Furlan
Italiano
GOL: LIS LENGHIS DAL SPORT
Si davuelzarà vuê, miercus ai 31 di Març aes 11.30, li de sede de ARLeF la presentazion dal volum “Gol: lis lenghis dal sport”.
La cuviertine di GOL: lis lenghis dap sport
Si davuelzarà vuê miercus ai 31 di Març aes 11.30, li de sede de ARLeF in Place XX di Setembar, 23 a Udin, la presentazion dal volum “Gol: lis lenghis dal sport”.
Al incuintri a saran presints Lorenzo Zanon, President de ARLeF, Franco Soldati, President de Udinese Calcio, Massimo Duca, Diretôr de ARLeF, William Cisilino, component dal Comitât Tecnic Sientific de ARLeF e moderatôr dal incuintri, Federica Angeli e Priscilla De Agostini autoris dal volum.
Il test al presente une panoramiche europeane sul rapuart che al esist jenfri sport e lenghe. Dongje de descrizion di cualchi manifestazion a pro dal ricognossiment dai dirits linguistics, al è stât analizât ancje cemût che il sport e la informazion sportive a son promovûts e veicolâts tes lenghis minoritariis e, soredut, cemût che il sport al pues jentrâ tes strategjiis di planificazion e di politiche linguistiche. Cun di plui, a son stâts analizâts tal specific i plans di comunicazion e lis strategjiis linguistichis dal FC Barcelona e de Udinese Calcio, viodude la sielte fat pôc timp indaûr de Societât di doprâ ancje la lenghe furlane te comunicazion. Il volum, tal ultin, al à ancje un glossari curt specific talian/furlan dai tiermins dal balon.
“L’ARLeF – al comente il President Lorenzo Zanon – e puarte indenant cun sucès la sô colaborazion cu la Udinese Calcio, te promozion e tutele de lenghe ancje tal setôr dal sport. Il protocol di intese firmât cu la Societât blancje e nere al mostre ancjemò une volte cemût che la lenghe furlane e sei buine di rapresentâ ducj i setôrs de realtât atuâl, ancje il sport”.
