Furlan
Italiano
Leç 482/99: vantaçs e mancjancis a confront vie pe cunvigne ARLeF
Sabide ai 4 di Avrîl si è davuelte, li de sale consiliâr de Municipi di Trep Grant in place Marconi 3, la cunvigne organizade de ARLeF dulà che a son stâts aprofondîts diviers aspiets de Leç 482/99 e dal teme de tutele des minorancis linguistichis.
“L’incuintri di vuê – al à comentât il President Dot. Lorenzo Zanon – al à une dople valence pe culture furlane parcè che sore a permeti di aprofondî la cuestion minorancis linguistichis al è ancje une altre celebrazion de “Patrie dal Friûl”, la zornade dedicade ae nassite dal Stât Patriarcjâl di Aquilee ai 3 di Avrîl dal 1077”.
“Cheste cunvigne – al à precisât il Diretôr e moderadôr dal incuintri Dot. Massimo Duca – nus permetarà di capî cuâi che a saran svilups pussibii pal avignî de lenghe furlane. Al è impuartant cjatâ soluzion gnovis, ancjemò miôr di chês za presintis, e continuâ tal progjet di tutele e difusion de nestre lenghe.”
Come che al à dit ancje il Dot. Bojan Brezigar: “Se o analizìn la Leç 482/99 tal contest european si pues notâ come che cheste no presenti problemis di costituzionalitât e che e sedi fondade suntun principi democratic di oportunitât e, daûr di chel, e ven lassade la pussibilitât di sielte al singul individui se doprâ o mancul la lenghe furlane. No cate chest, la aplicazion de 482/99 no je ancjemò complete in tancj setôrs.”
Doi setôrs in particolâr a mostrin mancjancis de aplicazion de Leç 482/99: il sisteme scolastic e chel des telecomunicazions. Setôrs che al à cjapât in considerazion il Dot. William Cisilino: “La 482/99 e je un cuarp muart in tantis des sôs parts. L’art. 4, che al veve di garantî l’insegnament dal furlan tes scuelis, al à lassât masse autonomie al sisteme scolastic che nol à cussì sielzût par un sisteme coordenât di gjestion e al à puartât a situazions completementri no omogjeneis te plui part des scuelis de Regjon.”
“Ancje tal mont des telecomunicazions si son cjatâts problemis, par vie che il regolament che al sancive la realizazion di trasmissions pes lenghis minoritariis nol è stât rispietât de RAI che, al contrari, e à simpri dimostrât un ategjament di sieradure e suficience viers la lenghe furlane.”
Come evidenziât duncje dai dibatits vignûts fûr vie pal incuintri organizât de ARLeF, ancje se cierts risultât tal setôr des minorancis linguistichis si son otignûts, al è da fâ ancjemò tant par rivâ ai obietîfs prefissâts.
