Furlan
Italiano
Memoreant Agnul Di Spere - Furlans popul european
“Memoreant Agnul Di Spere” - Comun di Sedean, sabide ai 10 di Zenâr dal 2009
De colaborazion tra il Comun di Sedean, l’Istitût Ladin Furlan “Pre Checo Placerean”, l’Union Scritôrs Furlans e la ARLeF e nas “Memoreant Agnul Di Spere”, une zornade dute dedicade a Angelo Michele Pittana, che si davuelzarà sabide ai 10 di Zenâr dal 2009 li de sale consiliâr dal Comun di Sedean aes 15.00.
Daspò cuatri agns che al è mancjât Angelo Michele Pittana, cognossût di tancj tant che Agnul Di Spere, al è ancjemò une vore vîf e fuart il ricuart e l’interès pe sô produzion leterarie e pal so amôr pes sôs origjins furlanis.
“Agnul – al declare intune note Lorenzo Zanon, che al sarà il gnûf president de ARLeF – al pues sei ricuardât tant che un dai plui grancj esperts di lenghe furlane: poete, scritôr, ricercjadôr atent e studiôs passionât des variis minorancis linguistichis.”
“La zornade di sabide 10 di Zenâr – al va indenant Zanon – si concentrarà su la figure di Agnul Di Spere tant che studiôs des minorancis linguistichis europeanis. Agnul Di Spere nol è stât dome poete e scritôr, ma ancje un espert a contat cu lis tantis realtâts ladinis dai grisons o des validis dolomitanis, juste par citâ cualchidune.”
Ae cunvigne a saran presints Jean-Jacques Furer, sociolinguist romanç che al tratarà des ativitâts di Agnul Di Spere pe promozion des lenghis retoromancis, Lois Craffonara, linguist e scritôr ladin che al puartarà la sô esperience personâl di contat diret vude cun Agnul, William Cisilino che al aprofondirà il teme de Europe dei popoli. Al moderarà l’incuintri Lorenzo Zanon, che al è dongje a deventâ gnûf President de ARLeF.
Daspò dai intervents dai relatôrs si learan tocs gjavâts fûr dal libri “Olmadis inte Europe”, par cure di Paolo Bortolussi, intramezâts di esibizions musicâls dal ghitarist Paolo Rovere de Associazion Musicâl “Armonie” di Sedean.
Pittana si à fat cognossi ancje pes sôs numerosis publicazions sientifichis che a àn dimostrât che la lenghe furlane si pues doprâ ancje par fevelâ di argoments tecnics e pratics tant che la algjebre, la matematiche, la gjeometrie (“Lessic de Analisi matematiche”, “Lessic de Gjeometrie” , “Lessic de Algjebre”), o ben ancje pe nomenclature di animâi, plantis, paîs.
Agnul Di Spere al rapresente, tant che pôcs altris poetis e leterâts furlans, un esempli di dedizion pe culture furlane, pes sôs lidrîs e pal teritori dal Friûl.
Ufici stampe
340 6847434
0432 229705
