anzit, al patìs di une sorte di margjinalizazion ancje se e fevele di contignûts di atualitât. I autôrs de La Comugne si esprimin fra dinamichis di avanguardie e di masse cirint di fotografâ lis trasformazions de societât furlane e globâl, caraterizadis dal svilup des tecnologjiis digjitâls e di une mutazion cognitive di dut il cuarp sociâl. I tescj a puartin dispès elements di riflession su lis problematichis identitariis ancje se si movin su regjistris diferents: de flabe ae ironie, dal erotisim al pulp, dal gotic al minimâl.
