Furlan
Italiano
La ARLeF, cu la Societât Filologjiche Furlane, e domande plui tutele de lenghe furlane tal mont de scuele
La ARLeF, Agjenzie Regjonâl pe lenghe furlane, impegnade ativementri par promovi, tutelâ e pandi il furlan ad implen, e condivît la “bataie” de Societât Filologjiche Furlane pe aplicazion des normativis di tutele dal furlan tal mont de scuele.
La propueste che la Agjenzie e à decidût di poiâ si insuaze tes ativitât promovudis e realizadis cun particolâr riferiment al setôr de didatiche.
L’obietîf al è chel di otignî la istituzion di une unitât organizative dal Ufici Scolastic Regjonâl cun sede a Udin, cun struturis e orghins competents e juscj, par rindi eficaçs i intervents e il control des ativitâts davueltis des istituzions scolastichis par chel che al inten la aplicazion des normativis di tutele des comunitâts linguistichis e in particolâr di chê furlane.
Chest par vie che la mancjance di une struture stabile di coordenament e control pe tutele des minorancis linguistichis, il logament avonde scomut dal Ufici Scolastic Regjonâl, no dan il supuart necessari a une programazion adate e a une planificazion dal insegnament dal furlan dentri de ativitât didatiche.
La ARLeF, di bande sô, si è za indreçade viers cheste direzion cu la realizazion di cors di formazion par insegnants, master di II livel, cors di inzornament, publicazions e guidis par insegnants, gjenitôrs e students, dut in lenghe furlane e par sostignî no dome la lenghe ma ancje la culture furlane.
L’impegn de Agenzia tal setôr de didatiche, tant che chel de planificazion linguistiche, de promozion e de documentazion, al è in cressite continue, e simpri indreçât a risultâts costrutîfs e colaborazions che a puedin rindi ancjemò plui eficaçs i sfuarçs e la vore de Agjenzie stesse e di ducj i ents e istituzions che a tutelin lis minorancis linguistichis.
Il jutori che la ARLeF e da par che il furlan al vedi la juste considerazion e i juscj spazis, orghins e struments dentri tal mont scolastic, al è di impuartance primarie e utilitât e si pant in diviersis formis e progjets.
