Furlan
Italiano
La ARLeF e devente multimediâl e e rive su youtube
Di miercus il prin di Avrîl la ARLeF e je uficialmentri jentrade te grande rêt di you tube, il gnûf canâl di comunicazion doprât dai zovins e mancul zovins pe difusion di video e filmâts fats diretementri di cui che li cjarie sul sît.
“Cu la creazion dal canâl ARLeF sul sît you tube (www.youtube.com/ARLeFtube) – al comente il President de Agjenzie Lorenzo Zanon – o vin volût dimostrâ che il furlan al pues jessi doprât in cualsisei situazion comunicative.”
“Modernitât, tecnologjie, progrès, svilup – al continue ancjemò Zanon – a son ducj concets che a van ben ancje pal furlan che, al contrari di ce che si pues pensâ, nol è une lenghe dal passât ma un imprest di comunicazion cuntune sô funzion sociâl che al pues jessi doprât in ducj i setôrs de vite cuotidiane.
Simpri plui ents a son daûr a doprâ, sore dal classic sît istituzionâl, mieçs di comunicazion tant che i canâi su YouTube o galariis di foto su Flickr. La ARLeF e à decidût di fâ cussì parcè che la lenghe nol è dome un mieç di comunicazion ma – come che al spieghe il Presidente Zanon – “al rapresente il concet di identitât culturâl di ogni singule persone e dal popul tal so complès.”
“Intune societât tecnologjiche e informatizade come chê dulà che o vivìn, – al precise il President – une societât li che si si confronte di continui cun dut il mont, al è fondamentâl mantignî une proprie identitât culturâl par no pierdi lis lidrîs, i valôrs, i ponts di riferiment essenziâi te vite di ogni dì.”
Pal moment sul canâl you tube de ARLeF a son disponibii trê filmâts: i salûts dal President, une descrizion sintetiche de Agjenzie e un contribût su la dificil situazion socio economiche atuâl. Plui indenant a vignaran metût sù altris video.
In ogni moment de zornade, 24 oris su 24, ognidun al pues jentrâ duncje in comunicazion direte cu la ARLeF no dome par mieç dal sît istituzionâl www.arlef.it ma ancje par mieç dal canale you tube www.youtube.com/ARLeFtube.
