Furlan
Italiano
Lis plantis raris dai prâts tal gnûf numar di Alc&cè
Si va ator pai prâts par scuvierzi lis plantis raris dai prâts stabii furlans sul ultin numar di Alc&cè, il gjornalut par fruts dut in marilenghe, par cure di Erika Adami. Si sa che i prâts in Primevere si piturin di colôrs, scomençant des clevis in batude di soreli e sul ôr des stradis, ma a son dai prâts plui preseâts, chei stabii, dulà che si cjatin tantis plui cualitâts di plantis, ancje un centenâr, e plui raris in confront di chês che si cjatin in chei comuns. Ve alore un struc di ce che si pues viodi intun prât stabil: de salvie salvadie ae cjandelute fine, dal voli di bo al lat di gjaline. Une piçule vuide par savê di plui di chest tesaur vert.
Si fevele di animâi te rubriche «Perlis di nature», dedicade cheste volte al ors. Tal “cjantonut dal fâ” si insegne a fâ une cuarde par saltâ. A tornin i Gnognosaurs, Pantiagneur e Barburice cu lis lôr aventuris a fumets; i zûcs, par divertîsi imparant la lenghe; l’utilissim vocabolari par imagjinis dedicât ai uciei de Vierte. Te rubriche sportive si pues lei la interviste al zovin campion di freestyle Giacomo Matiz, di Tamau.
Alc&cè – suplement mensîl dal setemanâl la Vite Catoliche, realizât cul contribût de Agjenzie regjonâl pe lenghe furlane – al ven doprât in cetantis scuelis de regjon dulà che si insegne la lenghe furlane. I docents che a vuelin ricevilu pai lôr arlêfs, sore nuie, a puedin domandâlu telefonant al numar 0432/242611, mandant un fax al 0432/242600, o une e-mail ae direzion: amministrazione@lavitacattolica.it
I numars dal gjornalut si puedin scjariâ, in formât pdf, dal sît de la Vite Catoliche: www.lavitacattolica.it
