Furlan
Italiano
Grandis oparis par furlan
Presentâts i volums “Lazarillo di Tormes” e “Lis aventuris di Sherlock Holmes”, voltâts par furlan, e “Il Pilustrat” e “La cjase sul fossâl”, revisionâts daûr de aplicazion de grafie uficiâl.
Si è davuelte Lunis al 1n di Març, aes 11.30, li de sede de ARLeF in Place XX di Setembar n° 23 a Udin, la presentazion dai volums “Lazarillo di Tormes”, “Lis aventuris di Sherlock Holmes”, “Il Pilustrat” e “La cjase sul fossâl”.
A jerin presints al incuintri Lorenzo Zanon, President de ARLeF, Federico Vicario e Feliciano Medeot, il prin Vice Dean e il secont Diretôr de Societat Filologjiche Furlane e Franco Finco, colaboradôr dal Comitât Tecnic Sientific de ARLeF e moderadôr dal incuintri.
“Lazarillo di Tormes” scrit di un autôr spagnûl anonim dal XVI secul e “Lis aventuris di Sherlock Holmes”, opare dal innomenât autôr inglês Arthur Conan Doyle, romançs de leterature internazionâl, a son stâts voltâts par furlan; i doi tescj “Il Pilustrat” e “La cjase sul fossâl”, in origjin scrits par furlan, il prin di Ovidio Colussi e il secont di Delchi Tirel, a son stâts revisionâts daûr de aplicazion de grafie uficiâl par cheste edizion. Lis oparis di traduzion e di revision a son stadis dadis de ARLeF, cuntune convenzion, ae Societât Filologjiche Furlane.
A son stadis stampadis 5000 copiis par ognidun dai cuatri tescj: 4000 volums a vignaran distribuîts tes scuelis primariis e tes scuelis secondariis di prin grât des provinciis di Udin, Gurize e Pordenon, ven a stâi li che si fâs l’insegnament de lenghe furlane; cun di plui a vignaran consegnadis tes scuelis magjistrâls, li che a vegnin formâts i insegnants dal avignî, e tai Istitûts tecnics e tai Liceus. La distribuzion e vignarà fate cu la poie dal ufici scolastic regjonâl, che al à une impuartance strategjiche.
“La ARLeF – al comente il President Lorenzo Zanon – e puarte indenant cun sucès lis sôs colaborazions cun associazions e cun ents competents su la lenghe furlane: a rindi facilis lis cooperazions al è l’obietîf comun di promozion e di tutele de marilenghe e des sôs produzions leterariis, in plui de considerazion comun che la tutele de lenghe e je un imprest fondamentâl pe tutele de nestre identitât. La sielte dai tescj e je stade fate daûr di criteris di cualitât e di sensibilitât atente viers la lenghe dai mestris de leterature.”
Lis copiis des publicazions presentadis a son a disposizion li de sede de ARLeF – place XX di Setembar, 23 a Udin (tel. 0432/ 555 848).
