Furlan
Italiano
Presentazion AGHE SUTE, AGHE BAGNADE
Educazion plurilengâl – la ARLeF e presente i materiâi didatics “AGHE SUTE, AGHE BAGNADE” e “GUIDE PAI INSEGNANTS”
Martars ai 24 di Novembar si davuelzarà aes 18.00 li de Sale Pasolini (Palaç de Regjon -Vie Sabbadini, 31 - Udin), la presentazion di doi impuartants materiâi didatics finanziâts de ARLeF: “Aghe sute, Aghe Bagnade” e “Guide pai insegnants”.
A saran presints Lorenzo Zanon, President de ARLeF, Silvana Schiavi Fachin, componente dal grup european di ricercje, Laura Nicoloso e Stefania Garlatti Costa che, rispetivementri, e à metût in vore il progjet e e à seguît i aspiets linguistics, e Pierino Donada, component dal CTS de Agjenzie.
“Aghe sute, Aghe Bagnade” al è un progjet european di ricercje pal sostignî e disvilupâ la scriture creative e di grup in lenghe minoritarie, che al à viodût cjapâts dentri i arlêfs de scuele elementâr di Bordan, i arlêfs di une scuele di Dublin, di une scuele de Isole di Lewis e di une scuele galese di Carmarthenshire.
I fruts des scuelis cjapadis dentri a àn colaborât fra di lôr, ancje par mieç dal ûs di imprescj modernis di comunicazion tant che Internet e pueste eletroniche, par creâ une storie, podint cussì disvilupâ lis abilitâts di leture e scriture sore che par furlan ancje par inglês, doprade tant che lenghe comun di comunicazion.
Dongje de publicazion Aghe sute, Aghe bagnade, il fondamentâl contribût dât de “Guide pai insegnants”, un strument valit par sostignî l’insegnament des abilitâts di scriture dai fruts bilengâi ancje tes lenghis minoritariis.
“La ARLeF – al dîs il diretôr Massimo Duca – e à ritegnût impuartant finanziâ progjets come chescj parcè che sore a furnî materiâl didatic util, riflessions pes scuelis, a àn dimostrât la validitât de educazion plurilengâl e a àn fat capî ai fruts il significât di jessi part di un grup sociâl, di une comunitât e tal stes timp dal mont globâl. “
